پرەمەر-مينيستر ءاليحان سمايىلوۆ قوستاناي وبلىسىنا ىسساپارمەن كەلدى. ۇكىمەت باسشىسى ءبىرىنشى كەزەكتە اۋليەكول اۋىلىنا ات باسىن تىرەپ, الاپات ورمان ءورتى سالدارىنان باسپاناسىز قالعان تۇرعىندارعا ارناپ سالىنىپ جاتقان جاڭا ۇيلەردىڭ قۇرىلىسىمەن تانىستى.
قۇرىلىس ونلاين رەجىمدە باقىلانادى
باسپانا قۇرىلىسىنا ارنايى بولىنگەن 12 گەكتار اۋماقتا ارقايسىسى 100 شارشى مەترلىك 91 ءۇي سالىنىپ جاتىر. ءار ۇيگە 10 سوتىق جەر ءبولىنىپ, گاز, سۋ, ەلەكتر ەنەرگياسىمەن قامتاماسىز ەتىلەدى. كوشەلەرگە اسفالت توسەلەدى. وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆتىڭ ايتۋىنشا, قازقسعزي جوبالاۋ ينستيتۋتى تۇرعىنجايلاردى سۋ باسۋدىڭ الدىن الۋ ماقساتىندا گەولوگيالىق زەرتتەۋ جۇرگىزگەن. جاڭا سالىنىپ جاتقان ۇيلەردىڭ ىرگەتاسى جەراستى سۋلارىنان 2,5 م جوعارى. 7 قىركۇيەكتە 13 مەردىگەر كومپانيا قۇرىلىس جۇمىستارىنا كىرىسىپ كەتكەن. بۇگىنگى تاڭدا 91 ءۇيدىڭ قازانشۇڭقىرى قازىلىپ ءبىتتى. 55 ءۇيدىڭ ىرگەتاسى قۇيىلىپ, بىرنەشە ۇيگە ىرگەتاس بلوكتارى ورناتىلدى.
پرەمەر-ءمينيستردىڭ ايتۋىنشا, الاڭدا ورناتىلعان بەينەكامەرالار ارقىلى قۇرىلىس بارىسى ونلاين رەجىمدە باقىلانىپ وتىر. قۇرىلىس جۇمىستارىنا ۇكىمەت 2,2 ملرد تەڭگەدەن استام قاراجات بولگەن. ءا.سمايىلوۆ مەردىگەر كومپانيالاردىڭ باسشىلارىمەن دە اڭگىمەلەسىپ, ولارعا وزدەرىنە تاپسىرىلىپ وتىرعان مىندەتتى ساپالى ءارى ۋاقتىلى ورىنداپ شىعۋ كەرەك ەكەنىن قاداپ تاپسىردى.
– قازىر اكىمدىك پەن مەردىگەرلەردىڭ الدىندا قۇرىلىس جۇمىستارىن بەلگىلەنگەن مەرزىمدە, ياعني ەكى ايدىڭ ىشىندە ساپالى اياقتاۋ مىندەتى تۇر. بۇل ماسەلە مەملەكەت باسشىسى مەن ۇكىمەتتىڭ ەرەكشە باقىلاۋىندا. سوندىقتان تاپسىرماعا اسا جاۋاپكەرشىلىكپەن قاراۋ كەرەك, – دەدى ۇكىمەت باسشىسى.
پرەمەر-مينيستر ودان كەيىن اۋليەكول اۋىلىنداعى مەكتەپتىڭ جانىنان قۇرىلعان ەۆاكۋاتسيالىق پۋنكتكە بارىپ, زارداپ شەككەندەرمەن كەزدەستى.
– تۇرعىنداردىڭ الاپات تابيعي ورتتەردىڭ سالدارىنان قانداي قيىن جاعدايعا تاپ بولعانىن بىلەمىز. وسىنداي قيىن ساتتە مەملەكەت شۇعىل شارالار قابىلداپ, بارلىق قاجەتتى قولداۋدى كورسەتتى. بۇل جۇمىس ءالى دە جالعاسادى, – دەدى ءا.سمايىلوۆ.
ۇكىمەت باسشىسى وڭىرگە وراسان شىعىن اكەلگەن تابيعي اپاتقا بايلانىستى پرەزيدەنتتىڭ شۇعىل شەشىمدەر قابىلداپ, ناقتى تاپسىرمالار بەرىپ, جاعدايدى جەكە باقىلاۋىنا العانىن, سونداي-اق وقيعا ورنىنا ءوزى ارنايى كەلىپ, ەلدىڭ ەڭسەسىن كوتەرىپ كەتكەنىن اتاپ ءوتتى.
– وسىنداي قيىن-قىستاۋ كەزەڭدە بوس بايبالامعا سالىنباي, اپات سالدارىنان تۋىنداعان اۋىر جاعدايدا سابىردان اسپاي, توزىمدىلىك تانىتقاندارىڭىز ءۇشىن العىس ايتامىن. سونداي-اق حالقىمىزدىڭ بىرلىگىن كورسەتىپ, وتانداستارىنا قولۇشىن سوزعان بارلىق قازاقستاندىقتارعا دا العىس بىلدىرگىم كەلەدى, – دەدى ءا.سمايىلوۆ.
كەزدەسۋ بارىسىندا ورشىگەن ءورت كەزىندە قاۋىپسىز جەرلەرگە كوشىرىلگەن تۇرعىندار ۇكىمەت باسشىسىنا مەملەكەتتىڭ دەر كەزىندە جەدەل شارالار قابىلداپ, قولداۋ كورسەتكەنى ءۇشىن العىس ايتتى.
ءورت سوندىرگىش تىكۇشاقتار سانى ءۇش ەسە ارتادى
وبلىسقا جۇمىس ساپارى بارىسىندا پرەمەر-مينيستر ورتالىق مەملەكەتتىك ورگاندار مەن اكىمدىك باسشىلارىنىڭ قاتىسۋىمەن ءوڭىردىڭ كەشەندى الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى.
جيىن بارىسىندا وبلىس اكىمى ارحيمەد مۇحامبەتوۆ, توتەنشە جاعدايلار ءمينيسترى يۋري يلين, يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ, ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ, اۋىل شارۋاشىلىعى ءمينيسترى ەربول قاراشوكەەۆ, سونداي-اق ۇلتتىق ەكونوميكا ۆيتسە-ءمينيسترى باۋىرجان وماربەكوۆ بايانداما جاسادى.
پرەمەر-مينيستر جاقىندا قوستاناي وبلىسىندا بولعان ورمان ءورتى جەرگىلىكتى تۇرعىندار مەن ينفراقۇرىلىمعا ايتارلىقتاي زيان كەلتىرگەنىن, ءورت كەزىندە ءبىر زەينەتكەر قازا تاپقانىن اتاپ ءوتتى. وسىعان بايلانىستى ءا.سمايىلوۆ ورمان شارۋاشىلىعى توڭىرەگىندەگى قۇتقارۋ قىزمەتىن جەتىلدىرىپ, قۋاتتى تەحنيكامەن قامتۋ جۇمىستارىن جۇرگىزۋ قاجەتتىگىن ايتتى.
– تىكۇشاق تەحنيكاسىنىڭ جاقىن جەردەن سۋ الىپ, ءورتتى ءسوندىرۋىن جەڭىلدەتۋ ماقساتىندا ورمان القاپتارىنىڭ جانىنداعى سۋ قويمالارىنىڭ ءتۇبىن تەرەڭدەتۋ جۇمىستارىن جۇرگىزۋ قاجەت. ءبىز تىكۇشاقتار پاركىن ءۇش ەسە ۇلعايتۋ ءۇشىن قوسىمشا سۋبۇركىگىش قۇرىلعىلاردى ساتىپ الامىز, ولاردى ءورت ءسوندىرۋ ءۇشىن پايدالانۋعا بولادى. بۇل قوستاناي وبلىسىن قوسا العاندا, بارلىق وڭىرلەرگە قاتىستى, – دەدى ءا.سمايىلوۆ.
ءبىلىم سالاسىن سىنعا الدى
كەڭەس بارىسىندا پرەمەر-مينيستر ءوڭىر اكىمدىگىنىڭ ءبىلىم بەرۋ سالاسىنداعى كەمشىلىكتەرىنە دە نازار اۋداردى. ءا.سمايىلوۆ ءوڭىردىڭ 7 مەكتەبىندە كۇردەلى جوندەۋ جۇمىستارىنىڭ اياقتالۋ مەرزىمىنىڭ كەشىكتىرىلگەنىن, سونىڭ سالدارىنان بالالار بالاباقشا, مادەنيەت ۇيلەرى مەن اۋىل اكىمدىكتەرىنىڭ عيماراتتارىندا وقۋعا ءماجبۇر ەكەنىن اتاپ ءوتتى.
– بۇل ماسەلەلەردى شەشۋ ءۇشىن جەدەل شارالار قابىلداۋ قاجەت. جالپى ءبىلىم بەرۋ سالاسىنا جاۋاپكەرشىلىكپەن قاراۋ كەرەك, بالالاردىڭ ساپالى ءبىلىم الۋى ءۇشىن ءتيىستى جاعدايلار جاسالۋ كەرەك, – دەدى ءا.سمايىلوۆ.
ەكونوميكالىق ماسەلەلەر بويىنشا پرەمەر-مينيستر وبلىس تۇرعىندارىنىڭ ءال-اۋقاتىن ارتتىرۋ ءۇشىن بۇكىل ءوڭىردىڭ الەۋمەتتىك-ەكونوميكالىق دامۋىنا سەرپىن بەرە الاتىن ينۆەستيتسيالىق جوبالاردى ىسكە قوسۋ بويىنشا جۇمىس جۇرگىزۋ قاجەتتىگىن قاداپ ايتتى. بۇل – اكىمدىكتىڭ باستى مىندەتتەرىنىڭ ءبىرى. پرەمەر-ءمينيستردىڭ ايتۋىنشا, «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى جانە «اۋىل – ەل بەسىگى» باعدارلاماسى اياسىندا قوستاناي وبلىسىنا 32 اۋىلدىق ەلدى مەكەندە 75 جوبانى ىسكە اسىرۋعا 6,7 ملرد تەڭگە بولىنگەن. جالپى ءوڭىردى دامىتۋعا 2022 جىلى رەسپۋبليكالىق بيۋدجەتتەن 115,9 ملرد تەڭگە, سونداي-اق بيۋدجەتتى ناقتىلاۋ اياسىندا تاعى 31,7 ملرد تەڭگە قاراستىرىلعان.
– بۇل قاراجات ەڭ الدىمەن الەۋمەتتىك قاجەتتىلىكتەرگە, وبلىستىڭ ينفراقۇرىلىمى مەن اگروونەركاسىپتىك كەشەنىن دامىتۋعا باعىتتالعان. اكىمدىك اتالعان قاراجاتتىڭ ءتيىمدى پايدالانىلۋىن قامتاماسىز ەتۋى ءتيىس, – دەدى پرەمەر-مينيستر.
ءا.سمايىلوۆ ازىق-ت ۇلىكتىڭ جەتىسپەۋشىلىگى مەن باعانىڭ نەگىزسىز وسۋىنە جول بەرمەۋ بويىنشا جوسپارلى جۇمىس جۇرگىزۋ قاجەتتىگىنە دە نازار اۋدارىپ, اكىمدىككە وسى باعىتتا قولدانىستاعى تەتىكتەردى پايدالانۋدى جانداندىرۋدى تاپسىردى. سونىمەن قاتار ءوڭىر ەكونوميكاسىن ودان ءارى ءارتاراپتاندىرۋدىڭ ماڭىزدىلىعىنا توقتالدى. ماسەلەن, 2022 جىلى وبلىستا قۇنى 38 ملرد دوللارعا جۋىقتايتىن 45 جاڭا جوبانى ىسكە قوسۋ جوسپارلانعان.
– ينۆەستيتسيالىق جوبالاردى ىسكە قوسۋ جاڭا جۇمىس ورىندارىنىڭ اشىلۋىنا سەپتىگىن تيگىزەدى. وبلىس اكىمدىگى ينۆەستورلار ءۇشىن بارلىق قاجەتتى جاعدايدى جاساۋ جانە بەلگىلەنگەن جوبالاردى ۋاقتىلى ىسكە قوسۋ جونىندەگى جۇمىستى جالعاستىرۋى كەرەك, – دەدى ءا.سمايىلوۆ.
جيىن سوڭىندا پرەمەر-مينيستر جىلۋمەن جابدىقتاۋ جوبالارىن ىسكە اسىرۋعا قاراجات ءبولۋ ماسەلەسىن پىسىقتاۋدى, «قوستاناي-دەنيسوۆ» كولىك جولىن رەكونسترۋكتسيالاۋ جونىندەگى جوبانى ۋاقتىلى قارجىلاندىرۋدى قامتاماسىز ەتۋدى, 2022 جىلدىڭ سوڭىنا دەيىن جەرگىلىكتى ماڭىزى بار جولداردىڭ جاعدايىن جاقسارتۋ جونىندە شارالار قابىلداۋدى تاپسىردى.
بۇدان وزگە, ۇكىمەت باسشىسى وڭىردە الداعى ۋاقىتتا كوپفۋنكتسيونالدى مەديتسينالىق مەكەمە بولىپ ۇلعايتىلاتىن جاڭا پەريناتالدىق ورتالىق سالۋ ماسەلەسىن, اۋليەكول اۋدانىنىڭ «دوستىق» بالالار مادەني جازعى ساۋىقتىرۋ كەشەنىن قالپىنا كەلتىرۋ ءۇشىن قاراجات ءبولۋ, سونداي-اق توبىل قالاسىندا ەمحانا قۇرىلىسىن قارجىلاندىرۋدى جانە باسقا دا بىرقاتار ماسەلەنى پىسىقتاۋدى تاپسىردى.
قوستاناي وبلىسى