پاۆلوداردا دورەكى تاربيەشى جۇمىستان شەتتەتىلدى

13 قازان كۇنى پاۆلودار قالاسىنداعى №52 ارنايى بالاباقشانىڭ اكىمشىلىگىنە 5 جاسار بالانىڭ اناسى تاربيەشىنىڭ تاربيەلەنۋشىگە دەگەن دورەكى قارىم-قاتىناسى تۋرالى شاعىم تۇسىرگەن. 

- بالانىڭ اناسى ءسابيدىڭ كەۋدەسىندە جانە ارقاسىندا تىرناق ىزدەرى بار فوتوسۋرەتتەردى ۇسىندى. بەينەكامەرادان تۇسىرىلگەن جازبالاردى قاراۋ كەزىندە مۇعالىمنىڭ بالالارعا شىنىمەن دورەكىلىك  تانىتقانى انىقتالدى, - دەدى وبلىستىق ءبىلىم بەرۋ باسقارماسىنداعىلار.

جەرگىلىكتى Pavlodarnews.kz سايتىندا تەرگەۋ اياقتالعانعا دەيىن تاربيەشىنىڭ جۇمىستان شەتتەتىلگەنى حابارلاندى.

«13 قازان كۇنى «بالدىرعان» توبىنىڭ اتا-اناسى باقىلاۋ كامەرالارىن قاراپ وتىرعاندا باعدارلاما ىستەن شىققان, ياعني, باسقا كۇندەردەگى جازبالاردى كورۋ مۇمكىن بولماعان. بەينەباقىلاۋ جۇيەسىنە قىزمەت كورسەتەتىن ۇيىم 15-16 قازان ارالىعىندا اقاۋلاردى جويدى.  بۇل ورىندالعان جۇمىس اكتىلەرىمەن راستالادى. ماسەلە باسقارما مەن ءبىلىم ءبولىمىنىڭ باقىلاۋىنا الىنعان. قوسىمشا تۇسىنىكتەمەلەر اكىمشىلىك ءىس اياقتالعان سوڭ بەرىلەدى», دەلىنگەن حابارلامادا.

ايتا كەتەيىك, وسى وقيعاعا بايلانىستى بالاباقشا مەڭگەرۋشىسىنىڭ مىندەتىن اتقارۋشىعا ەسكەرتۋ تۇرىندەگى تارتىپتىك شارا قولدانىلعان.