بەلگىلى اقىن, اۋدارماشى, عالىم ساعىنعالي سەيىتوۆتىڭ تۋعانىنا 105 جىل تولدى. قالامگەردىڭ مەرەيتويى ونىڭ تۋعان جەرى – باتىس قازاقستان وبلىسىنىڭ اقجايىق اۋدانىندا كەڭىنەن اتالىپ ءوتتى.
وسىدان بەس جىل بۇرىن اقجايىق اۋدانى ورتالىعىندا اقىننىڭ ءبيۋستى ورناتىلعان بولاتىن. ال بيىلعى كەشەندى شارا اۋداندىق ورتالىقتاندىرىلعان كىتاپحانالار جۇيەسىنە ساعىنعالي سەيىتوۆتىڭ ەسىمى بەرىلگەن ءسۇيىنشى حاباردان باستالدى. وسى ءبىر ەلەۋلى وقيعاعا ارنالعان سالتاناتتى جيىنعا ساعىنعالي اقىننىڭ پەرزەنتتەرى ديدار جانە ءدىلبار سەيىتوۆالار, جازۋشى ساكەن سەيفۋلليننىڭ جيەنى, بيولوگيا عىلىمدارىنىڭ دوكتورى سوفيا سەيفۋللينا, اقىن, قازاقستاننىڭ ەڭبەك سىڭىرگەن قايراتكەرى عالىم جايلىباي, جازۋشى, عالىم, فيلولوگيا عىلىمدارىنىڭ دوكتورى نۇرداۋلەت اقىش, جەرگىلىكتى ولكەتانۋشى جايساڭ اقباي, باتىس قازاقستان وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى سايران دۇيسەنوۆ, ايتىسكەر اقىن, قازاقستان رەسپۋبليكاسى جازۋشىلار وداعى وبلىستىق فيليالىنىڭ جەتەكشىسى باۋىرجان حاليوللا, جازۋشى-جۋرناليست باۋىرجان عۇبايدۋللين, جۇبان مولداعاليەۆ اتىنداعى وبلىستىق امبەباپ عىلىمي كىتاپحاناسى ديرەكتورىنىڭ ورىنباسارى نۇرلىگۇل ساعىنوۆا, اتىراۋ, اقتوبە وبلىستارىنىڭ كىتاپحانا ديرەكتورلارى مەن ماماندارى, وبلىس ەڭبەك ارداگەرلەرى مەن زيالى قاۋىم وكىلدەرى قاتىستى. كىتاپحانادا وتكەن «ەل قوناعى – ەل ارداعى» اتتى كەزدەسۋ شاراسىندا ساعىنعالي سەيىتوۆتىڭ ءوز شىعارمالارى مەن ول جايىندا ەستەلىكتەر شوعىرلانعان «قاندىقتا تۋىپ قالىڭ ەلگە تانىلعان» اتتى جيناقتىڭ تۇساۋى كەسىلدى. سونداي-اق ماحامبەت اتىنداعى باتىس قازاقستان ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ كانديداتى زەينوللا مۇتيەۆ «ساعىنعالي سەيىتوۆتىڭ ادەبي جانە عىلىمي مۇراسى» اتتى سۋ جاڭا عىلىمي-مونوگرافيا كىتابىن وقىرماندارعا تانىستىردى.
قالامگەردىڭ مەرەيتويىنا بايلانىستى ۇيىمداستىرىلعان ەڭ ۇلكەن شارا اقجايىق اۋداندىق مادەني-دەمالىس ورتالىعىندا ءوتتى. «اقىن. عالىم. ازامات» تاقىرىبىنداعى رەسپۋبليكالىق عىلىمي-تانىمدىق كونفەرەنتسيادا شەشەندەر مەرەيتوي يەسىنىڭ سان قىرلى قىزمەتى مەن شىعارماشىلىق بولمىسىنا توقتالدى. جەرگىلىكتى قالامگەر, قوعام بەلسەندىسى نۇرلان ءسادىر «ساعىنعالي سەيىتوۆتىڭ زامانى مەن زامانداستارى» تاقىرىبىنا ءسوز قوزعاسا, جازۋشى, عالىم نۇرداۋلەت اقىش «ساعىندىرعان ساعىنعالي اتا» دەپ وي تولعادى. اق جايىق قالامگەرلەرىنىڭ اعاسى, اقىن ايتقالي نارىكوۆ اقىننىڭ ازاماتتىق ليريكاسى جايىندا ايتىپ بەرسە, فيلولوگيا عىلىمدارىنىڭ كانديداتى زەينوللا مۇتيەۆ ساعىنعالي سەيىتوۆتىڭ ادەبي جانە عىلىمي مۇراسى حاقىندا سىر شەرتتى. ال اقىننىڭ جەرلەسى, اقجايىق اۋدانىنىڭ قۇرمەتتى ازاماتى, اقىن ۇزىلدىك ەلەۋبايقىزى ساعىنعالي اعا شىعارمالارىنداعى تۋعان جەر تاقىرىبى جونىندە بايانداسا, اقجايىق اۋدانىنىڭ تاعى ءبىر قۇرمەتتى ازاماتى, اقىن تىلەس جازىقباي دا كەش يەسىنىڭ ومىرلىك بولمىسىن دارىپتەپ, ءسوز سويلەدى.
وسى شارا اياسىندا «ەكى عاسىرمەن ەگىز ورىلگەن تاعدىر» اتتى ايماقتىق بايقاۋ جەڭىمپازدارى ماراپاتتالدى. مەرەيتويدى ۇيىمداستىرۋشى اقجايىق اۋدانىنىڭ اكىمى قاليار ايتمۇحامبەتوۆ اقىننىڭ قىزدارى ديدار مەن ءدىلبار سەيىتوۆالارعا جانە جازۋشى ساكەن سەيفۋلليننىڭ ۇرپاعى سوفيا ماجيتقىزىنا قۇرمەت كورسەتىپ, يىعىنا شاپان جاپتى.
شارا اۋداننىڭ كوركەمونەرپازدارى ۇسىنعان «جايىقتا تۋعان ەكەنسىڭ...» اتتى كونتسەرتتىك باعدارلامامەن قورىتىندىلاندى. ساعىنعالي سەيىتوۆتىڭ 105 جىلدىعىنا ارنالعان رەسپۋبليكالىق-ايماقتىق جىر-ءمۇشايرانىڭ باس جۇلدەسىن جاس اقىن بەكبولات قالەنوۆ جەڭىپ الدى.
باتىس قازاقستان وبلىسى