تاياۋدا اعايىنداردىڭ شاقىرۋىمەن تاراز قالاسىنا جولىمىز تۇسكەن-ءدى. اندا-ساندا الماتىعا بارىپ كەلە جاتىپ, جولاي ازداپ ايالداعانىمىز بولماسا, شاھاردى ارالاپ كورمەگەن ەدىك. توتىداي تارانعان اسەم قالا اياعىمىز جەرگە تيىسىمەن-اق كورگەن كوزدى كورىكتى كەلبەتىمەن بىردەن باۋراپ الدى.
قالادان تاياق تاستام جەردەگى «ايشا ءبيبى» انامىزدىڭ كەسەنەسى ۇرپاعىن مەيىر-شاپاعاتىمەن جەلەپ-جەبەپ تۇرعانداي اسەر بەرەدى. گۇلزارلار مەن سۋبۇرقاقتار, ساياباقتار مەن ءتۇرلى اتتراكتسيوندار, دەمالىس ورىندارى قالانىڭ اجارىن اشا تۇسكەن. بۇرىن بايقامايدى ەكەنبىز, اينالاعا ابايلاپ, زەر سالا قاراعان ادامعا شاھاردىڭ قارىشتاپ, ءوسىپ كەلە جاتقاندىعى بىردەن بايقالادى.
ۇلكەن داڭعىلدىڭ بويىمەن كەلە جاتقانبىز. كەنەت قارسى الدىمىزداعى كوپقاباتتى ۇيلەردىڭ قاس بەتىنە ورنالاستىرىلعان بەلگىلى قالامگەر, حالىق جازۋشىسى, مەملەكەتتىك سىيلىقتىڭ لاۋرەاتى شەرحان مۇرتازا مەن ماسكەۋ وليمپياداسىنىڭ چەمپيونى, قازاقستاننىڭ ەڭبەك ەرى جاقسىلىق ۇشكەمپىروۆتىڭ ۇلكەن ەتىپ سالىنعان تانىس بەينەلەرى كوزىمىزگە وتتاي باسىلدى. ەسىمىزگە قۇلاگەر اقىن ءىلياس جانسۇگىروۆتىڭ: ء«وز ۇلىن, ءوز ەرلەرىن ەسكەرمەسە, ەل تەگى قايدان السىن كەمەڭگەردى؟» دەگەن ءسوزى ءتۇستى. ىلە-شالا جالپىۇلتتىق رەسپۋبليكالىق باسىلىم – «Egemen Qazaqstan» گازەتىنەن شەراعاڭ جايلى ماتەريالداردى تۇششىنا وقىعانىمىز بار. «جاقسىنىڭ اتى, عالىمنىڭ حاتى ولمەيدى» دەگەن وسى ەمەس پە؟
قازاق – قاشاننان-اق ەلىم دەپ ەمىرەنىپ وتكەن اسىلدارىن ارداقتاپ, قۇرمەتتەي بىلگەن حالىق. ونىڭ اسىل تەكتىلىگى مەن بەكزاتتىعى دا وسى ۇلىلىعىندا. وسىناۋ ءۇردىستىڭ الداعى كەزدە دە ودان ءارى جالعاسا بەرۋىن قالايمىز.
كارىباي امزە ۇلى,
زەينەتكەر
تۇركىستان وبلىسى