مەملەكەت باسشىسى قاسىم-جومارت توقاەۆ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى. بيىل 20 قاراشا كۇنى سايلاۋ وتەدى. الداعى سايلاۋ – 2019 جىلدان بەرى قولعا الىنعان ساياسي رەفورمالاردىڭ جۇيەلى جالعاسى.
بىرىنشىدەن, بۇل جاڭا ترانسفورماتسيالىق كەزەڭدە العاش وتەتىن پرەزيدەنتتىك سايلاۋ بولماق. بۇل – ونىڭ باستى ەرەكشەلىگى. ول سونىسىمەن ماڭىزدى.
ەكىنشىدەن, بۇل سايلاۋدىڭ ناتيجەسىندە دەپۋتاتتاردىڭ باستاماسىمەن پرەزيدەنت لاۋازىمىن ءبىر رەتتىك مەرزىممەن شەكتەۋ تۋرالى نورما ىسكە قوسىلادى. ول ءوز كەزەگىندە اتقارۋشى بيلىكتىڭ ەڭ باستى سۋبەكتى سانالاتىن پرەزيدەنت ينستيتۋتىنىڭ قىزمەتىن رەفورمالايتىن تۇبەگەيلى وزگەرىس. بۇل جاڭاشىلدىق بيلىك تارماقتارى اراسىنداعى تەپە-تەڭدىكتى قامتاماسىز ەتۋدە شەشۋشى ءرول اتقارادى.
ۇشىنشىدەن, بۇل سايلاۋ ەلدەگى ترانسفورماتسيالىق پروتسەستەردىڭ ديناميكاسىن جوعالتپاي, بارلىق وزگەرىستەردى لوگيكالىق جالعاستىقپەن جۇرگىزۋگە مۇمكىندىك بەرەدى.
سونداي-اق قازىر الەمدە گەوساياسي جانە گەوەكونوميكالىق ماسەلەلەردىڭ ۋشىعىپ جاتقانى جاسىرىن ەمەس. قاراما-قايشىلىقتار مەن قاقتىعىستار كوبەيىپ جاتىر. وسىنداي ساتتە ساياسي جۇيەنى تولىقتاي جاڭارتىپ, ونى قايتا ىسكە قوسۋ پرەزيدەنت قاسىم-جومارت توقاەۆتىڭ باستى ماقساتى. سەبەبى ءبىز قازىرگى زاماننىڭ بارلىق سىن-قاتەرلەرىنە قارسى تۇرا الاتىن, ءتيىمدى, جانە ەڭ باستىسى بۇكىل قوعامنىڭ تالاپ-تىلەكتەرى مەن ماقسات-مۇددەلەرىنە ساي كەلەتىن ساياسي مودەلدى جاساپ شىعۋعا جول تابامىز.
بيىلعى سايلاۋ 2024 جانە 2025 جىلدارى جاڭا سايلاۋ كامپانيالارىنا الاڭداماي, دامۋ قارقىنى مەن رەفورمالار كۋرسىن ساقتاپ, الەۋمەتتىك-ەكونوميكالىق وزگەرىستەردى قولعا الۋعا جاعداي جاسايدى.
مەملەكەت باسشىسى الداعى سايلاۋعا بايلانىستى قازاقستان حالقىنا ۇندەۋ جولداپ: «بۇل ناۋقان ەلدىڭ بۇكىل ساياسي جۇيەسىن تۇبەگەيلى وزگەرتەتىن سايلاۋ كەزەڭىن باستاپ بەرەدى. سول ارقىلى ەكونوميكانى تۇراقتى دامىتۋدى, حالىقتىڭ ءال-اۋقاتىن ارتتىرىپ, تۇرمىس ساپاسىن جاقسارتۋدى كوزدەيتىن ۇزاق مەرزىمدى مىندەتتەردى جۇزەگە اسىرۋعا مۇمكىندىك تۋادى», دەپ اتاپ ءوتتى.
Amanat پارتياسى پرەزيدەنت قاسىم-جومارت توقاەۆتىڭ قوعامدىق تىرەگى رەتىندە مەملەكەت باسشىسىنىڭ بۇل باستاماسى مەن ۇستانعان باعىتىنا قولداۋ ءبىلدىرىپ, ونى جۇزەگە اسىرۋ جولىندا ايانباي ەڭبەك ەتەدى.
پرەزيدەنتىمىز سايلاۋدىڭ ىشكى مازمۇنى مەن اشىقتىعى جونىندە ءوز ۇندەۋىندە: «مەن مەملەكەت باسشىسى رەتىندە سايلاۋ ناۋقانى قاتاڭ تۇردە زاڭعا سايكەس وتەتىنىنە كەپىلدىك بەرەمىن. ونى وتاندىق جانە شەتەلدىك بايقاۋشىلاردىڭ قاتىسۋىمەن ءادىل ءارى اشىق وتكىزەتىن بولامىز», دەپ مالىمدەدى.
قازاق ەلى ءوز تاريحي دامۋ جولىنىڭ جاڭا بەلەسىنە كوتەرىلىپ كەلەدى. الدىمىزدا ۇلكەن ماقسات-مىندەتتەر تۇر. وسىنداي ەل ءومىرى ءۇشىن وتە ماڭىزدى ءارى جاۋاپتى ساتتە Amanat پارتياسى ءوزىنىڭ قوعامدىق جانە ساياسي ميسسياسىن ابىرويمەن اتقارۋعا بار كۇش-جىگەرىن سالادى.
اسحات ورالوۆ,
Amanat پارتياسىنىڭ اتقارۋشى حاتشىسى