تامىزدىڭ سوڭىندا الماتىداعى اربات بويىندا, اشىق اسپان استىندا, الاڭدى تولتىرا كورەرمەن جيناپ, ءۇش كۇن بويى دۇبىرلەپ وتكەن وpenair كونتسەرتى تاعى دا حالىقارالىق ءىرى جوبامەن جالعاسىن تاپتى. اباي اتىنداعى ۇلتتىق وپەرا جانە بالەت تەاترىنىڭ 89-ماۋسىمى حالىقارالىق OPERALIA كلاسسيكالىق ونەر فەستيۆالىمەن قاتار اشىلىپ, جىلداعى ءداستۇر بويىنشا «اباي» وپەراسىمەن شىمىلدىعىن ءتۇردى.
بەس كۇنگە جوسپارلانعان كلاسسيكالىق ونەردىڭ حالىقارالىق OPERALIA فەستيۆالىن ۇيىمداستىرىپ وتىرعان اباي اتىنداعى ۇلتتىق وپەرا جانە بالەت تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى نۇرباقىت بوكەباەۆ الماتىلىقتارعا كوپتەن كۇتكەن توسىنسىي ءارى ەستەن كەتپەس جارقىن ساتتەر سىيلايتىنىن جەتكىزدى. فەستيۆال شەڭبەرىندە باس قوساتىن قازاقستان جانە شەتەل كلاسسيكالىق ونەرىنىڭ تانىمال شەبەرلەرى تىڭدارمانىنا ەڭ ۇزدىك كومپوزيتورلاردىڭ شىعارمالارىن ورىندايدى. «اققۋ كولى» سپەكتاكلىندەگى باستى پارتيانى ورىنداۋ ءۇشىن سانكت-پەتەربۋرگتەگى ماريا تەاترىنىڭ جەتەكشى بيشىلەرى نيكيتا كورنەەۆ پەن ماسكەۋدە وتكەن حالىقارالىق بايقاۋدىڭ جۇلدەگەرى ماليكا ەلشىباەۆا ارنايى شاقىرىلىپ وتىر.
سونداي-اق بريتانيانىڭ بەلگىلى ءپيانيستى وليۆەر پۋل, ۆەنا سكريپكاشىسى رۋساندا پانفيلي, بەلگىلى چەح باريتونى فيليپپ باندجاك, وڭتۇستىك كورەيانىڭ مادەنيەت قايراتكەرى, «پحەن-تەك» فيلارمونياسىنىڭ كوركەمدىك جەتەكشى ءارى باس ديريجەرى, «سەۋل كونتسەرتتىك وركەسترىنىڭ» باس ديريجەرى, پروفەسسور نو تە چول – بيىلعى فەستيۆالدىڭ قۇرمەتتى قوناقتارى.
«اباي» سپەكتاكلىن وپەرا جانە بالەت تەاترىنىڭ باس ديريجەرى ەربولات احمەدياروۆ جۇرگىزدى. بيىلعى ماۋسىماشار قويىلىمنىڭ باستى جاڭالىعى – ءبىر سپەكتاكلدە ۇلتتىق وپەرا ونەرىنىڭ بىرنەشە بەلگىلى ءارتىسى بىردەن بوي كورسەتتى, ولار: قازاقستاننىڭ ەڭبەك سىڭىرگەن قايراتكەرلەرى تالعات كۇزەمباەۆ, مايرا مۇحامەدقىزى جانە «استانا وپەرا» تەاترىنىڭ جەتەكشى ءسوليستى مەرەي باينەش تەاتردىڭ بەتكەۇستار تۋىندىسىنىڭ اجارىن بۇرىنعىسىنان دا اشىپ, ۇلى اقىننىڭ تۇلعاسىن اسقاقتاتا ءتۇسۋ ءۇشىن شەبەرلىگىن اياعان جوق. ۇلىلار تابانىنىڭ ءىزى قالعان, سامساعان جۇلدىزداردىڭ تالايىن جارقىراتىپ جۇرگەن ساحنانىڭ وزىندە مۇنداي عاجايىپ ءسات سيرەك تۋادى. حالىقارالىق فەستيۆالدەر مەن گاسترولدەردىڭ تۇراقتى قاتىسۋشىسى بولىپ تابىلاتىن «اباي» قويىلىمى ءۇشىن ۇلتتىق مادەنيەتتىڭ ەڭ ءىرى وكىلدەرىنىڭ تۇس-تۇستان كەلىپ, ءبىر ساحنادا ونەر توعىستىرعانىن كورەرمەن اسا ءىلتيپاتتى قابىلداپ, قوشەمەتىن ايامادى.
ديرەكتوردىڭ ايتۋىنشا, وسىدان 30-40 جىل بۇرىن جازىلىپ, تەاتر ارحيۆىندە ساقتاۋلى جاتقان كورنەكتى كومپوزيتورلاردىڭ شىعارمالارىن زامانعا قاراي قايتا وڭدەپ, كورەرمەنگە ۇسىنۋ كوزدەلىپ وتىر. اتاپ ايتقاندا, بالالارعا ارنالعان «الدار كوسە» مەن «ەڭلىك-كەبەك» وپەرالارىن ساحناعا قايتا جاڭعىرتىپ قويۋ جوسپارى بار. قازاق ونەرىنىڭ ءىنجۋ-مارجانى سانالاتىن «اباي» مەن «قىز جىبەكتىڭ» قاتارى الداعى جىلى جاڭا ۇلتتىق تۋىندىلارمەن تولىقتىرىلماق.
اباي اتىنداعى وپەرا جانە بالەت تەاترى سپەكتاكل ساحنالاۋعا سىرت ەلدەردەن رەجيسسەرلەر مەن باستى رولدە وينايتىن جەتەكشى سوليستەردى ءجيى شاقىرىپ جاتادى. بۇل نەنى بىلدىرەدى؟ بۇل تەاتردىڭ ءوز انشىلەرى مەن بيشىلەرى اراسىندا ءدال سونداي بيىك دەڭگەيدە ونەر كورسەتەتىن شەبەردىڭ بولماعانىنان با, الدە مۇنىڭ باسقا سەبەبى بار ما؟ «سەبەبى ءارتۇرلى بولۋى مۇمكىن. قازاقتىڭ ء«ان ايتساڭ دا, جانىڭدى جەپ ايتاسىڭ» دەگەن ءسوزى ناق وسى وپەرا انشىلەرىنە قاراتا ايتىلسا, ءمانى اشىلا تۇسە مە دەيمىن. كەيدە مۇمكىندىكتىڭ بولماۋىنان سىرتتان شاقىرۋعا ءماجبۇر بولاتىنىمىزدى جاسىرمايمىز. مىسالى, «ايدا» وپەراسىنداعى رادامەستىڭ ءرولىن بيىك دەڭگەيدە وينايتىن ءانشى قازاق ساحناسىندا كوپ ەمەس. سول ءبىردى-ەكىلى تالانتتاردى ءبىز شاقىرعان كەزدە, ولار ءوز تەاترىنداعى سپەكتاكلدەن بوساي الماي قالۋى مۇمكىن. قازىر رەسەي تەاترىندا جۇمىس ىستەيتىن قازاقستاننىڭ تۋماسى احمەت اگادي الەم تەاترلارىن ارالاپ ءجۇرىپ ءان سالادى. بۇل ءبىر جاعى, مامانعا مۇقتاجدىقتان تۋسا, ەكىنشىدەن ەلىمىزدىڭ كورەرمەنى اتى الەمگە بەلگىلى باسقا جۇرتتىڭ دا مىقتىسىن كورسىن دەگەن تىلەكتەن تۋادى. داۋىس مۇمكىندىگىن, درامالىق شەبەرلىكتى جاقسى سەزىنەتىن رەجيسسەر ساحنالايتىن سپەكتاكلىندە قاي تەاتردىڭ ءارتىسىن لايىق دەپ تانىسا, ءبىز سول ءانشىنى شاقىرتامىز. شەتەل تەاترلارىندا جۇمىس ىستەپ جۇرگەن, كەلىسىمشارت بويىنشا ءان سالىپ قايتاتىن مايرا مۇحامەدقىزى مەن نۇرجامال ۇسەنباەۆا باستاعان قازاقستاندىق انشىلەر وزگە ەلدەردىڭ تەاترىنا ءجيى شاقىرىلادى» دەيدى ديرەكتور ب.بوكەباەۆ.
ءاربىر جاڭا ماۋسىم رۋحاني قۇندىلىق ىزدەگەن كورەرمەنگە قۇنارى مول كەش سىيلاۋدى مۇرات تۇتادى. تەاتر باسشىلىعى مۇنداي مادەني جاڭالىقتىڭ بيىل مول بولاتىنىنا سەندىرىپ وتىر.
الماتى