سۋ – ءتىلسىز جاۋ. جاز باستالا سالا توتەنشە جاعدايلار دەپارتامەنتى ماماندارى سۋعا شومىلۋداعى قاۋىپسىزدىك ەرەجەلەرىن ءتۇسىندىرىپ, ەسكەرتۋ جاساۋمەن بولادى. سونىڭ وزىندە سۋعا باتىپ, قايتىس بولعاندار سانى از ەمەس. وبلىستا 1 قىركۇيەكتەن باستاپ شومىلۋ ماۋسىمى رەسمي تۇردە اياقتالىپ, جۋىقتا قۇتقارۋشى ماماندار جازداي اتقارعان جۇمىستارىن قورىتىندىلادى.
جاز ماۋسىمىندا تجد قىزمەتكەرلەرى 14 ادامدى, ونىڭ ىشىندە 2 بالانى سۋدان قۇتقارعان. قۇتقارۋشىلار جەرگىلىكتى اتقارۋشى ورگاندارى, پوليتسيا, ۆولونتەرلىك ۇيىمدارمەن بىرلەسىپ كۇن سايىن رەيد وتكىزدى. ۇزىن سانى 2 340 رەيد جۇرگىزىلىپ, 304 ەسكەرتۋ جانە تىيىم سالۋ بەلگىسى, 130 كورنەكى ستەند ورناتىلعان. دەمالۋشىلاردىڭ قاۋىپسىزدىگىن قامتاماسىز ەتۋ بويىنشا پاترۋلدەۋ ءۇشىن سامار اۋدانىندا كۇرشىم اۋىلىندا جانە كوگىلدىر بۇعاز جاعالاۋىندا ءموبيلدى بەكەتتەر جۇمىس ىستەدى. سونداي-اق وسكەمەن قالاسىنىڭ اۋماعىنا قۇتقارۋشىلاردىڭ جىلجىمالى بەكەتتەرى قويىلدى.
وبلىستىق تجد ازاماتتىق قورعانىس باسقارماسىنىڭ باسشىسى رۋسلان ورىنبەكوۆتىڭ مالىمەتىنشە, جاز مەزگىلىندە سۋ ايدىندارىندا 7 ادام سۋعا باتىپ كەتكەن.
– ستاتيستيكا كورسەتىپ وتىرعانداي, كوپ جاعدايدا قايعىلى وقيعا ادامنىڭ شامادان تىس وزىنە دەگەن سەنىمدىلىكتىڭ, كۇشىن اسىرا باعالاۋدىڭ, سۋداعى ءجۇرىس-تۇرىس ەرەجەلەرىن ەسكەرمەۋدىڭ, تىيىم سالىنعان جانە تەكسەرىلمەگەن جەرلەردە شومىلۋدىڭ, ماس كۇيدە بولۋدىڭ سالدارىنان ورىن العان. سۋعا باتقانداردىڭ بارلىعى 18-46 جاس ارالىعىنداعى ەر ادامدار, – دەيدى ر.ورىنبەكوۆ.
جاسالعان ساراپتامالىق ءىس-قاعازدارىنا ۇڭىلسەك, وقىس وقيعالار نەگىزىنەن دەمالىس كۇندەرى تىركەلگەن. جەتى ءولىمنىڭ ەكەۋى ۇلان اۋدانىنداعى كولدەردە بولعان. ال شومىلۋ ماۋسىمى باستالعالى كوپشىلىك دەمالاتىن ورىنداردا 189 قۇقىق بۇزۋشىلىق انىقتالدى: ورتاق سۋ پايدالانۋ قاعيدالارىن بۇزۋ بويىنشا – 80 ادام, الكوگولدىك ىشىمدىك ءىشىپ, قوعامدىق ورىنداردا ماس كۇيدە جۇرگەن 75 دەمالۋشى جاۋاپقا تارتىلدى.
جاۋاپقا تارتىلادى, ەسكەرتۋ جاسالادى. الايدا كەلەسى جىلى ءدال وسى وقيعالار قايتالانباسىنا كىم كەپىل؟! نەگە ءبىز وسى, قاراپايىم ەرەجەنى ەسكەرە بەرمەيمىز؟!
شىعىس قازاقستان وبلىسى