دارابوز باتىر – قابانباي

ءىس-شاراعا مەكتەپ وقۋشىلارى, تاريح ءپانىنىڭ مۇ­عالىمدەرى, مەكتەپتىڭ كىتاپحانا مەڭگەرۋشىسى قاتىستى. ءىس-شارا­نىڭ ماق­ساتى قازاق باتىرى قاراكەرەي قابانبايدىڭ ءومىرى, ساياسي قىزمەتى, ەرلىك ىستەرى تۋرالى كەڭىنەن مالىمەت بەرۋ, باتىردىڭ قازاق تاريحىنداعى الاتىن ورنىن ۇلىقتاۋ, تۇلعانىڭ ءومىرىن وقىتۋ ارقىلى لوگيكالىق, اناليتيكالىق ويلاۋدى دامىتۋ جانە وقۋشىلاردى بابامىزدىڭ ەرلىگىنە تاريحي تۇرعىدان باعا بەرە بىلۋگە داعدىلاندىرۋ, تانىمدىق قابىلەتتەرىن ارتتىرۋ بولدى.

ۇلى قولباسشى قابانباي 1692 جىلى تۋىپ, 1770 جىلى دۇنيە سالعان. جەتى جاسىندا اكەسى قوجاعۇل, ون التى جاسىندا اعاسى ەسەنباي جوڭعارلار قولىنان قازا تابادى. ون التى جاستاعى بالا 1708 جىلى جاۋ اراسىنا جاسىرىن بارىپ, اعاسىن ولتىرگەن جوڭعار باتىرىنان كەگىن قايتارعان. وسىدان كەيىن زايسانداعى كەرەي ىشىنە بارىپ, اپايى مەن جەزدەسى بەرداۋلەتتىڭ قولىندا ەرجەتەدى. وزىنە شاپقان قابانداردى جايراتىپ, «قابان باتىر» اتاناتىنى وسى كەز. سودان باستاپ قاشان كوزى جۇمىلعانشا قىلىشىن قىنابىنا سالماعان.

دوڭگەلەك ۇستەل بارىسىندا وقۋشىلار قازاق اقىندارىنىڭ باتىرعا ارناعان ولەڭدەرىن وقىپ, ء«بىلىم ساندىعىنا» جاسىرىلعان سۇراقتارعا جاۋاپ بەردى. «ەرلەر ەسىمى – ەل تاريحى» اتتى كىتاپ كورمەسى ۇيىمداستىرىلدى. كورمەگە قابدەش ءجۇمادىلوۆتىڭ «دارابوز» شىعارماسى, «قازاقتىڭ الپىس باتىرى», «قازاقستان تاريحى» تاعى باسقا دا كىتاپتار قويىلدى. مەكتەپ ديرەكتورىنىڭ تاربيە ءىسى جونىندەگى ورىنباسارى ميراگۇل ميرعاليقىزى كىتاپحانا ۇجىمىنا وسىنداي تاعىلىمدى ءىس-شارا ۇيىمداستىرعانى ءۇشىن العىس ايتىپ, الداعى ۋاقىتتا دا بىرلەسكەن جۇمىستار جالعاساتىنىنا سەنىم ءبىلدىردى.

لاۋرا ەرىكقىزى,

ساعي جيەنباەۆ اتىنداعى وبلىستىق جاسوسپىرىمدەر

كىتاپحاناسىنىڭ كىتاپحاناشىسى

اقتوبە