قازاقستان قۇراماسىنىڭ باس باپكەرى ماگومەد اديەۆ بەلارۋسپەن بولاتىن ماتچ الدىندا ءباسپاسوز ءماسليحاتىن وتكىزدى, دەپ حابارلايدى Egemen.kz قفف-عا سىلتەمە جاساپ.
– ءبىزدى قيىن ويىن كۇتىپ تۇر, ونىڭ ماڭىزدىلىعىن تۇسىنەمىز. جىگىتتەردى كوپتەن بەرى كورمەدىك, مەن بۇرىنعى ماتچتاردا سەزىنگەن اتموسفەرانى قايتا سەزگىم كەلەدى. ءبىر جاعىنان قيىن ويىن بولسا, ەكىنشى جاعىنان قايتا كەزدەسىپ, جانكۇيەرلەرىمىزبەن قاۋىشاتىنىمىزعا قۋانىشتىمىز. بىزدە ءۇش-ءتورت كۇندىك جاتتىعۋ بولدى, كوماندانى بىردەي فورماعا تۇراقتاندىرۋ قيىن. بىراق كەز كەلگەن كوماندانىڭ جاعدايى بىردەي, ونىڭ ىشىندە ءبىزدىڭ قارسىلاستارىمىز دا بار. ءبىر جارىم كۇن بويى تاكتيكالىق دايىندىقتى پىسىقتادىق. باپكەر ارقاشان كوپ نارسەنى قالايدى, بىراق مەن جۇمىسىمدى بۇرىنعىداي جالعاستىرۋىم كەرەك. ال, ءبىزدىڭ جىگىتتەرگە كەلسەك, احمەتوۆ جاراقاتپەن كەلىپ, جاتتىعۋعا قاتىسا المادى. وسى ماتچقا ول شىقپايدى. ال قۋاتتىڭ جاعدايى جاقسى, الاڭعا شىعۋعا دايىن, - دەدى ماگومەد اديەۆ.
ونىڭ ايتۋىنشا, بۇگىنگى ويىندا ۇلتتىق قۇرامامىزدى اسحات تاعىبەرگەن باستاپ شىعادى.
– ءبىز ەشقاشان توپتىڭ (تۋرنير كەستەسىندە) باسىندا بولعان ەمەسپىز. سوندىقتان مەن جىگىتتەرگە وسى ساتتەن ءلاززات الۋ كەرەكتىگىن ايتتىم, ويتكەنى بۇل بارلىق ادامداردا بولا بەرمەيتىن مۇمكىندىك. ءبىز تەك ءبىرىنشى ورىنعا تالاسۋىمىز قاجەت. سپورتتا تەك التىن جارقىرايدى, سوندىقتان ءبىز ارقاشان وسىعان ۇمتىلامىز. بارلىعى ءوز قولىمىزدا. مەن جىگىتتەردىڭ وسى ساتتەردەن ءلاززات العانىن قالايمىن. ءبىز بۇل ءتۋرنيردى مەرزىمىنەن بۇرىن اياقتاۋعا تىرىسامىز. قانداي جاعداي بولماسىن, بار كۇشىمىزدى سالامىز, - دەدى باس باپكەر.