مۇنداي ۇسىنىستى الماتى وبلىسىنىڭ جۇرشىلىعىمەن كەزدەسۋى كەزىندە مەملەكەت باسشىسى ءبىلدىردى, دەپ حابارلايدى Egemen.kz.
«قوناەۆ عىلىم-ءبىلىم ورتالىعىنا جانە ستۋدەنت جاستاردىڭ قالاسىنا اينالۋى كەرەك. قازىر جوعارى وقۋ ورىندارىنىڭ كوبى الماتىدا ورنالاسقان. بۇل حالىق ونسىز دا تىعىز قونىستانعان قالانىڭ احۋالىنا ءوز اسەرىن تيگىزەدى. وندا كولىك كەپتەلىسى كوپ. جاتاقحانا جانە قولجەتىمدى باسپانا تاپشىلىعى بار. شاھاردىڭ اۋاسى دا لاستانىپ بارادى. وسىنىڭ ءبارىن ەسكەرە وتىرىپ, قوناەۆتا «اكادەميالىق قالاشىق» قۇرۋ ماسەلەسىن قاراستىرعان ءجون دەپ سانايمىن», دەدى پرەزيدەنت.
قاسىم-جومارت كەمەل ۇلىنىڭ ايتۋىنشا, ءىرى قالالاردىڭ جانىنان يننوۆاتسيالىق ورتالىق قۇرعان ەلدەر از ەمەس.
«ارينە, جاستاردىڭ الماتى سياقتى ءىرى قالادا وقىپ, جۇمىس ىستەگىسى كەلەتىنى تۇسىنىكتى. دەگەنمەن, قوناەۆ ستۋدەنتتەر ءۇشىن وتە ىڭعايلى قالا بولار ەدى دەپ ويلايمىن. بۇل جاقتا جاتاقحانا سالۋعا جەر جەتكىلىكتى, پاتەر جالداۋ دا قىمبات ەمەس. قۇزىرلى مينيسترلىك قوناەۆ قالاسىندا الماتىداعى جوعارى وقۋ ورىندارى مەن كوللەدجدەردىڭ بولىمشەسىن اشۋ ماسەلەسىن قاراستىرۋى كەرەك. سونداي-اق, جاڭا زاماناۋي ۋنيۆەرسيتەت اشۋ ءىسىن ويلاستىرۋى قاجەت. جالپى, الەمنىڭ ءىرى ۋنيۆەرسيتەتتەرىنىڭ كوپشىلىگى ءىرى قالالاردا ەمەس, قالادان الشاقتاۋ جەرلەردە جايعاسقان. بۇل جاستاردىڭ الاڭسىز ءبىلىم الۋىنا قولايلى جاعداي جاساۋ ءۇشىن قاجەت. وسى قادام وڭىردەگى كادر تاپشىلىعىنا بايلانىستى تۇيتكىلدەردى شەشۋگە دە زور سەپتىگىن تيگىزەدى», دەدى قاسىم-جومارت كەمەل ۇلى.
ايتا كەتەيىك, وسى رەتتە ۇكىمەت بۇل ماسەلە بويىنشا جاڭا جىلعا دەيىن ناقتى ۇسىنىس بەرۋى كەرەك.