«ادامنىڭ ءبىر قىزىعى – بالا دەگەن». دانا اباي ايتقانداي, اتا-انا ءۇشىن ءار بالانىڭ ءجونى بولەك-اۋ. ويتكەنى ۇرپاق – ادام ءومىرىنىڭ جالعاسى.
ال ومىرگە ەگىز, نە ۇشەم كەلسە شە؟ اتا-انا قۋانىشى ودان سايىن ەسەلەنە تۇسەدى. قۇرمانعازى اۋدانىندا س.كوشەكباەۆ اتىنداعى مادەنيەت ۇيىندە ادەتتەگىدەن وزگەشە ءىس-شارا ءوتتى. ەرەكشە دەيتىنىمىز, العاش رەت قولعا الىنعان ەگىزدەر شەرۋىنە 48 ەگىز بەن ءبىر ۇشەم قاتىستى. ساحناعا قول ۇستاسا شىققان 99 بالانىڭ ءبارى دە ونەرلى ەكەن. دوڭگەلەنە بي بيلەدى, اۋەلەتە ءان سالدى.
مادەنيەت ءۇيىنىڭ ديرەكتورى جالعاس ساعىندىقوۆتىڭ ايتۋىنشا, بۇل – اۋدان تاريحىنداعى ەگىزدەردىڭ قاتىسۋىمەن وتكەن العاشقى ءىس-شارا. سول سەبەپتەن ەگىزدەر مەن ۇشەمگە ەرەكشە قۇرمەت كورسەتىلدى.
– بۇل شەرۋدى وتكىزۋدەگى باستى ماقساتىمىز – اۋدانداعى ەگىزدەردى جۇرتشىلىققا تانىستىرۋ. ءسويتىپ, ەگىزدەردى كورسەتۋ ارقىلى تۇرعىنداردىڭ كوپبالالى بولۋعا ىنتاسىن وياتۋدى كوزدەدىك. بۇدان بىلاي ەگىزدەر مەن ۇشەمنىڭ اراسىندا شىنايى دوستىق نىعايىپ, ءبىر-بىرىمەن ارالاسىپ تۇرعانىن قالايمىز, – دەيدى ج.ساعىندىقوۆ.
ەگىزدەر مەن ۇشەمگە ءتىلى ءدام ۇيىرەتىن تاتتىلەر مەن «تاماشا» ويىن-ساۋىق كەشەنىنە سەرتيفيكات بەرىلدى.
اتىراۋ وبلىسى