زەينەپ تاعايقىزى 1956 جىلى 8 ناۋرىزدا سارىاعاش اۋدانىنداعى ىنتىماق اۋىلىندا دۇنيەگە كەلدى. 1978 جىلى تاشكەنت فارماتسەۆتيكالىق ينستيتۋتىن «پروۆيزور» ماماندىعى بويىنشا بىتىرگەن سوڭ ەڭبەك جولىن اباي ورتالىق ءدارىحاناسىندا باستادى. وسى جەردە تابان اۋدارماستان 1993 جىلعا دەيىن تابىستى جۇمىس ىستەدى. وسى ارالىقتا ءوزىن بىلىكتى مامان, شەبەر ۇيىمداستىرۋشى رەتىندە كورسەتە ءبىلدى.
1994 جىلى جەكە كاسىپكەرلىككە ويىسىپ, اۋداننان جەكە ءدارىحانا جەلىلەرىن ىسكە قوستى. حالىققا قاجەتتى ءدارى-دارمەكتەردى ۋاقتىلى جەتكىزىپ, اۋىلدىق, اۋداندىق اۋرۋحانالار مەن ءدارىحانالاردى ساپالى مەديتسينالىق بۇيىمدارمەن قامتاماسىز ەتتى. ال ارادا بەس جىل وتكەندە كوپسالالى «نۇربولات» وندىرىستىك كووپەراتيۆىن قۇرىپ, اۋىل شارۋاشىلىعى, قۇرىلىس, حالىققا قىزمەت كورسەتۋ سالالارىندا ىرگەلى ىستەرگە ءىز سالدى.
ز.وسپانوۆا مۇنىمەن توقتاپ قالعان جوق. 2004 جىلى اباي اۋىلىندا ءدارى-دارمەك ساقتايتىن قويما سالسا, 2011 جىلى وسى اۋىلدا مەديتسينالىق ورتالىق اشتى. ءۇش جىلدان سوڭ سارىاعاش قالاسىندا «نۇربولات» ەمدەۋ ورتالىعىن ىسكە قوستى. بۇگىندە ورتالىقتىڭ 115 ادامدى جۇمىسپەن قامتىپ وتىرعانىن اتاپ وتكەن ءجون.
زەينەپ تاعايقىزى 2003-2007 جانە 2007-2011 جىلدار ارالىعىندا سارىاعاش اۋداندىق ءماسليحاتىنىڭ ەكى شاقىرىلىمىنا دەپۋتات بولىپ سايلاندى. سايلاۋشىلار اماناتىن ارقالاي ءجۇرىپ, اۋدان اۋماعىنداعى قايىرىمدىلىق ءىس-شارالارىنا بەلسەنە اتسالىستى. وسى ەڭبەكتەرى ءۇشىن اۋدان باسشىلىعى تاراپىنان كوپتەگەن ماراپاتقا يە بولدى.
وكىنىشكە قاراي, التى ۇل-قىز تاربيەلەپ وسىرگەن, 19 نەمەرەگە سۇيىكتى اجە بولعان اياۋلى انا, ادال جار 67 جاسقا قاراعان شاعىندا ومىردەن وزدى. بىراق ارتىندا كوپتەگەن يگى دە ىزگى ىستەرى قالدى. سىرتقى سۇلۋلىعى مەن ىشكى جان دۇنيەسى قاتار قابىسقان تاجىريبەلى دە ىسكەر مامان زەينەپ تاعايقىزىنىڭ جارقىن بەينەسى ارىپتەستەرىنىڭ جۇرەگىندە ءاردايىم ساقتالادى.
«دامۋ» وڭتۇستىك قازاقستان وبلىسىنىڭ فارماتسەۆتيكالىق جانە
مەديتسينالىق ۇيىمدار قاۋىمداستىعى