بيىلعى جولداۋدا زاڭگەر رەتىندە مەن ءۇشىن پرەزيدەنتىمىزدىڭ سوت جۇيەسىن جەتىلدىرۋگە قاتىستى قاعيداتتارى وتە ماڭىزدى. مەملەكەت باسشىسى قۇجاتتىڭ بەسىنشى باعدارىندا زاڭ مەن تارتىپكە قاتىستى وزەكتى ماسەلەلەردى ايتا كەلىپ, قوعامدا زاڭ ۇستەمدىگى بەرىك ورنىعىپ, سوت تورەلىگى ءادىل اتقارىلۋى قاجەتتىگىن ءسوز ەتتى.
«سۋديالاردىڭ دەربەستىگىن ارتتىرۋ ءۇشىن جوعارعى سوت كەڭەسىنىڭ مارتەبەسىن نىعايتقان دۇرىس», دەدى پرەزيدەنت. ال سۋديا بولۋعا ۇمىتكەرلەردى دايارلاۋ, بىلىكتىلىگىن كوتەرۋ جۇمىسى كەڭەستىڭ قۇزىرەتىنە بەرىلەدى. «سونداي-اق ولاردىڭ شەكتى جاسىن ۇزارتۋ, وكىلەتتىگىن توقتاتۋ ماسەلەسىمەن دە وسى مەكەمە اينالىسادى. بۇل مەملەكەتتىك ورگان ناقتى كادرلىق فۋنكتسياسى بار, تولىققاندى ينستيتۋتقا اينالۋى كەرەك. كادرلاردى ىرىكتەۋدەن باستاپ, بارلىق دەڭگەيدەگى سوتتاردى تاعايىنداۋعا ۇسىنىم بەرۋگە دەيىنگى بۇكىل مىندەت سولارعا جۇكتەلەدى», دەپ اتاپ كورسەتتى ق.توقاەۆ جولداۋدا.
بىرىنشىدەن, بۇل مەملەكەت باسشىسىنىڭ جاقىن ارادا سۋديالار كورپۋسىن قايتا ىرىكتەۋ جانە جاڭارتۋ قاجەتتىگى تۋرالى ۇسىنىسىنا توقتالساق. بۇگىنگى تاڭدا قازاقستانعا جاڭا كادرلار مەن جاڭا تۇلعالار قاجەت.
سونداي-اق پرەزيدەنتتىڭ ەلىمىزدەگى بارلىق سۋديانىڭ مارتەبەسىن تەڭەستىرۋ تۋرالى ايتقانى دا دەر كەزىندە جاسالعان قاجەتتى ۇسىنىس دەپ سانايمىن. بۇل سوت تورەلىگىنىڭ شىنايى تاۋەلسىزدىگىنە قول جەتكىزۋدى قامتاماسىز ەتەتىن باتىل قادام دەۋگە بولادى.
قولدانىستاعى زاڭناما بويىنشا بارلىق سۋديا مانتيا يەلەرى سانالادى جانە قازاقستان رەسپۋبليكاسىنىڭ اتىنان سوت تورەلىگىن جۇزەگە اسىرادى. سوندىقتان قازاقستاننىڭ بارلىق سۋدياسىنىڭ مارتەبەسىن زاڭنامالىق تۇرعىدان تەڭەستىرۋ قاجەت. وعان الەمنىڭ وزىق ەلدەرىنىڭ سوت تورەلىگى ساپاسىنىڭ وڭ تاجىريبەسى جارقىن دالەل دەۋگە بولادى.
وسى باعىتتىڭ زاڭدى جالعاسى رەتىندە سوت توراعالارى لاۋازىمدارىنىڭ كوبىن سۋديا لاۋازىمىنا اۋىستىرۋ تۋرالى قيسىندى قاعيدا تۋىندايدى. سوت توراعالارى دا باسقا سۋديالار سياقتى سوت تورەلىگىن جۇزەگە اسىرادى جانە سوت ىستەرىن قارايدى.
ءدال قازىرگى ۋاقىتتا پرەزيدەنتتىڭ تەك سۋديالاردىڭ وزدەرى دەموكراتيالىق جولمەن, كونكۋرستىق نەگىزدە سوت توراعالارىن جانە ءارتۇرلى دەڭگەيدەگى سوت القاسىنىڭ توراعاسىن سايلاۋعا قۇقىعى بار ءۇردىستى ەنگىزۋ تۋرالى ۇسىنىسىن جۇزەگە اسىرۋ شىنايى قاجەتتىلىكتەن تۋىنداپ وتىر. بۇل, ەڭ الدىمەن, سۋديالاردىڭ وزدەرى ءۇشىن ىڭعايلى ەكەنى ءسوزسىز.
ءبىزدىڭ زاڭ سالاسىنىڭ تاريحىندا العاش رەت جوعارى ساتىداعى سۋديالاردى – جوعارعى سوتتى سايلاۋ ۇسىنىلىپ وتىر. بۇل قازىرگىدەي سەناتتىڭ بەكىتۋى ەمەس, ناقتىلاپ ايتقاندا, پرەزيدەنت ۇسىنعان كانديداتتاردان بالاما نەگىزدە سايلاۋ بولىپ سانالادى.
بۇدان بيلىكتىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تەپە-تەڭدىك ارەكەتىن كورۋگە بولادى. ارينە, سۋديالار كورپۋسى جاڭارتۋدى, سونىڭ ىشىندە يۋريسپرۋدەنتسيانىڭ باسقا سالاسىنان جوعارى بىلىكتى مامانداردى تارتۋدى قاجەت ەتەدى.
سوندىقتان مەملەكەت باسشىسىنىڭ بۇل سالاعا مىقتى زاڭگەرلەردى تارتۋ ءۇشىن ماتەريالدىق جاعداي جاساۋ قاجەتتىگى تۋرالى ۇسىنىسىن ۋاقىت تالابى دەپ سانايمىن. وزدەرىڭىز بىلەتىندەي, ەندى پرەزيدەنتتىڭ بۇل ۇسىنىستارىن جان-جاقتى مەڭگەرىپ, ساپالى زاڭ دەڭگەيىندە جۇزەگە اسىرۋ قاجەت.
ءنازيلا راززاق,
ءماجىلىس دەپۋتاتى