اۋىل وقۋشىلارىنا تالدىقورعان قالاسىنداعى نازارباەۆ زياتكەرلىك مەكتەبىنىڭ جاس ەرىكتىلەرى اعىلشىن ءتىلىن ۇيرەتەدى.
ءتورت جىلدان بەرى شىمىر اۋىلىنداعى مانشۇك مامەتوۆا اتىنداعى ورتا مەكتەپتىڭ وقۋشىلارىنا اپتاسىنا ەكى رەت اعىلشىن ءتىلى وقىتىلاتىن English club الەۋمەتتىك جوباسى ۇيىمداستىرىلىپ كەلەدى. بۇگىندە جوبانى 10 ە سىنىپ وقۋشىلارى ءساتتى جۇرگىزىپ جاتىر. وقىتۋ ويىن جانە جاتتىعۋ تۇرىندە وتۋدە.
English club جوباسى اۋىل وقۋشىلارىنىڭ ءبىلىم ولقىلىقتارىن تولتىرۋعا, تىلدىك كەدەرگىنى جەڭۋگە كومەكتەسەدى جانە شەت تىلدەرىن ودان ءارى وقۋعا ىنتالاندىرادى», دەيدى جوبا ۇيلەستىرۋشىسى, 10-سىنىپ وقۋشىسى ءمادينا شاحانوۆا.
م.مامەتوۆا اتىنداعى ورتا مەكتەپتىڭ 8-سىنىپ وقۋشىسى ايزەرە عيزات اعىلشىن ءتىلى ساباعىنا ەكىنشى جىل قاتىسىپ كەلەدى. وسى ۋاقىت ىشىندە ول قاراپايىم ءبىلىمدى عانا ەمەس, ماتىندەردى ءوز بەتىمەن جازۋدى دا ۇيرەندى. بۇل ول ءۇشىن ۇلكەن قادام.
«جوبا ارقىلى قاجەتتى ءبىلىم الۋعا مۇمكىندىك الدىق. جاسىراتىنى جوق, اعىلشىن ءتىلىن ءبىلۋ ەلىمىزدەگى جانە الەمنىڭ ۇزدىك ۋنيۆەرسيتەتتەرىنە جول اشادى», دەيدى ايزەرە.
بيىلعى وقۋ جىلىندا English club جوباسىنا شىمىر اۋىلدىق مەكتەبىنەن 40 وقۋشى قاتىسادى. بۇگىندە العاشقى ساباقتار ءوتتى, الداعى ۋاقىتتا قىزىقتى, تانىمدىق, ەڭ باستىسى قاجەت اعىلشىن ءتىلى ساباقتارى ءوز جالعاسىن تابادى. ايتا كەتەيىك, 2018 جىلى تالدىقورعان قالاسىنداعى نازارباەۆ زيتياكەرلىك مەكتەبى مەن شىمىر اۋىلىنداعى م.مامەتوۆا اتىنداعى ورتا مەكتەپ اراسىندا ءوزارا ىنتىماقتاستىق تۋرالى مەموراندۋمعا قول قويىلعان بولاتىن.
جەتىسۋ وبلىسى