قازاقستانداعى ءىرى قۇرىلىس نىساندارى اراسىندا 13 ارنايى ەكونوميكالىق ايماق بولسا, سونىڭ ەكەۋى جەتىسۋ وبلىسىنىڭ پانفيلوۆ اۋدانىنداعى قىتاي ەلىمەن اراداعى شەكارا ماڭىندا ورنالاسقان. پرەزيدەنت قاسىم-جومارت توقاەۆتىڭ قىركۇيەك ايىنداعى جولداۋىندا وسى ارنايى ەكونوميكالىق ايماقتار جونىندە ايتىلىپ, ولاردىڭ قىزمەتىن مۇلدەم جاڭا باعىتتا ۇيىمداستىرۋ مەن دامىتۋدىڭ جولدارى دا اتاپ كورسەتىلدى.
«قورعاس – شىعىس قاقپاسى» ارنايى ەكونوميكالىق ايماعى قۇرامىنداعى 129 گەكتار اۋماققا سالىنعان «قۇرعاق پورت» ايلاعىنىڭ ەلىمىزدىڭ ەكونوميكالىق دامۋى مەن حالىقارالىق ترانزيتتىك الەۋەتىنىڭ ارتۋىندا الار ورنى ەرەكشە. بۇل جوبا بۇگىندە قازاقستاننىڭ ەكونوميكالىق كۇرەتامىرىنا اينالدى. قۇرعاق ايلاققا قىتاي مەملەكەتى تاراپىنان تار تاناپتى 3, قازاقستان تاراپىنان كەڭجولاقتى وسىنشا تەمىر جول جەلىسى تارتىلىپ, سوڭعى بىرنەشە جىلدان بەرى كورشى ەلمەن جۇك الماسىپ كەلەدى. 2013 جىلى سالىنعان «قۇرعاق پورتتاعى» ەكى ەل اراسىنداعى جۇك الماسۋدىڭ نەگىزگى باسقارۋشى وپەراتورى – «RNZE-Ksrgos Gateway» جشس. سوڭعى التى ايدا عانا بۇل ايلاقتا 4,2 ملرد تەڭگەنىڭ قىزمەتى كورسەتىلگەن.
قۇرعاق ايلاقپەن جاپسارلاستىرا 225 گەكتار اۋماققا لوگيستيكالىق ورتالىق سالىنىپ, قويمالاردا مىڭداعان توننا جۇك ساقتالىپ, سان تاراپقا جونەلتىلەدى. سونىمەن قاتار 224 گەكتار جەرگە يندۋستريالىق ايماق ورنالاسقان. ونداعى العاشقى ءوندىرىس ورىندارى ىسكە كىرىستى. ياعني ارنايى ەكونوميكالىق ايماق قۋاتتى ءوندىرىس ورىندارىنىڭ وركەندەۋىنە دە جول اشتى. «قورعاس – شىعىس قاقپاسى» ارنايى ەكونوميكالىق ايماعىنىڭ قۇرىلىسى جالپى بىرنەشە كەزەڭگە ءبولىنىپ اتقارىلىپ, بىرەر جىلعا سوزىلادى. انىعىن ايتقاندا, مۇندا قازىر دە سان سالالى قۇرىلىس جۇزەگە اسىرىلىپ جاتىر.
جاقىندا «قۇرعاق پورتتىڭ» ەكىنشى جۇك وڭدەۋ كەزەڭى ىسكە قوسىلدى. بۇعان دەيىن ايلاقتان كۇن سايىن جۇك تيەلگەن 8-9 پويىز جىبەرىلسە, ەندى بۇل كورسەتكىش ەكى ەسەگە ءوسىپ, كۇن سايىن ايلاقتان جۇك كونتەينەرلەرى تيەلگەن 18-19 پويىز سان تاراپقا جول تارتىپ جاتىر. قحر تاراپىنان كەلەتىن كونتەينەرلەرگە تيەلگەن جۇكتىڭ باسىم بولىگى ورتالىق ازيا مەن پارسى شىعاناعى ارقىلى ەۋروپاعا, تاعى دا باسقا شالعاي شەتەلدەرگە قىسقا مەرزىمدە جەتكىزىلەدى. سولاردىڭ قاتارىندا Hewiett Pacard, Toyota, DHL جانە تاعى باسقا دا الەمگە تانىمال كوپتەگەن كومپانيا ءوز تاۋارلارىن وسى جەردەن ورتالىق ازيا مەن باتىس ەۋروپاعا تاراتىپ جاتىر. بۇل كومپانيالار نەگىزىنەن شەتەلدەرگە وزىق ۇلگىدەگى جەڭىل جانە اۋىر اۆتوكولىكتەر, باسقا دا قۇرىلعىلار ساتادى.
ەكىنشى كەزەڭنىڭ ىسكە قوسىلىپ, جۇك تاسىمالىن ەكى ەسە ارتتىرۋى «قۇرعاق ايلاق» قىزمەتىنىڭ شەگى ەمەس. بولاشاقتا بۇل ايلاقتا پويىزدارعا جۇك تيەۋ جۇمىسى ارتا تۇسپەك. ياعني ەل بەرەكەسىنە ەسەلەپ تابىس اكەلەتىنى ءسوزسىز.
جەتىسۋ وبلىسى