بيىل ەسىمى الەمگە تانىلعان ءانشى روزا باعلانوۆانىڭ 100 جىلدىق مەرەيتويى اتاپ وتىلەدى. ايتۋلى كۇن اياسىندا اۋقىمدى ءىس-شارالار مەن كونتسەرتتەر وتەدى, دەپ حابارلايدى Egemen.kz.
روزا باعلانوۆانىڭ مەرەيتويى رەسەيدە دە تويلانادى. ماسەلەن, بۇگىن رەسەي استاناسى ماسكەۋ قالاسىندا حالىقتىڭ سۇيىكتى ءانشىسىنىڭ قۇرمەتىنە فوتوكورمە اشىلىپ, مەرەكەلىك كونتسەرت ءوتتى. ءىس-شاراعا قازاقستاننىڭ مادەنيەت جانە سپورت ءمينيسترى داۋرەن اباەۆ, زيالى قاۋىم مەن قازاق دياسپوراسىنىڭ وكىلدەرى قاتىستى.
«وسىنداي ءىرى ءىس-شارالار قازاقستاندا عانا ەمەس, باسقا ەلدەردە دە وتكىزىلىپ جاتقانى قۋانتادى. مۇندا ۇسىنىلعان فوتوسۋرەتتەردىڭ ارقايسىسى روزا باعلانوۆانىڭ ماعىنالى ءومىرىنىڭ جارقىن ساتتەرىن عانا ەمەس, سونىمەن بىرگە بۇكىل ءداۋىردىڭ ورلەۋىن دە بەينەلەيدى», دەدى مينيستر كورمەنىڭ اشىلۋىندا.
فوتوكورمەدە ءانشىنىڭ ءومىرى مەن شىعارماشىلىعىن بەينەلەيتىن 30-دان استام بىرەگەي فوتوسۋرەت ۇسىنىلعان. كورمە 7 بولىمنەن تۇرادى: ء«بىرىنشى روزا», «سوعىس جىلدارىنداعى ەرلىك پەن داڭق», «شىعارماشىلىق شىڭى», ء«ار ءان - جاۋھار», «بۇكىل الەمدى جاۋلاپ العان روزام», «قوعامدىق-ساياسي قىزمەت» جانە «حالىق سۇيىسپەنشىلىگىنە بولەنگەن جارقىن ءومىر».
ايتا كەتسەك, بۇلبۇل ءانشىنىڭ 100 جىلدىعى يۋنەسكو-نىڭ اتاۋلى كۇندەر كۇنتىزبەسىنە ەنگىزىلگەن, ال قازان ايىندا ۇيىمنىڭ شتاب-پاتەرىندە روزا باعلانوۆانىڭ قۇرمەتىنە ۇلكەن كونتسەرت وتەدى دەپ كۇتىلۋدە. ال قاراشا ايىندا نۇر-سۇلتان قالاسىندا حالىقارالىق ۆوكاليستەر بايقاۋىن وتكىزۋ جوسپارلانۋدا.
«روزا باعلانوۆا - ءداۋىر سيمۆولى جانە حالىقتىڭ سۇيىكتىسى. قازالى وڭىرىنەن شىققان تۋما تالانتتىڭ قازاق حالقىنىڭ مۋزىكاسى مەن قازاقستان كومپوزيتورلارىنىڭ شىعارماشىلىعىن ەلىمىزدەن تىسقارى جەرلەرگە تانىمال ەتۋگە جانە تانىتۋعا قوسقان زور ۇلەسىن ايتپاي كەتۋگە بولمايدى. روزا باعلانوۆا ۇلى وتان سوعىسى جىلدارىندا كونتسەرتتىك بريگادا قۇرامىندا قىزىل ارميا جاۋىنگەرلەرىنىڭ الدىندا ءان ايتىپ, مايدان دالاسىنان جارالانعانداردى الىپ شىقتى. بەيبىت ۋاقىتتا دا روزا تاجىبايقىزى بۇكىل الەمگە ءان شىرقاپ ونەر كورسەتتى, قوعامدىق ىستەرمەن بەلسەندى اينالىستى, قايىرىمدىلىق شارالارىنا قاتىستى», دەپ اتاپ ءوتتى داۋرەن اباەۆ مەرەكەلىك كونتسەرتتە سويلەگەن سوزىندە.