KWF كاراتە-دو كەكۋشينكايدان II ازيا چەمپيوناتى راحمەت وتەسىنوۆ اتىنداعى دەنە شىنىقتىرۋ-ساۋىقتىرۋ كەشەنىندە ءوتتى. اۋقىمدى سپورت دوداسىنىڭ جاڭاوزەندە وتكىزىلۋى تەگىن ەمەس, قازىرگى تاڭدا 161 487 مىڭ ادامعا مەكەن بولعان مۇنايلى قالادا سپورتتى دامىتۋعا كوڭىل بولىنگەن.
وسىنشا تۇرعىننىڭ ىشىنەن تۇراقتى تۇردە سپورتپەن 44 962 ادام شۇعىلدانادى. سپورتقۇمارلار ءۇشىن قالادا 18 سپورت نىسانى جۇمىس ىستەيدى جانە مەملەكەتتىك باعدارلاما اياسىندا دەمەۋشىلەردىڭ قولداۋىمەن انگارلىق ۇلگىدەگى 6 كوپفۋنكتسيونالدى سپورت زالىنىڭ جانە 2 سپورت كەشەنىنىڭ قۇرىلىسى جۇرگىزىلىپ جاتىر. ال جاڭاوزەندە 2007 جىلى جۇمىسىن باستاعان كاراتە-دو كەكۋشينكاي ۇيىرمەسىندە قازىرگى تاڭدا 400-دەن استام سپورتشىنى 5 جاتتىقتىرۋشى جاتتىقتىرادى. وسى ۋاقىتقا دەيىن 159 رازريادتى سپورتشى, 50 قازاقستان رەسپۋبليكاسىنىڭ سپورت شەبەرىنە ۇمىتكەر, 10 قازاقستان رەسپۋبليكاسىنىڭ سپورت شەبەرى, 2 حالىقارالىق دارەجەدەگى سپورت شەبەرى شىقتى. 2013 جىلى بەك ومىرزاق جانە مۇرات جاۋمىتباەۆ باكۋ قالاسىندا وتكەن الەم چەمپيوناتىندا كاراتە-دو كەكۋشينكايدان الەم چەمپيونى اتانسا, امانقان قىدىرجان ەكى دۇركىن الەم چەمپيونى اتاندى.
سپورت سالاسىندا اۋىز تولتىرىپ ايتارلىق جەڭىسى بار, ەل قورجىنىنا ۇلەس سالعان جاڭاوزەندە وتكەن ازيا چەمپيوناتىنىڭ اشىلۋ سالتاناتىنا ماڭعىستاۋ وبلىسىنىڭ اكىمى نۇرلان نوعاەۆ, حالىقارالىق كاراتە فەدەراتسياسىنىڭ پرەزيدەنتى راميل گابباسوۆ, پولشادان ارنايى كەلگەن KWF حالىقارالىق فەدەراتسياسىنىڭ باس حاتشىسى, قارا بەلبەۋ 9-دان يەگەرى اندجەي درەۆنياك, ءتورت دۇركىن الەم چەمپيونى جانە قازاقستاننىڭ ەڭبەك سىڭىرگەن سپورت شەبەرى يليا يلين, «اق جول» پارتياسى ماڭعىستاۋ وبلىستىق فيليالىنىڭ توراعاسى, ماڭعىستاۋ وبلىستىق ءماسليحاتىنىڭ دەپۋتاتى جاڭبىرباي ماتاەۆ قاتىستى.
– ازيا چەمپيوناتىن ۇيىمداستىرۋشىلار – كاراتە-دو كەكۋشينكاي فەدەراتسياسىنا جانە ءىس-شاراعا قولداۋ كورسەتكەن دەمەۋشىلەرگە العىسىمدى بىلدىرگىم كەلەدى. مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا بۇقارالىق سپورتتى دامىتۋعا ەرەكشە نازار اۋدارۋ, سپورتتى حالىق اراسىندا تانىمال ەتۋ, بالالار مەن جاستاردى سپورت سەكتسيالارىنا تارتۋ بويىنشا ناقتى قادامدار جاساۋ قاجەتتىگىن اتاپ ءوتتى. وسىنداي جوعارى دەڭگەيدەگى سپورتتىق جارىستار جاڭاوزەندە العاش رەت ۇيىمداستىرىلىپ وتىر. بۇل ءىس-شارانىڭ ەلىمىز, ءوڭىرىمىز, قالامىز ءۇشىن ماڭىزى زور. وبلىستا, اۋداندا جانە قالادا وسىنداي ماڭىزدى ءىرى جارىستار وتكىزۋ حالىقتىڭ سپورتقا دەگەن قىزىعۋشىلىعىن ارتتىرادى جانە ءوز كەزەگىندە سپورتتىڭ دامۋىنا ۇلكەن ۇلەس قوسادى. چەمپيوناتقا قاتىساتىن سپورتشىلارعا ساتتىلىك تىلەيمىن, – دەدى نۇرلان نوعاەۆ.
قازاقستان, يران, تاجىكستان, اۋعانستان, وزبەكستان, قىرعىزستان, ساۋد ارابياسى, رەسەي – بارلىعى 8 ەلدەن 400-گە جۋىق سپورتشى قاتىسقان سايىس تارتىستى ءوتتى.
– ءبىز ماسكەۋدەن كەلدىك. ءبىز وسى ەلگە ءتۇرلى جيىندارعا ءجيى كەلەمىز, قازاقستان سپورتشىلارى دا ءبىزدىڭ ءىس-شارالارىمىزعا ءجيى قاتىسادى. كوماندامىزدا 12 سپورتشى بار, ولاردىڭ اراسىنان ءارتۇرلى سالماق دارەجەسىندەگى كەيبىر سپورتشىلار جارتىلاي فينالعا شىقتى. بۇل سپورت تۇرىنەن الەمدىك دەڭگەيدە ءبىزدىڭ باستى قارسىلاسىمىز – قازاقستان. بىرنەشە جىل بۇرىن ازيا چەمپيوناتى استانادا ءوتتى. اقتىق جەكپە-جەكتە 14 ساناتتىڭ 12-سىندە رەسەي مەن قازاقستان كوماندالارى كەزدەسكەن بولاتىن. بۇگىنگى چەمپيوناتتىڭ اۋقىمى كەڭ. ءبىزدى قالا حالقىنىڭ, جانكۇيەرلەردىڭ جىلى قارسى العانى قۋانتادى, – دەدى حالىقارالىق كاراتە فەدەراتسياسىنىڭ پرەزيدەنتى راميل گابباسوۆ.
جارىس قورىتىندىسى بويىنشا 1-ورىندى قازاقستان سپورتشىلارى, 2-ورىندى ساۋد ارابياسى يەلەندى, كوماندالىق ەسەپتە 3-ورىندى قىرعىزستان مەن تاجىكستان ءوزارا ءبولىستى.
ماڭعىستاۋ وبلىسى