اتىراۋ وبلىسىندا كاسپي تەڭىزىنىڭ جاعالاۋىنداعى قامىس ورتىنە تىكۇشاقپەن 33 مارتە سۋ شاشىلدى. قامىس ءورتى 14 قىركۇيەكتەن بەرى سونبەي تۇر, دەپ حابارلايدى Egemen.kz.
وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي, ءبىر اپتادا بۇرىن تۇتانعان ءورت اۋماعى 60 گەكتارعا جەتكەن.
«بۇگىن, 21 قىركۇيەكتە جەرگىلىكتى ۋاقىتپەن ساعات 07:30-دا قامىس ءورتىن سوندىرۋگە «قازاۆياقۇتقارۋ» اق-نىڭ مي-8 ۆسۋ-5 تىكۇشاعى جىبەرىلدى. سۋ شاشۋ قۇرىلعىسى بار تىكۇشاق ەكيپاجىنىڭ قۇرامىندا 5 ادام بار. كاسپي تەڭىزىنىڭ جاعالاۋىنا اۋەدەن بارلاۋ جۇرگىزۋ كەزىندە ءورتتىڭ ەكى وشاعى انىقتالدى. بۇعان قوسا 400 شارشى مەتر اۋماقتا قامىس ءورتى بىقسىپ جاتقانى بەلگىلى بولدى. ەكيپاج قۇرامى تىكۇشاقپەن اۋەدەن ءورت وشاعىنا 33 مارتە سۋ شاشتى. ءسويتىپ, 400 شارشى مەتر اۋماقتاعى ءبىر ءورت وشاعى ءسوندىرىلدى», دەپ حابارلادى دەپارتامەنتتىڭ قوعاممەن بايلانىس توبى.
تەڭىز جاعالاۋىنداعى قامىس ءورتى كەشە 20 قىركۇيەكتە ۇدەي ءتۇستى. ءورت وشاعىنا جەتۋ ءۇشىن جول ىزدەگەن ترەكول كولىگى باتپاققا باتىپ, ءورت وشاعىندا قالىپ قويدى. كولىكتەگى ەكى ءورت ءسوندىرۋشى قاۋىپسىز جەرگە جەدەل ەۆاكۋاتسيالاندى. جالىن «اقجايىق» مەملەكەتتىك تابيعي رەزەرۆاتىنىڭ اۋماعىنا جايىلعان.
بۇگىن, 21 قىركۇيەكتە قامىس ءورتىن سوندىرۋگە اتىراۋ وبلىستىق توتەنشە جاعدايلار دەپارتامەنتىنەن 31 قىزمەتكەر, 10 تەحنيكا, 1 سۋ كولىگى, «اقجايىق» مەلەكەتتىك تابيعي رەزەرۆاتىنان 20 جۇمىسشى, 5 تەحنيكا جۇمىلدىرىلعان. سونداي-اق جەرگىلىكتى اتقارۋشى ورگانداردان 3 ادام, 3 تەحنيكا, ەرىكتى ءورت ءسوندىرۋ جاساعىنان 15 ادام, 2 تەحنيكا تارتىلعان.