مەملەكەت باسشىسى قاسىم-جومارت توقاەۆ اباي وبلىسىنىڭ حالقىمەن كەزدەسىپ, ءوڭىردىڭ دامۋىنا قاتىستى ماسەلەلەردى ايقىنداپ, ناقتى مىندەتتەردى بەلگىلەدى.
شاكارىم ۋنيۆەرسيتەتى اباي وبلىسىنىڭ ىرگەلى جوعارى وقۋ ورنى جانە ءىرى الەۋمەتتىك ينستيتۋت رەتىندە قوعام الدىندا اسا جاۋاپتى ءرول اتقارادى. وقۋ ورداسى دارىندى جاستاردىڭ وڭىردە ءبىلىم الۋىنا, قولداۋ كورسەتۋگە ءاردايىم ەرەكشە ءمان بەرەدى. ۋنيۆەرسيتەت جىل سايىن «التىن بەلگى» يەگەرلەرىنە, پاندىك وليمپيادا مەن عىلىمي كونكۋرس جەڭىمپازدارىنا «شاكارىم گرانتىن» تاعايىنداپ كەلەدى. وسى ورايدا پرەزيدەنتتىڭ وبلىستاعى جوعارى وقۋ ورىندارىنا قوسىمشا 500 گرانت ءبولۋ تاپسىرماسى ءوڭىر جاستارىنا ۇلكەن قولداۋ دەپ ەسەپتەيمىن.
مەملەكەت باسشىسى وڭىرگە ساپارى كەزىندە سەمەيدەگى ۋنيۆەرسيتەتتەردىڭ جانىنان IT سالاسى مەن تىلدەردى تەرەڭدەتىپ وقىتاتىن مەكتەپتەر اشۋ قاجەت ەكەندىگىن باسا ايتتى. اتالعان تاپسىرمانى ورىنداۋعا شاكارىم ۋنيۆەرسيتەتى ءازىر.
كۇنى كەشە ۋنيۆەرسيتەت جانىنان Shakarim high school جۇمىسىن جۇرگىزۋگە ليتسەنزيا الىنعانىن قۋانا حابارلايمىز. سونداي-اق تاياۋ كۇندەرى مەملەكەت باسشىسىنىڭ تاپسىرماسىندا بەلگىلەنگەن سالالار بويىنشا وقۋشىلار قابىلداۋدى باستايمىز.
تاعى ءبىر ەكپىن تۇسىرىلگەن ماسەلە – تۇلعا تاربيەسى. وسى باعىتتا پرەزيدەنت حاكىم ابايدىڭ «تولىق ادام» تۇجىرىمداماسىنا سۇيەنە وتىرىپ, قوعامدا جاڭا قۇندىلىقتار ورنىقتىرۋ قاجەتتىگىن باسا ايتتى.
شاكارىم شاڭىراعىنىڭ دا بۇگىنگى ميسسياسى – ۇلتتىق قۇندىلىقتاردى بويىنا سىڭىرگەن بىلىكتى مامان دايىنداپ, كەمەل تۇلعا, ياعني اباي ايتقان تولىق ادامدى قالىپتاستىرۋ. ويتكەنى ۇلتتىق قۇندىلىقتارىن بويىنا سىڭىرگەن ءار تۇلعا, ەرتەڭ مەكتەپ نەمەسە ۋنيۆەرسيتەت بىتىرگەننەن كەيىن شەتەل اسىپ كەتسە دە تۋعان ەلىنە, جەرىنە قىزمەت ەتىپ, ەلگە قايتىپ ورالادى.
دەمەك, پرەزيدەنت اتاعان جوبالار شاكارىم ۋنيۆەرسيتەتىنىڭ اياق الىسىمەن ءدوپ كەلىپ, دامۋ قارقىنىن ەسەلەتە تۇسۋدە.
باۋىرجان ەردەمبەكوۆ,
شاكارىم ۋنيۆەرسيتەتىنىڭ رەكتورى
اباي وبلىسى