وڭىرلەردە «Amanat» پارتياسىنىڭ كەزەكتەن تىس XXIV سەزى مەن قاسىم-جومارت توقاەۆتى قولداۋ جونىندەگى حالىقتىق كواليتسيا فورۋمىنىڭ قورىتىندىلارىن تالقىلاۋ جالعاستى.
قىزىلوردا قالاسىندا وتكەن «Bir tolqynda» وبلىستىق ديالوگ الاڭىنىڭ وتىرىسىندا پارتيا بەلسەندىلەرى سەزد قورىتىندىسىن تالقىلادى. «جاستار رۋحى» وڭىرلىك فيليالىنىڭ توراعاسى مەدەت جورابەكتىڭ ايتۋىنشا, سەزدە قابىلدانعان ساياسي تۇعىرناما ەل دامۋىنىڭ نەگىزگى باعىتتارى مەن ساياسي بىرلەستىك قاعيداتتارىن ايقىندايدى. ول سونداي-اق حالىقتىق كواليتسيا فورۋمى تۋرالى ءوز اسەرىمەن ءبولىستى.
«مەملەكەت باسشىسى ايتقان ۇلتتى ۇيىستىرۋدىڭ 7 قاعيداسى – رەفورمالار باعىتىن تەرەڭدەتۋ جانە قوعامىمىزدى دەموكراتيالاندىرۋعا ۇمتىلۋ. پرەزيدەنت قيىندىقتاردى بىرگە ەڭسەرۋىمىز قاجەت دەدى. ول ءوزارا قولداۋدى, سەنىم مەن ىنتىماقتاستىقتى ەڭ قۇندى قاسيەتتەر دەپ اتادى. وسى ورايدا رەفورمالاردى جۇزەگە اسىرۋدا جاستار شەشۋشى ءرول اتقاراتىنىنا سەنىمدىمىن», دەدى ول.
ال تاراز قالالىق دوستىق ۇيىندە سەزد دەلەگاتتارى, فورۋمعا قاتىسۋشىلار, ۇەۇ وكىلدەرى جانە بەلسەندى جاستاردىڭ قاتىسۋىمەن دوڭگەلەك ۇستەل ءوتتى. باسقوسۋ بارىسىندا «قوعامدىق كەلىسىم» وبلىستىق فيليالىنىڭ باسشىسى مۇباراك جيناقباەۆا الداعى سايلاۋ ناۋقانى اشىق ءارى ءادىل وتەتىنىنە سەنىم ءبىلدىردى.
«سەزد جۇمىسىنان ايرىقشا اسەر الدىم. بۇل – قازاقستاننىڭ دامۋدىڭ جاڭا كەزەڭىنە قادام باسقانىنىڭ ايعاعى. الدىمىزدا ساياسي جانە ەكونوميكالىق رەفورمالاردى تابىستى ىسكە اسىرۋ, جاڭا ادىلەتتى قازاقستان قۇرۋ مىندەتى تۇر. ەتنوسارالىق كەلىسىمدى ساقتاپ قالۋ ءۇشىن قاسىم-جومارت كەمەل ۇلى «رۋحاني ۇندەستىك – بىرلىكتىڭ باستاۋى» قاعيداتىن ۇسىندى. ءبىز ۇلتارالىق ديالوگتى ساقتاپ, بارىنشا نىعايتۋىمىز كەرەك», دەدى ول.
ءوز كەزەگىندە تاراز قالالىق ءماسليحاتىنىڭ حاتشىسى باتىربەك كۇلەكەەۆ جينالعاندارعا قاسىم-جومارت توقاەۆتى پرەزيدەنتتىككە كانديدات رەتىندە ۇسىنۋ تۋرالى شەشىمدى حالىقتىق كواليتسيا فورۋمىنىڭ بارلىق قاتىسۋشىسى ءبىراۋىزدان قولداعانىن جەتكىزدى. «مەن قاسىم-جومارت توقاەۆ سىندى كورنەكتى ساياساتكەردىڭ, تاجىريبەلى ديپلوماتتىڭ, مەملەكەت قايراتكەرىنىڭ كانديداتۋراسىن قولدايمىن», دەدى ول.
شىمكەنتتە پارتيالىقتار «بال تەكستيل» كىلەم فابريكاسىنىڭ ۇجىمىمەن كەزدەستى. XXIV سەزد دەلەگاتى, «Amanat» پارتياسىنىڭ مۇشەسى راۋشان جيرەنوۆانىڭ ايتۋىنشا, الداعى سايلاۋ – تاۋەلسىز قازاقستان ءۇشىن ۇلكەن ساياسي قادام. «نەگىزگى ماقساتتاردىڭ ءبىرى – ادىلەتتى قازاقستان قۇرۋ. شىنىندا دا, ادىلەتتىلىك بار جەردە عانا زاڭ ۇستەمدىگى, تۇراقتىلىق ورنايدى. سونداي قوعام عانا العا باسادى», دەدى ول.