استانا قالاسى بويىنشا مەملەكەتتىك كىرىستەر دەپارتامەنتىنىڭ «اۋەجاي-استانا» كەدەن بەكەتىنىڭ قىزمەتكەرلەرى جىل باسىنان باستاپ قولما-قول اقشا قاراجاتىن دەكلاراتسيالاماي نەمەسە زاڭسىز الىپ كەتۋدىڭ 55 فاكتىسىن انىقتادى, دەپ حابارلايدى Egemen.kz قر قم مەملەكەتتىك كىرىستەر كوميتەتىنە سىلتەمە جاساپ.
كوميتەت اقپاراتىنا سايكەس, دەكلاراتسيالانباعان قولما-قول اقشا سوماسى 498 454 908 تەڭگەنى قۇرادى, بۇل - 1 083 599 اقش دوللارى. وسىلايشا, بۇزۋشىلىقتار بويىنشا ايىپپۇل سوماسى 1 700 000 تەڭگەدەن استى.
ماسەلەن, 9 قىركۇيەك كۇنى استانا قالاسىنىڭ «نۇرسۇلتان نازارباەۆ» حالىقارالىق اۋەجايىندا دۋبايعا باعىتتالعان حالىقارالىق اۋەرەيسىمەن كەتىپ بارا جاتقان جولاۋشىلار كەدەندىك باقىلاۋدان وتكەننەن كەيىن استانا قالاسى بويىنشا مكد «اۋەجاي-استانا» كەدەن بەكەتىنىڭ قىزمەتكەرلەرى اۋەجايدى تەكسەرۋ قىزمەتكەرلەرىمەن بىرگە قازاقستان ازاماتىن توقتاتتى. ۇستاۋ كەزىندە ازاماتتان دەكلاراتسيالانباعان اقشا قاراجاتى تابىلدى. ازامات 56 750 اقش دوللارىن ەلدەن شىعارماق بولعان. زاڭ بۇزۋشى اقشانىڭ ءبىر بولىگىن اياق كيىمىنىڭ ۇلتاراعىنىڭ استىنا, ال قالعان بولىگىن قول جۇگىنە جاسىرعان.
«25 تامىز كۇنى دۋبايعا باعىتتالعان حالىقارالىق اۋەرەيسىمەن كەتىپ بارا جاتقان جولاۋشىلار كەدەندىك باقىلاۋدان وتكەننەن كەيىن قازاقستان ازاماتىن توقتاتتى. ۇستاۋ كەزىندە 14 100 اقش دوللارى كولەمىندە دەكلاراتسيالانباعان اقشا قاراجاتى انىقتالدى», دەپ قوستى كوميتەتتەن.