بيىل تامىز ايىندا سۋ جاڭا اۆتوموبيلدەردى ساتىپ الۋ كورسەتكىشى ءبىراز جوعارىلادى. ناقتىراق ايتقاندا, 2021 جىلدىڭ تامىز ايىمەن سالىستىرعاندا 25,4 پايىزعا وسكەن. ازاماتتار اسىرەسە Cobalt پەن Nexia-نى كوپ ساتىپ العان.
قازاقستاندىق اۆتوبيزنەس قاۋىمداستىعىنىڭ دەرەگىنشە, قازاقستاندىق ديلەرلەر 10 668 جەڭىل جانە جەڭىل كوممەرتسيالىق ءاۆتوموبيلدى, سونىمەن قاتار 743 بىرلىك جۇك كولىكتەرى مەن اۆتوبۋستى ساتقان. جىلدىق ەسەپتەۋ بويىنشا كورسەتكىشتەر 2021 جىلعى دەرەككە جۋىقتايدى. بيىل كۇزگە دەيىن 74 953 كولىك ساتىلسا, بىلتىر بۇل 76 090 بىرلىك بولعان.
رەسەيدەن كەلەتىن يمپورتتىڭ ايتارلىقتاي قىسقارعانىنا قاراماستان, قازاقستانداعى اۆتوكولىك بيزنەسى جاقسى جۇمىس ىستەپ تۇر. وندىرۋشىلەر قۇرامداس بولىكتەردى جەتكىزۋدىڭ جاڭا جولدارىن تابۋدا, ال ىشكى نارىق جاڭا مودەلدەرمەن تولىعىپ جاتىر. يمپورتتاۋشىلار مەن ديلەرلەر دە جاڭا برەندتەرگە جەدەل يكەمدەلىپ جاتىر. قاۋىمداستىقتىڭ ۆيتسە-پرەزيدەنتى انار ماقاشەۆانىڭ ايتۋىنشا, رەسەيدەن كەلەتىن يمپورتتىڭ بىرنەشە ەسە قىسقارۋى اياسىندا اۆتوموبيل بيزنەسى جىلدام قالپىنا كەلۋدى جالعاستىرىپ جاتىر.
تامىز ايىندا ەڭ كوپ ساتىلعان ءۇش اۆتوموبيل – Chevrolet (3854), Hyundai (2226) جانە Kia (1485). Toyota ماركاسىنىڭ – 998 كولىگى, Lada-نىڭ – 592 كولىگى, Chery-ءدىڭ 519 بىرلىگى ساتىلعان. جەتىنشى ورىنداعى JAC ماركاسىنىڭ 292-ءسى ساتىلسا, سەگىزىنشى ورىندا 233 بىرلىك ساتىلىممەن EXEED جاڭا ماركاسى تۇر. ودان كەيىن 231 بىرلىك ساتىلىممەن Lexus. ۇزدىك وندىقتى 59 بىرلىك ساتىلىممەن Renault تۇيىندەيدى.
ال تامىز ايىندا ەڭ كوپ ساتىلعان مودەلدەردىڭ العاشقى وندىعىنا مىنا ۇلگىلەر كىرەدى – Chevrolet Cobalt, Chevrolet Nexia, Hyundai Tucson, Kia Sportage, Toyota LC Prado, Hyundai Elantra, Kia K5, Chery Tiggo 8 Pro, Chevrolet Equinox جانە Lada Vesta.
ينفوگرافيكانى جاساعان امانگەلدى قياس, «ەQ»
تۇتىنۋشىلار تاراپىنان ەڭ ۇلكەن سۇرانىسقا يە بەس برەندتى ايتار بولساق, ولار – Chevrolet, Hyundai, Kia, Toyota جانە Lada. جالپى, Chevrolet سوڭعى سەگىز اي بويى كوشباسشىلىقتى مىعىم ۇستاپ تۇر.