ۇلتتىق ەكونوميكا ءمينيسترى دۇنيەجۇزىلىك بانك پەن حالىقارالىق ۆاليۋتا قورىنىڭ «جوعارى ينفلياتسيا كەزەڭىندەگى سالىق سالۋ» كونفەرەنتسياسىنا قاتىستى, دەپ حابارلايدى Egemen.kz ۇلتتىق ەكونوميكا مينيسترلىگىنىڭ ءباسپاسوز قىزمەتىنە سىلتەمە جاساپ.
مينيستر ءوز سوزىندە قولدانىستاعى سالىق كودەكسىنە سايكەس مۇناي سەكتورى ءۇشىن ۇستەمە پايداعا سالىناتىن سالىق قولدانىلاتىنىن اتاپ ءوتتى. تازا تابىستىڭ شەگەرىم سوماسىنىڭ 25%-دان اساتىن بولىگىنە سالىق سالىنادى.
«جەر قويناۋىن پايدالانۋشى ۇستەمە پايداعا سالىناتىن سالىقتى مولشەلەرمەلەردىڭ جىلجىمالى مەجەلىگى بويىنشا تولەيدى. ول شەگەرىمدەرگە تازا كىرىستىڭ مولشەرىنە بايلانىستى 7 دەڭگەيدەن تۇرادى. ءاربىر دەڭگەي ءۇشىن ۇستەمە پايدا سالىعىن ەسەپتەۋدىڭ شەكتى سومالارى بەلگىلەنەدى. جالپى, ءىس جۇزىندە سالىق تولەۋشىلەر سالىقتى ەسەپتەۋ مەن تولەۋدىڭ كۇردەلىلىگىنە شاعىمدانبايدى», دەدى ول.
مينيستر اتاپ وتكەندەي, مەملەكەت الەمدىك ەكونوميكالىق جاعدايدى ەسكەرە وتىرىپ, ءادىل سالىق سالۋ ساياساتىن جۇرگىزۋدە. تابيعي رەسۋرستارعا باعا جوعارى بولعان كەزەڭدە بيۋدجەت ءوندىرۋشى سەكتوردان ۇلكەن سالىق قايتارىمىن الۋدا.
قازاقستاندا ادال سالىق جۇيەسى جانە كاسىپكەرلىك قىزمەتتى, وڭدەۋشى ونەركاسىپ پەن اۋىل شارۋاشىلىقتى ىنتالاندىرۋعا باعىتتالعان سالىقتىق جەڭىلدىكتەر مەن پرەفەرەنتسيالاردىڭ كەڭ سپەكترى قاراستىرىلعان.
«ەلىمىزدەگى ميكرو جانە شاعىن بيزنەس كىرىس سالىعىنان ءۇش جىلعا بوساتىلعان جانە بۇل سۋبەكتىلەرگە قاتىستى تەكسەرۋلەر جۇرگىزۋگە موراتوري جاريالانعان. شەتەلدىك ينۆەستورلار ءۇشىن دە قولايلى جاعدايلار جاسالعان. ارنايى ەكونوميكالىق ايماقتاردا سالىق سالۋدىڭ جەڭىلدەتىلگەن رەجيمى قولدانىلادى», دەدى ءا.قۋانتىروۆ.
سونىمەن قاتار ەلدەن كاپيتالدى شىعارماۋدى ىنتالاندىرۋ بويىنشا اۋقىمدى جۇمىس جۇرگىزىلۋدە.
سونداي-اق ۇەم باسشىسى مەەۇ (مۇناي ەكسپورتتاۋشى ەلدەر ۇيىمى) حالىقارالىق دامۋ قورىنىڭ باس ديرەكتورىمەن كەلىسسوزدەر جۇرگىزدى.
ابدۋلحاميد الحاليف قوردىڭ قىزمەتى تۋرالى ەگجەي-تەگجەيلى ايتىپ بەردى. ونىڭ پىكىرىنشە, ۇيىم قر تۇراقتى دامۋ جوبالارىن قارجىلاندىرۋدا پايدالى بولۋى مۇمكىن.
تاراپتار كومىرتەگى بەيتاراپتىعىنا قول جەتكىزۋ جونىندەگى جوسپارلاردى دايىنداۋ بارىسى تۋرالى اقپارات الماسىپ, ىنتىماقتاستىقتى ودان ءارى كەڭەيتۋگە دايىندىعىن ءبىلدىردى.