كەزەكتەن تىس پرەزيدەنت سايلاۋىن وتكىزۋگە 20,5 ملرد تەڭگە ءبولىندى. بۇل تۋرالى قارجى ۆيتسە-ءمينيسترى ەرجان ءبىرجانوۆ وكق بريفينگىندە مالىمدەدى, دەپ حابارلايدى Egemen.kz.
«سايلاۋدى وتكىزۋگە 20,5 ملرد تەڭگە قاراستىرىلعان. بۇل سوما بەكىتىلدى, ۇكىمەت رەزەرۆىنەن اقشا ءبولىنىپ جاتىر», دەدى ەرجان ءبىرجانوۆ جۋرناليستەردىڭ سۇراقتارىنا جاۋاپ بەرە وتىرىپ.
ۆيتسە-مينيستر 16,8 ملرد تەڭگە كولەمىندەگى نەگىزگى قاراجات ەڭبەكاقى تولەۋگە جۇمسالاتىنىن ناقتىلادى.
«جەرگىلىكتى جەرلەردە سايلاۋ ۋچاسكەلەرى قۇرىلادى. ال جالاقى ەڭ تومەنگى ءۇش ايلىق جالاقىدان كەم بولماۋى ءتيىس, بۇل - 180 مىڭ تەڭگە», دەپ ءتۇسىندىردى ەرجان ءبىرجانوۆ.
بۇعان دەيىن حابارلانعانداي, قر ورتالىق سايلاۋ كوميسسياسى «مەملەكەت باسشىسىنىڭ كەزەكتەن تىس سايلاۋىندا قازاقستان رەسپۋبليكاسى پرەزيدەنتتىگىنە كانديداتتىڭ رەسپۋبليكالىق بيۋدجەت قاراجاتىنان وتەلەتىن شىعىستارىنىڭ مولشەرىن بەلگىلەۋ تۋرالى» قاۋلى قابىلداعان ەدى.
قۇجاتقا سايكەس, قازاقستان رەسپۋبليكاسىنىڭ پرەزيدەنتتىگىنە كانديدات شىعىستارىنىڭ مولشەرى 10 312 600 تەڭگە كولەمىندە بەلگىلەنگەن:
تەلەديدار جانە راديو بويىنشا سايلاۋ باعدارلامالارىن ۇسىنۋ, سونداي-اق مەرزىمدى باسپا باسىلىمدارىندا 2 ماقالا جاريالاۋ - 9 012 600 تەڭگە; سايلاۋ الدىنداعى جاريا ءىس-شارالاردى وتكىزۋ جانە ۇگىت ماتەريالدارىن شىعارۋ - 800 000 تەڭگە; كولىك شىعىندارى - 500 000 تەڭگە.