اباي وبلىسىندا ەرەكشە قاجەتتىلىكتەرى بار ازاماتتاردىڭ قوردالانعان ماسەلەسى از ەمەس. بارلىعىنا تەڭدەي قولايلى ورتانى قالىپتاستىرۋعا بايلانىستى ۇسىنىستار مەن تىلەكتەردى ءوڭىر باسشىسى نۇرلان ۇرانحاەۆ تىڭداپ قايتتى.
وبلىس اكىمدىگىنىڭ مالىمەتىنە سايكەس, قازىر وڭىردە مۇگەدەكتىگى بار ادامدار ءۇشىن قولايلى ورتانى قۇرۋعا بايلانىستى جۇمىستار قولعا الىندى. ماسەلەن, 2025 جىلعا دەيىن مەملەكەتتىك قىزمەت كورسەتەتىن 575 نىساندى بەيىمدەۋ جوسپارلانىپ وتىر. بۇل تۋرالى ءوڭىر باسشىسى ايتتى. ول ەرەكشە قاجەتتىلىكتەرى بار ازاماتتاردىڭ كەز كەلگەن ماسەلەسىن جەدەل شەشۋگە ارنالعان ۇيلەستىرۋ كەڭەسىن قۇرۋ جونىندەگى باستامانى قولدايتىنىن جەتكىزدى.
قازىر وبلىستا «ينۆاتاكسي» قىزمەتىنىڭ 15 اۆتوكولىگى جۇمىس ىستەپ كەلەدى. 841 ورىنعا شاقتالعان 5 وبلىستىق مەديتسينالىق-الەۋمەتتىك ۇيىم, سونداي-اق كۇندىزگى جانە ءۇي جاعدايىنداعى 4,2 مىڭ ادامدى قامتيتىن 13 اۋماقتىق ورتالىقتىڭ قىزمەتى جولعا قويىلعان.
مۇمكىندىگى شەكتەۋلى جانداردىڭ مۇددەلەرىن قورعايتىن قوعام بەلسەندىلەرى وبلىس اكىمىنە ولاردىڭ وزەكتى ماسەلەلەرىن جەدەل شەشەتىن ۇيلەستىرۋ كەڭەسىن قۇرۋدى ۇسىندى. ءوز تاراپىنان ءوڭىر باسشىسى بۇل باستامانى تەك قولدايتىنىن, سونداي-اق بۇل باعىتتاعى جۇمىستاردى قارقىنداتۋعا دايىن ەكەنىن جەتكىزدى.
قوعاممەن بايلانىستى كۇشەيتىپ, تۋىنداعان پروبلەمالاردى قاداعالاۋ ماقساتىندا ن.ۇرانحاەۆ ەرەكشە قاجەتتىلىگى بار رۋسلان ەرەمباەۆتى ءوزىنىڭ شتاتتان تىس كەڭەسشىسى ەتىپ تاعايىندادى.
«وبلىس قۇرىلعان ساتتەن باستاپ ەرەكشە قامقورلىقتى قاجەت ەتەتىن بالالاردىڭ اتا-انالارىمەن بىرنەشە رەت كەزدەستىم. سىزدەردىڭ وزەكتى ماسەلەلەرىڭىزدى بىلەمىز, حاباردارمىز. ولاردى كەزەڭ-كەزەڭىمەن شەشۋگە دەن قويىلادى.
حالىقتىڭ قوزعالىسى باياۋ توپتارىنىڭ ءجۇرىپ-تۇرۋىنا ىڭعايلى بولۋى ءۇشىن كەدەرگىسىز ورتا قالىپتاستىرۋعا كۇش سالىنادى. ەرەكشە قاجەتتىلىگى بار ادامداردىڭ قوعامدىق كولىكتە تەگىن جول جۇرۋىنە بايلانىستى, سونداي-اق وڭالتۋ, مەديتسينالىق قىزمەت كورسەتۋ بويىنشا ماسەلەلەر پىسىقتالاتىن بولادى», دەدى ن.ۇرانحاەۆ.
قازىر قاراعايلى شاعىن اۋدانىندا 150 ورىنعا ارنالعان وڭالتۋ ورتالىعىنىڭ قۇرىلىسى اياقتالۋعا جاقىن. بۇدان بولەك, سەمەيدەگى №1 ارناۋلى الەۋمەتتىك قىزمەتتەر كورسەتۋ ورتالىعى مەن ۇرجارداعى بالالار ورتالىعىنا قوسىمشا كورپۋس سالۋ ماسەلەسى قاراستىرىلىپ جاتىر.
بۇل رەتتە وڭىردە ەرەكشە قاجەتتىلىكتەرى بار 28 مىڭنان استام ادام تۇراتىنىن ايتا كەتكەن ورىندى. ونىڭ 3 مىڭى – بالالار. تاياۋدا حالىقتىڭ باياۋ قوزعالاتىن توپتارىنىڭ ىڭعايلىلىعى ءۇشىن اسپالى كوپىر استىنداعى قوعامدىق كەڭىستىكتە جاياۋ جۇرگىنشىلەر وتكەلى سالىندى.
قازاننان باستاپ وڭىردە «قايىرىمدىلىق ايلىعى» اكتسياسى باستالىپ, ونىڭ اياسىندا بىرقاتار جۇمىستى ىسكە اسىرۋ كوزدەلگەن.
وسى ورايدا بيىل وبلىس ورتالىعىندا بالالاردى وڭالتۋ ورتالىعى جانە بالالارعا ارنالعان «قامقورلىق» ەرتە ارالاسۋ ورتالىعى اشىلعانىن ايتا كەتەيىك.
اباي وبلىسى