پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا ەگىن جيناۋ ناۋقانىنىڭ الدىن الا قورىتىندىلارى قارالدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
اۋىل شارۋاشىلىعى ءمينيسترى ەربول قاراشوكەەۆتىڭ حابارلاۋىنشا, بيىل اۋىل شارۋاشىلىعى داقىلدارىنىڭ جالپى جيناۋ الاڭى 23,4 ملن گەكتاردى قۇرادى. ونىڭ ىشىندە استىق جيناۋ الاڭى 16,1 ملن گا قۇرايدى.
ونىڭ سوزىنشە, قولايلى جاعدايلار ەگىن جيناۋ ناۋقانىنىڭ كوپ بولىگىن ءۇزىلىسسىز وتكىزۋگە مۇمكىندىك بەردى. ناتيجەسىندە بۇگىنگى كۇنى رەسپۋبليكا بويىنشا بارلىعى 15,4 ملن گا ءداندى جانە ءداندى-بۇرشاقتى داقىلدار نەمەسە جالپى ەگىن جيناۋ الاڭىنىڭ 96,3% جينالدى. ورتاشا تۇسىمدىلىك گەكتارىنا 13,0 تسەنتنەر كولەمىندە 20,1 ملن توننا استىق باستىرىلدى.
داقىلدار بولىنىسىندە قارايتىن بولساق, 12,6 ملن گەكتار القاپتان بيداي, 1,4 ملن گا جەردەن مايلى داقىلدار, 164,5 مىڭ گەكتاردان كارتوپ, 149,6 مىڭ گا القاپتان كوكونىس داقىلدارى جينالدى.
اۋىل شارۋاشىلىعى ءمينيسترى الەۋمەتتىك ماڭىزى بار داقىلداردىڭ بولجامدى جالپى جينالىمى رەسپۋبليكانىڭ ىشكى قاجەتتىلىگىن قامتاماسىز ەتۋگە مۇمكىندىك بەرەتىنىن اتاپ ءوتتى. وسى جىلدىڭ قولايلى جاعدايلارى ەگىننىڭ ساپاسىنا وڭ اسەر ەتتى.
سونداي-اق اقمولا وبلىسىنىڭ اكىمى ەرمەك مارجىقپاەۆ, قوستاناي وبلىسىنىڭ اكىمى ارحيمەد مۇحامبەتوۆ, سولتۇستىك قازاقستان وبلىسىنىڭ اكىمى قۇمار اقساقالوۆ بايانداما جاسادى.
پرەمەر-ءمينيستردىڭ ايتۋىنشا, ەگىن وراعى اياقتالىپ قالدى. ءتۇسىم ورتاشا جىلدىق كورسەتكىشتەن جوعارى بولادى دەپ كۇتىلۋدە. جالپى 18 ملن توننادان استام استىق جيناۋ جوسپارلانۋدا.
«ەندىگى مىندەت – ءونىمنىڭ ساپاسىن تومەندەتپەي, دۇرىس ساقتاۋ. سونىمەن قاتار ىشكى سۇرانىسقا جانە ەكسپورتقا قاجەتتى استىق كولەمىن ناقتى ءبولىپ قويۋ كەرەك. بيىل دا قازاقستان ءوزىن استىقپەن تولىقتاي قامتاماسىز ەتتى», دەدى ءاليحان سمايىلوۆ.
پرەمەر-مينيستر ونىمدىلىكتىڭ وڭ ديناميكاسىن اتاپ ءوتتى. وتكەن جىلى ورتا ەسەپپەن گەكتارىنا 9,8 تسەنتنەر ءونىم جينالسا, بيىل 13 تسەنتنەردى قۇراپ وتىر, بۇل 30%-عا جوعارى.
«بۇل دا بولسا – ديحاندارىمىزدىڭ تىنىمسىز ەڭبەگىنىڭ جەمىسى. وسى ىسكە اتسالىسقان اۋىل ەڭبەككەرلەرىن مول ءونىم جيناۋىمەن قۇتتىقتاپ, قاجىرلى ەڭبەكتەرى ءۇشىن العىس ايتامىز», دەدى ول.
پرەمەر-مينيستر استىق جيناۋ جۇمىستارىن تەز ارادا تولىقتاي اياقتاپ, استىقتىڭ ساپالى ساقتالۋىن قامتاماسىز ەتۋدى جانە ونى ۇزدىكسىز تاسىمالداۋ بويىنشا شارالار قابىلداۋدى تاپسىردى.
ء«وڭىر اكىمدەرى ءونىمنىڭ استىق قويمالارىنا ۋاقىتىلى قابىلدانۋىن تۇراقتى باقىلاۋدا ۇستاسىن. كەلەسى جىلعا قاجەتتى استىق تۇقىمىن تولىعىمەن قامتاماسىز ەتۋ كەرەك», دەپ تۇيىندەدى ءاليحان سمايىلوۆ.