ەلوردانىڭ تورىندە وتكەن القالى جيىننىڭ ماڭىزى زور. ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ كەزەكتى ءسامميتىن وتكىزۋگە ءبىزدىڭ مەملەكەت باستاماشى بولدى. ەلىمىزدىڭ ديپلوماتيالىق قىزمەتىنە 30 جىل تولۋىمەن تۇسپا-تۇس كەلگەن ءىس-شارا حالىقارالىق ساياسي ارەناداعى مارتەبەمىزدى ارتتىرا تۇسكەنى انىق. الەمدە, الىسقا بارماي-اق كورشى مەملەكەتتەردە گەوساياسي احۋال ۋشىعىپ تۇرعان كەزەڭدە ديپلوماتيالىق قاتىناستىڭ ءرولى جوعارى. وسى تۇرعىدان قاراعاندا, اتالعان كەڭەستىڭ ماڭىزدىلىعى زور دەۋگە تولىق نەگىز بار.
قازاقستان توراعا رەتىندەگى ميسسياسىن ءالى ەكى جىل جالعاستىرادى. نەگىزگى ماقسات – مەملەكەتتەر اراسىنداعى قاقتىعىستىڭ الدىن الۋ. كەڭەستىڭ ىشكى باعىتتارى دا بار. سونىڭ ءبىرى – ساراپتامالىق ورتالىقتاردىڭ فورۋمى. مۇندا ءتۇرلى ۇيىمدارعا مۇشە حالىقارالىق ساراپشىلار يدەيالارىمەن, تاجىريبەلەرىمەن ءبولىسىپ, ايماقتىق قاۋىپسىزدىكتى قالىپتاستىرۋ بويىنشا ۇسىنىستارىن ورتاعا سالادى. سونىمەن قاتار كەڭەس شەڭبەرىندە ەكونوميكالىق تۇرعىدان ماڭىزدى جاستار باعىتىنداعى جۇمىستاردى اتاپ وتۋگە بولادى. جالپى, اتالعان كەڭەستىڭ مەملەكەتتەر اراسىنداعى قارىم-قاتىناستى نىعايتۋعا, ورتاق قاۋىپ-قاتەرگە قارسى تۇرۋ بويىنشا ماسەلەلەردى رەتتەۋگە ىقپالى زور.
مەملەكەت باسشىسى قاسىم-جومارت توقاەۆ ءوز سوزىندە نەگىزگى باعىتتاردى اتاپ ءوتتى. ەكونوميكا, ەكولوگيا, قاۋىپسىزدىك ماسەلەسى, باستىسى – عالامدىق پروبلەماعا اينالعان ازىق-ت ۇلىك قاۋىپسىزدىگى ماسەلەسىن رەتتەۋگە شاقىردى. بۇل رەتتە, كەڭەسكە قاتىسقان مەملەكەتتەر اراسىندا جاسىل ءدالىزدى اشۋ ۇسىنىسىن ورتاعا سالدى. كەڭەستىڭ قۇرامىندا 27 مەملەكەت ەدى, ەندى كۋۆەيت تە قاتارعا قوسىلدى. كەڭەس قۇرامىنىڭ ارتۋى ۇيىمنىڭ مارتەبەسىن ارتتىرىپ, گەوگرافياسىن كەڭەيتە تۇسەتىنى انىق.
تاعى ءبىر اتاپ وتەرلىگى, استانا قالاسى حالىقارالىق دەڭگەيدە بەيبىتشىلىكتىڭ ورداسىنا, بىتىمگەرشىلىكتى جۇرگىزۋدىڭ باستى الاڭىنا اينالىپ وتىر. ەلوردادا وتكەن سامميتكە 11 مەملەكەتتىڭ باسشىلارى كەلدى. رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ كەلۋىن ەرەكشە اتاپ وتۋگە بولادى. كەڭەستىڭ رەسەي مەن ۋكراينا اراسىنداعى قاقتىعىستىڭ بەيبىت تۇردە شەشىلۋىنە تيتتەي دە بولسىن ۇلەسى بولسا, ەلىمىزدىڭ, استانانىڭ حالىقارالىق ارەناداعى بەدەلى ارتا تۇسەتىنى ءسوزسىز.
قازبەك مايگەلدينوۆ,
ۇلتتىق قۇرىلتاي مۇشەسى, ساياساتتانۋشى