ون ساۋساعىنان ونەرى تامعان زويا, زينا مەن رايا قۋانىشقاليەۆالار ماحامبەت اۋدانىنىڭ بەيبارىس اۋىلىندا تۇرادى. اعايىندىلار مەرينوس قويىنىڭ جۇنىنەن قازاقى ويۋ سالىنعان تەكەمەت باسىپ, قولونەر بۇيىمدارىن جۇرتشىلىققا ۇسىنىپ وتىر.
ولاردىڭ اعاسى بولەكباي – اعاش شەبەرى. قۋانىشقاليەۆتەر وتباسىنا ۇلتتىق قولونەرگە بەيىمدىلىك اتا-اناسىنان دارىعان ەكەن. قازىر ولار مەملەكەتتەن گرانت الىپ, ۇمىت بولا باستاعان ۇلتتىق قۇندىلىقتاردى قايتا جاڭعىرتۋعا بەل شەشە كىرىسكەن.
– ءبىزدىڭ انامىز قولونەردىڭ شەبەرى بولاتىن. تەكەمەت باسىپ, تەرمە الاشا مەن كيىمدەر توقيتىن ەدى. انامىزدىڭ بۇل ونەرىن بىزگە اپايىمىز زويا ۇيرەتىپ ءجۇر. ونىڭ ماقساتى – اجەلەرىمىزدەن بۇگىنگە جەتكەن اسىل ونەردى, ۇلتتىق قۇندىلىعىمىزدى دارىپتەۋ. ءسىڭىلىم رايا – تىگىنشى. ۇلتتىق ناقىشپەن پەردەلەر تىگەدى, قولونەردى جاقسى كورەدى. اكەمىزدىڭ اعاشتان ءتۇيىن تۇيگەن شەبەرلىگى ۇلدارعا جۇعىستى بولدى. مال شارۋاشىلىعىمەن اينالىسقان اكەمىز اعاشتان ءتۇرلى بۇيىم جاساۋشى ەدى. ەندى ونىڭ وسى ءىسىن اعامىز بولەكباي جالعاستىرىپ كەلەدى, – دەيدى زينا قۋانىشقاليەۆا.
قولونەر شەبەرىنىڭ ايتۋىنشا, قازىر كيىزدەن جاسالعان بۇيىمدارعا سۇرانىس ارتا تۇسكەن. زينا قۋانىشقاليەۆانىڭ كۇيەۋى اسىلبەك راحمەتوۆ تە – اعاش شەبەرى. ايالاپ وسىرگەن قىزدارى – ايدانا مەن اياگوزدىڭ دە اڭسارى ۇلتتىق قۇندىلىقتى اسپەتتەۋگە اۋىپ وتىر. قازىر ولار ءىس تىگەدى, قولونەر بۇيىمدارىن جاسايدى.
اتىراۋ وبلىسى