جۇمىسسىزدارعا ەلەكتروندىق حابارلامالار ارقىلى ۆاكانسيا ۇسىنىلادى

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا سوڭعى جىلدارى قازاقستاندىق ەڭبەك نارىعىندا جۇمىس كۇشى وسكەنىن ايتتى. ماسەلەن, 2016-2020 جىلدارى بۇل كورسەتكىش ورتا ەسەپپەن 36,4 مىڭ ادامدى قۇراسا, 2021 جىلى 76 مىڭعا جەتتى. بۇل جاعداي, ەڭ الدىمەن, 2000-شى جىلداردان باستاپ دۇنيەگە كەلگەن جاستاردىڭ ەڭبەك نارىعىنا قوسىلۋىنا بايلانىستى بولىپ وتىر.

قازىرگى ۋاقىتتا جۇمىسپەن قامتۋدى كەڭەيتۋ جانە جاڭا جۇمىس ورىندارىن قۇرۋدى ىنتالاندىرۋ جونىندەگى جۇمىس ۇلتتىق جوبالار مەن باسقا دا مەملەكەتتىك باعدارلامالار شەڭبەرىندە جۇرگىزىلىپ جاتىر. اتاپ ايتقاندا, كاسىپكەرلىكتى دامىتۋ بويىنشا ۇلتتىق جوبالار, «قۋاتتى وڭىرلەر – ەل دامۋىنىڭ درايۆەرى» جانە اوك دامىتۋ بويىنشا ۇلتتىق جوبالارى وڭ ناتيجە كورسەتىپ كەلەدى. بۇدان باسقا, بارلىق وڭىرلەر مەملەكەت باسشىنىڭ 10 مىڭ ادامعا 100 جۇمىس ورنىن قۇرۋ جونىندەگى تاپسىرماسىن ىسكە اسىرۋ شەڭبەرىندە جوسپاردى اسىرا ورىندادى.

بيىل 1 قازانداعى جاعداي بويىنشا 654 مىڭعا جۋىق ادام جۇمىسقا ورنالاستى. بارلىق بەلسەندى ۇلتتىق جوبالار تسيفرلاندىرىلدى, ەلەكتروندىق ەڭبەك بيرجاسىندا ورنالاستىرىلعان بوس جۇمىس ورىندارىن تولتىرۋ دەڭگەيى 87%-دى قۇرايدى.

الداعى جىلدارى ەڭبەك نارىعىن قولداۋ ءۇشىن وتباسىنىڭ تسيفرلىق كارتاسىن پايدالانا وتىرىپ, جۇمىسپەن قامتۋ سالاسىندا بەلسەندى قىزمەتتەر كورسەتۋگە جانە جىل سايىن كەمىندە 100 مىڭ جاستى وقىتۋ, جۇمىسقا ورنالاستىرۋ جانە ءوز ءىسىن اشۋ ءۇشىن مەملەكەتتىك قولداۋ شارالارىمەن قامتۋ جوسپارلانعان.

اتالعان سالادا ۇلتتىق ەكونوميكا ءمينيسترى الىبەك قۋانتىروۆ, الماتى وبلىسىنىڭ اكىمى مارات سۇلتانعازيەۆ, قىزىلوردا وبلىسىنىڭ اكىمى نۇرلىبەك نالىباەۆ جانە سولتۇستىك قازاقستان وبلىسىنىڭ اكىمى قۇمار اقساقالوۆ بايانداما جاسادى.

پرەمەر-مينيستر مەملەكەت باسشىسى قاسىم-جومارت توقاەۆتىڭ تاپسىرماسى بويىنشا مەملەكەتتىك ورگاندار مەن بارلىق دەڭگەيدەگى اكىمدەردىڭ جۇمىسى جاڭا جۇمىس ورىندارىن قۇرۋ بويىنشا كورسەتكىش نەگىزىندە باعالاناتىنىن اتاپ ءوتتى.

«ەڭبەك نارىعىندا قانداي ماماندىققا سۇرانىس كوپ, سوعان سايكەس جۇمىس جۇرگىزۋ قاجەت. اسا ماڭىزدى ماسەلە – حالىقتىڭ الەۋمەتتىك وسال توپتارىن جۇمىسپەن قامتۋ», دەدى ءاليحان سمايىلوۆ.

ونىڭ ايتۋىنشا, بيىل ۇلتتىق جوبالاردى ىسكە اسىرۋ شەڭبەرىندە 269 مىڭنان استام جۇمىس ورنى قۇرىلۋى ءتيىس. قازىرگى ۋاقىتتا 203 مىڭنان استام ادام جۇمىسقا ورنالاستى. بىراق ولاردىڭ 175 مىڭى – ۋاقىتشا جۇمىس.

ء«بىز تۇراقتى جۇمىس ورىندارىن كوبەيتۋگە كۇش سالۋىمىز كەرەك. ول ءۇشىن تسيفرلىق تەحنولوگيالارعا سۇيەنۋ ماڭىزدى. مەملەكەتتىك ورگانداردىڭ جۇيەلەرىن تولىق ينتەگراتسيالاي وتىرىپ, جۇمىسپەن قامتۋ سەرۆيستەرىنىڭ بارلىعىن تسيفرلاندىرۋ قاجەت», دەدى پرەمەر-مينيستر .

سونداي-اق ول وتباسىنىڭ تسيفرلىق كارتاسى, ەلەكتروندىق ەڭبەك بيرجاسى مەن جۇمىس ورىندارىن قۇرۋدىڭ ينتەگراتسيالانعان كارتاسىن بىرىكتىرگەننەن كەيىن, جۇمىسسىز جۇرگەندەرگە ەلەكتروندىق حابارلامالار ارقىلى ۆاكانسيالار ۇسىنۋعا بولاتىنىن ايتتى.

«جۇمىسسىزدارعا ءوتىنىش جازباي-اق بوس جۇمىس ورىندارىن ۇسىنۋ ماڭىزدى. مۇنداي قىزمەتتەردى سمارتفون ارقىلى قولجەتىمدى ەتۋ قاجەت», دەدى ءاليحان سمايىلوۆ.

پرەمەر-ءمينيستردىڭ ايتۋىنشا, جاستاردى جۇمىسپەن قامتۋدىڭ جاڭا تاسىلدەرى مەن مەحانيزمدەرىن ەنگىزۋگە ەرەكشە نازار اۋدارۋ كەرەك. جىل سايىن ەڭبەك نارىعىنا 300 مىڭعا جۋىق جاستار شىعادى. تيىسىنشە, ولاردىڭ جۇمىس تاجىريبەسى جوق.

ول ءبىرىنشى جارتىجىلدىقتىڭ قورىتىندىسى بويىنشا ۇلىتاۋ, شىعىس قازاقستان, قاراعاندى, قىزىلوردا, جامبىل جانە الماتى وبلىستارىندا NEET ساناتىنداعى جاستاردىڭ سانى كوپ ەكەنى ايتىلدى.

«اتالعان وبلىستاردىڭ اكىمدىكتەرى جاستاردى وقىتىپ, جۇمىسقا ورنالاستىرۋ ماسەلەسىن جەكە باقىلاۋعا السىن. جاستارعا جۇمىسپەن قامتۋعا جاردەمدەسۋ شارالارى تۋرالى جەتكىلىكتى اقپارات بەرىلمەيدى. سوندىقتان وسى باعىتتا اقپاراتتىق-ءتۇسىندىرۋ جۇمىسىن كۇشەيتۋ قاجەت», دەدى پرەمەر-مينيستر.

ەڭبەك جانە حالىقتى الەۋمەتتىك قورعاۋ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرى مەن اكىمدىكتەرگە جۇمىسپەن قامتۋ سالاسىنىڭ ينفراقۇرىلىمىن جاڭعىرتۋدى قامتاماسىز ەتۋ جانە جۇمىسپەن قامتۋ ورتالىقتارىنىڭ قىزمەتىن تولىق تسيفرلاندىرۋ تاپسىرىلدى.

ء«بىز جۇمىسپەن قامتۋ يدەولوگياسىن, قوعامداعى ەڭبەككە دەگەن كوزقاراستى وزگەرتۋىمىز كەرەك. ەڭبەك ادامىنىڭ وڭ ءيميدجىن, بارلىق كاسىپتەردىڭ قۇندىلىعىن قالىپتاستىرۋ ماسەلەلەرىن پىسىقتاۋ قاجەت», دەدى ءاليحان سمايىلوۆ.