ءماجبۇرلى ەڭبەك

ءماجبۇرلى ەڭبەكتى جەرگىلىكتى اتقا­رۋ­شى ورگاندار قوعامدىق ورىنداردا ۇيىمداستىرادى جانە كۇنىنە ءتورت سا­عات­تان اسىرىلماي وتەلەدى. سوت­تال­عان­عا تاعايىندالاتىن جازا ءتۇرىنىڭ ءبىرى – باس بوستاندىعىنان شەكتەۋ جازاسى. باس بوستاندىعىنان شەكتەۋ جازاسى ادەتتە تۇراقتى جۇمىس ورنى مەن وقۋدا جوق سوتتى بولعاندارعا قولدانىلادى. جەرگىلىكتى اتقارۋشى ورگاندار ايقىندايتىن بۇل جازا ءتۇرى جازانى وتەۋدىڭ بۇكىل مەر­زى­مى ىشىندە جىل سايىن ءجۇز ساعاتتان تا­عايىن­دالادى.

زاڭ تالاپتارىنا سايكەس ءماجبۇرلى ەڭبەككە تارتۋ كۇنىنە ءتورت ساعاتتان اسپاۋى قاجەت. وسىنداي جازا تۇرىنە سوتتى بولعاننىڭ ءبىرى – جيىرما ەكى جاستاعى بەرىك ەسىمدى ازامات. ول 2021 جىلى تۇر­كىستان قالالىق سوتىنىڭ ۇكىمىمەن ۇرلىق جاساعانى ءۇشىن كىنالى دەپ تانىلىپ 3 جىل مەرزىمگە باس بوستاندىعىنان شەكتەۋ جازاسىنا تارتىلعان. سونىمەن قاتار ول جازا وتەۋ كەزىندە 100 ساعاتتان اسپايتىن قوعامدىق جۇمىستاردى دا اتقاردى.

– سوتتالعان ازامات 100 ساعاتتىق ءماج­بۇرلى ەڭبەگىن وتەۋ ءۇشىن تۇركىستان «جارىق-تازالىق» جشس-گە جىبەرىلدى. قازىرگى تاڭدا كۇنىنە ءتورت ساعاتتان اسىرىلماي ءماجبۇرلى ەڭبەگىن وتەۋدە. بۇل ەڭبەكتى قوعامعا پايدالى ءارى ءتيىمدى ەتۋ ءۇشىن اكىمشىلىك عيماراتىنىڭ الدىن قوقىستان تازالاۋ, اباتتاندىرۋ, تۇزەتۋ جانە كوكتەم مەزگىلىندە جەر اۋدارىپ اۋلاعا كۇل وتىرعىزىپ, شارباقتارىن سىر­لاۋ سەكىلدى ەڭبەك ەتىپ جازاسىن وتەيدى. ءماجبۇرلى ەڭبەگىن اياقتاعان سوڭ تۇركىستان «جارىق-تازالىق» جشس ءماجبۇرلى ەڭبەگىنىڭ اياقتالعاندىعى تۋرا­لى كەستە جاساپ, قالالىق پروباتسيا قىز­مەتىنە جازباشا تۇردە حابارلايدى, – دەيدى تۇركىستان قالالىق پقب اعا ينس­پەكتورى جانبولات ابدراحمانوۆ.

پروباتسيا ينسپەكتورىنىڭ سوزىنە قاراعاندا, ءماجبۇرلى ەڭبەك باس بوس­تان­د­ى­عىن شەكتەۋ جازاسىنا تارتىلعان ازاماتتار ءۇشىن ءتيىمدى. سەبەبى ولار جۇمىسسىز ۇيدە جاتپايدى, 4 ساعات بولسا دا ەڭبەك ەتىپ, جۇمىس ىستەۋگە داعدىلانادى. ال كەيبىر سوتتالعان ازاماتتار تەز ارادا جۇ­مىسقا ورنالاسىپ كەتەتىن جايتتار دا كەزدەسەدى ەكەن. سوتتالعان بەرىك ەسىمدى ازامات 100 ساعاتتىق ءماجبۇرلى ەڭبەگىن وتەۋ ءۇشىن تۇركىستان قالالىق جۇمىسپەن قامتۋ جانە الەۋمەتتىك باعدارلامالار ءبولىمى ارقىلى جۇمىسقا جىبەرىلدى.

ءماجبۇرلى ەڭبەككە تارتىلعان ازامات­تارعا ەشقانداي اقى تولەنبەيدى. كەرى­سىنشە وزدەرىنە بەرىلگەن جازا مەرزىمى بويىنشا ەڭبەكتەرىن تەگىن وتەيدى. سوت­تالعان ازامات قوعامدىق جۇمىسقا تارتۋ جازاسىمەن ەسەپكە الىنعاننان كەيىن 10 كۇن ىشىندە جەرگىلىكتى اتقارۋ ورگاندارىنا جولدانىپ, سول جەردە ءوز جۇمىسىن باستايدى.

– قازاقتا «قولىڭمەن ىستەگەن ءىستى, موينىڭمەن كوتەر» دەيدى عوي. ارينە, ءوزىمنىڭ جاساعان قىلمىسىمدى مويىندايمىن. قاتەلىككە جول بەرىپ, ەسىرت­كى زاتتارىن پايدالاندىم. ماعان قوعام­دىق ءماجبۇرلى ەڭبەككە تارتۋ جازاسى تاعايىندالدى. ون كۇننەن بەرى وسى جا­زانى وتەپ ءجۇرمىن. ەندى 80 ساعاتتىق ەڭبەگىمدى وتەيمىن. جاساعان قىلمىسىما وكى­نەمىن, ونى الداعى ۋاقىتتا قايتا­لامايمىن, – دەدى سوتتالعان بەرىك.

راۋشان ناربەك

تۇركىستان وبلىسى