پاۆلودار وبلىسىندا بالىقشىلار جوعالىپ كەتتى

8 قازان ەكىباستۇز پوليتسياسىنا 64 جاستاعى قالا تۇرعىنى جۇگىنىپ, ونىڭ 69 جاستاعى جۇبايىن ىزدەۋگە كومەك كورسەتۋدى سۇراعان.

ونىڭ ايتۋىنشا, 5 قازان ساعات 12:30 شاماسىندا ەر ادام ۋاز كولىگىن باسقارىپ, تانىسىمەن بىرگە بالىق اۋلاۋعا كەتكەن. سول ۋاقىتتان بەرى ولار ۇيىنە ورالماعان.

«بۇل ءوتىنىش تۇلعانىڭ جوعالۋى فاكتىسى بويىنشا سوتقا دەيىنگى تەرگەۋدىڭ بىرىڭعاي تىزىلىمىندە تىركەلدى. 9 قازاندا كۋتوياكسور كولىنىڭ جانىنان ۋاز كولىگى تابىلدى. تەكسەرۋ بارىسىندا كولىك يەسىنىڭ قۇجاتتارى, اقشاسى, ۇيالى تەلەفوندار, اۆتوكولىكتىڭ كىلتى ماشينانىڭ سالونىنان تابىلدى. كولىكتە رەزەڭكە قايىق بولمادى, بىراق قۇتقارۋ كەۋدەشەلەرى سول جەردە جاتتى. پوليتسيا اتالعان كول ماڭىنداعى ەكى ازاماتتىڭ كەتۋى ىقتيمال جەرلەردە جەدەل-ىزدەستىرۋ ءىس-شارالارى جۇرگىزىلىپ جاتىر», دەپ جازىلعان Polisia.kz تاراتقان حابارلامادا.

جەرگىلىكتى جەردە پوليتسيا, تج قىزمەتكەرلەرى, سۇڭگۋىرلەر, كينولوگتار مەن ەرىكتىلەر جۇمىس ىستەپ جاتىر.