جۋىردا قازاق كينووندىرىسىنە تاعى ءبىر فيلم قوسىلدى. جاڭا تۋىندى حاكىم اباي تۋرالى. جالپى, بۇعان دەيىن دە اقىن تۋرالى بىرنەشە كوركەم ءھام دەرەكتى فيلم تۇسىرىلگەن. بۇل دا سول دانىشپان ابايعا قول سوزعان كەزەكتى تىڭ تۋىندى. كۇنى كەشە عانا ەل استاناسىندا «ابايدىڭ سوڭعى كۇندەرى» دەرەكتى ءفيلمىنىڭ تۇساۋكەسەر ءراسىمى ءوتتى. ويشىلدىڭ اقىرعى كۇندەرى تۋرالى ءبىر سەريالى تاريحي كينو «حابار» اگەنتتىگى» اق تاپسىرىسىمەن ءتۇسىرىلىپ وتىر.
اقىن ومىرىندە ۇلى ماعاۋيانىڭ قازاسى سۇمدىق اۋىر بولعانىن بىلەمىز. باۋىر ەتى بالاسىنىڭ ولىمىنەن كەيىنگى اقىرعى قىرىق كۇنىن اباي قالاي وتكىزدى؟ نە كۇي كەشتى؟ نە ايتتى؟ فيلم جانە ستسەناري اۆتورلارى – جازۋشى-جۋرناليست قانات تىلەۋحان مەن ادەبيەتشى باعاشار تۇرسىنباي ۇلى وسى سۇراقتارعا جاۋاپ ىزدەپ, حاكىمنىڭ سوڭعى قىرىق كۇندەگى بەينەسى مەن رۋحاني احۋالىن كورسەتەدى.
ء«بىز اقىن ءومىرىنىڭ ءبىر كەزەڭىنە عانا توقتالدىق. 1904 جىلى بالاشاقپاق جايلاۋىنان ابايدىڭ سۇيەگى قايتتى. ءۋاسيلا ماعاۋياقىزىنىڭ ايتۋىنشا, حاكىمنىڭ دەمى بالاشاقپاقتاعى قىرىقوشاق دەگەن جەردە ۇزىلگەن. وسى قىرىقوشاقتا بولعان قايعىلى وقيعاعا دەيىنگى اقىننىڭ قىرىق كۇنى فيلمدە قامتىلعان. ابايدىڭ دانىشپان ەكەنىن ءبارىمىز بىلەمىز دە, قاراپايىم ادام ەكەنىن قاپەرگە الا بەرمەيتىن سياقتىمىز. ومىرىندە جاسىپ كورمەگەن, عاجايىپ قايرات, كەمەل اقىل يەسى وسپان, ءابىش قايتىس بولعاندا قاتتى كۇيزەلدى. بىراق ماعاۋيا ءتىرى بولاتىن. بار سۇيەنىشى, ءۇمىت ارتقانى قاسىندا بولدى. الايدا جاسىنان جابىسقان دەرت اقىرى ماعاشتى دا الىپ تىنادى. بۇل قازا اباي ومىرىندەگى ەڭ اۋىر سوققى بولدى. كورەرمەن قاۋىم اقىن بەينەسىن جاڭا قىرىنان كورىپ, ءومىرىنىڭ سوڭعى كۇندەرىندەگى رۋحاني ءحالىن تاني تۇسەدى دەپ ءۇمىت ەتەمىز», دەيدى قانات تىلەۋحان.
دەرەكتى فيلم كەيىپكەرلەرىمەن قۇندى بولماق. ولاردىڭ ءبارى اباي ەلىندە تۋعان, اقىن ءومىرىنىڭ شەجىرەلى قاتپارلارىنان حابارى بار ادامدار. مىسالى, ناستىلەك سامەنبەتوۆ – ابايدىڭ شاكىرتى, ءۋايىس شوندىباي ۇلىنىڭ جيەنى, شاعجان يساباەۆ – ايگىلى بەكەن يساباەۆتىڭ ۇلى, شەجىرەشى, قۇسمان بەرلەشوۆ – تاڭىربەردى قۇنانباي ۇلىنىڭ ۇرپاعى, ماناتاي بالتاقاي ۇلى – ىرعىزباي تۇقىمى. ايتا كەتەيىك, ءفيلمنىڭ رەجيسسەرى – بەكزات سماديار, پروديۋسەرى – اقىن سەرىك قاليەۆ.
«ابايدىڭ سوڭعى كۇندەرى» – «حابار» اگەنتتىگى بيىلعى جاڭا تەلەماۋسىمدا كورەرمەنگە ۇسىنىپ وتىرعان ءتۇرلى جانرداعى جۇزگە تارتا جوبانىڭ ءبىرى جانە بىرەگەيى. اگەنتتىكتىڭ تاپسىرىسىمەن اتالعان جوبانى قولعا العان بەلگىلى جۋرناليست, جازۋشى قانات تىلەۋحان بۇل تۋىندى ارقىلى بۇكىل قازاقتىڭ قايعىسىن ارقالاعان ۇلى اقىننىڭ سوڭعى 40 كۇندەگى ىشكى دۇنيەسىندەگى ارپالىسقا, تەرەڭ كۇيزەلىسكە نەگىز بولعان وقيعالار ارقىلى ۇڭىلەدى. كەيىپكەرلەردىڭ ايتۋىمەن كەيبىر تىڭ دەرەكتەردى اشىپ, كورەرمەنگە وي سالادى», دەدى «حابار» اگەنتتىگى» اق باسقارما توراعاسى بەرىك ءۋالي.
تىڭ تۋىندىنى كورەرمەندەر رەسپۋبليكا كۇنىنە وراي «حابار» تەلەارناسىنان تاماشالاي الادى.