قىرعىزستان پرەزيدەنتى سادىر جاپاروۆ نيۋ-يوركتەگى بۇۇ باس اسسامبلەياسىنىڭ 77-ءشى سەسسياسىنىڭ جالپى دەباتىندا ءسوز سويلەپ, قىرعىز-تاجىك شەكاراسىنداعى جاعدايعا توقتالا كەتتى, دەپ حابارلايدى Egemen.kz انادولى اگەنتتىگىنە سىلتەمە جاساپ.
جاپاروۆ قازىرگى الەمدەگى گەوساياسي جاعدايدىڭ شيەلەنىسۋى جاعدايىندا بۇۇ جارعىسىندا بەكىتىلگەن جوعارى ماقساتتار مەن مىندەتتەردى, اتاپ ايتقاندا حالىقارالىق بەيبىتشىلىك پەن قاۋىپسىزدىكتى ساقتاۋ ماڭىزدى ەكەنىن ەسكە سالدى.
قىرعىز كوشباسشىسى قىرعىز-تاجىك شەكاراسىنداعى جاعدايدىڭ كەزەكتى شيەلەنىسۋى اياسىندا وڭىردە قالىپتاسقان جاعدايدى بايانداپ بەردى. ول ءوز سوزىندە قىرعىزستان 1996 جىلى قحر-مەن جانە 1999 جىلى ءۇش ەلدىڭ مەملەكەتتىك شەكارالارىنىڭ ءتۇيىسۋ نۇكتەسى تۋرالى قازاقستانمەن شەكارالىق رەتتەۋ ماسەلەلەرىن ءساتتى اياقتاعانىن دا ءسوز ەتتى.
ء«بىز قازىر بىرلەسكەن جۇمىستى تولىعىمەن اياقتادىق جانە وزبەكستان رەسپۋبليكاسىمەن مەملەكەتتىك شەكارا تۋرالى شارتقا قول قويۋعا ءازىرمىز», دەدى ول.
س.جاپاروۆتىڭ ايتۋىنشا, قىرعىز تاراپى تاجىكستانمەن شەكارالىق ماسەلەلەردى رەتتەۋ بويىنشا جۇمىس بارىسىندا وزىنە العان حالىقارالىق مىندەتتەمەلەرگە تولىق سايكەس ارەكەت ەتكەن.
«وسى جىلدىڭ 14, 15 جانە 16 قىركۇيەگىندە قىرعىزستاننىڭ وڭتۇستىگىندە اۋقىمدى اسكەري قاقتىعىستار بولعانىن حابارلاۋ ماعان اۋىر ءتيدى. بۇعان دەيىن قول جەتكىزىلگەن بارلىق ۋاعدالاستىقتاردى بۇزا وتىرىپ, تاجىك تاراپى قىرعىز-تاجىك مەملەكەتتىك شەكاراسىنىڭ بۇكىل پەريمەترى بويىنشا شەكارالىق جانە ازاماتتىق وبەكتىلەرگە شابۋىل جاسادى», دەدى ول.
جاپاروۆ قىرعىزستان تاجىك تاراپىمەن كەز كەلگەن فورماتتا كەلىسسوزدەر پروتسەسىن جالعاستىرۋعا دايىن ەكەنىن مالىمدەدى.
«كورشىلەرىمىزدىڭ زاڭعا قايشى سوڭعى ارەكەتتەرىنىڭ ناتيجەسىندە ءبىزدىڭ سەنىمىمىز السىرەگەنىن اتاپ ءوتۋ قاجەت. دەگەنمەن, ءبىز بۇۇ, ەقىۇ, ۇقشۇ قوسا العاندا, كەلىسسوزدەردى جالعاستىرۋعا جانە حالىقارالىق دەلدالدىققا دايىنبىز», دەدى ول.