قازاقستان رەسپۋبليكاسى پرەمەر-ءمينيسترىنىڭ ءباا-گە ساپارى اياسىندا ەلىمىزدىڭ ساۋدا جانە ينتەگراتسيا مينيسترلىگىنىڭ «تەحنيكالىق رەتتەۋ جانە مەترولوگيا كوميتەتى قازستاندارت» رمك ءونىمنىڭ پارسى شىعاناعى ەلدەرىنىڭ تالاپتارىنا سايكەستىگىن باعالاۋ سالاسىنداعى Gulf TEC Certification كاسىپورنىمەن كەلىسىمگە قول قويدى.
بۇل كەلىسىم ءباا, ساۋد ارابياسى, قاتار, كۋۆەيت, ومان جەتكىزۋشىلەرىنىڭ تىزىلىمىنە قوسۋ ءراسىمىن ايتارلىقتاي جەدەلدەتۋگە, ساۋداداعى تەحنيكالىق كەدەرگىلەردى الىپ تاستاۋعا جانە وتاندىق ءونىم ەكسپورتىن ۇلعايتۋعا مۇمكىندىك بەرەدى.
وسىلايشا, 30-دان استام قازاقستاندىق وندىرۋشىلەر ءباا-گە ەكسپورتتى جۇزەگە اسىرادى, ولاردىڭ 9-ى – رەسمي تىزىلىمگە ەنگىزىلگەن تاماق جانە اۋىل شارۋاشىلىعى ونىمدەرىن جەتكىزۋشىلەر. وندىرۋشىلەر بۇگىندە ەلدەن شىقپاي-اق حالال سەرتيفيكاتىن الا الادى.
بۇدان باسقا, قازاقستان رەسپۋبليكاسى پرەمەر-ءمينيسترىنىڭ ءباا-گە ساپارى اياسىندا قازاقستان ءباا حالىقارالىق اككرەديتتەۋ ورتالىعىنان حالال ونىمدەرىن سەرتيفيكاتتاۋدى جۇرگىزۋگە «قازستاندارتتى» اككرەديتتەۋ تۋرالى رەسمي قۇجات الدى.