باتىس قازاقستان: كوشى-قون احۋالى

باتىس قازاقستان وبلىستىق كوشى-قون پوليتسياسى جانە جەرگىلىكتى اكىمدىك جاعدايدىڭ تولىق باقىلاۋدا ەكەنىن ايتادى. پوليتسيا دەپارتامەنتىنىڭ مالىمەتىنشە, جىل باسىنان بەرى باتىس قازاقستان وبلىسىنىڭ اۋماعىندا رەسەي فەدەراتسياسىنىڭ 12 265 ازاماتى تىركەلگەن. ولاردىڭ 1 047-ءسى – حالىقارالىق جۇك تاسىمالىمەن, 1 108-ءى جۇمىس ىستەۋگە كەلگەن. ال جەكە شارۋالارىمەن كەلگەن 10 057 رەسەيلىكتىڭ 2 417-ءسى قازاقستاندا ۋاقىتشا تۇرۋعا رۇقسات العان. بۇدان بولەك, 22 ازامات – وقۋعا, 18 ازامات – قىزمەت بابى بويىنشا, 13 ازاماتتىڭ تۋريستىك ساپارمەن كەلگەنى تىركەلىپتى.

«رەسەي فەدەراتسياسى ازامات­تارىنىڭ ءبىزدىڭ ەلدە بولۋ ءتارتىبى 2005 جىلعى 23 مامىردا بەكىتىلگەن «قازاقستان رەسپۋبليكاسى مەن رەسەي فەدەراتسياسى ازامات­تارىنىڭ ءوزارا ۆيزاسىز ساپارلارى تۋرالى» قازاقستان رەسپۋبليكاسى ۇكىمەتى­نىڭ №494 قاۋلىسىمەن رەتتەلەدى. وبلىستىق كوشى-قون بولىمشەلەرىن­دە 2022 جىلدىڭ باسىنان 22 قىركۇيەگىنە دەيىن بارلىعى 20 840 شەتەلدىك تىركەلدى. ونىڭ ىشىندە 18 548 ازامات – تمد ەلدەرىنەن, 2 292 ازامات الىس شەتەلدەردەن كەلگەن» دەلىنگەن پولي­تسيا تاراتقان مالىمەتتە.

قازىرگى تاڭدا باتىس قازاقستان وبلىسىنىڭ اۋماعىندا رەسەي فەدەرا­تسياسىنىڭ 3 961 ازاماتى تۇراقتى تۇردە تۇرادى. وسى جىلدىڭ باسىنان بەرى قازاقستاندا تۇراقتى تۇرۋعا قالدىرۋ تۋرالى 427 ادام ءوتىنىش بىلدىرگەن بولسا, ونىڭ 278-ءى رۇقسات العان. سونىمەن قاتار قازاقستان ازاماتتىعىن الۋعا 29 ازامات ءوتىنىش بىلدىرسە, ونىڭ 11-ءى قازاقستان رەسپۋب­ليكاسىنىڭ ازاماتتىعىن العان.

باتىس قازاقستان وبلىستىق پوليتسيا دەپارتامەنتى جۋرناليس­تەردىڭ سۇراۋى بويىنشا سوڭعى ءۇش كۇننىڭ مالىمەتىن دە جاريالادى. رەسەيدە ءىشىنارا موبيليزاتسيا جاريالانعان 21 قىركۇيەك كۇنى كەدەننەن باتىس قازاقستان وبلىسى اۋماعىنا – 64 رەسەي ازاماتى, 22 قىركۇيەكتە – 128, 23 قىر­كۇيەكتە 197 ازامات وتكەن كورىنەدى. كو­رىپ وتىر­عانىمىزداي, ءوسۋ ديناميكاسى بار.

2021 جىلدىڭ قاڭتار-قىركۇيەك ايلارىندا باتىس قازاقستانعا رەسەي فەدەراتسياسىنىڭ 5 882 ازاماتى كەلگەن بولسا, بيىلعى توعىز اي ىشىندە 12 265 رەسەيلىك ازامات قازاق شەكاراسىنا وتكەن. سونىڭ 1 307-ءسى قىركۇيەك ايىندا كەلگەن.

باتىس قازاقستان وبلىسى