كۇنى كەشە جەر ءجانناتى كوكشەگە قيانداعى تۇرىكمەنستاننان جەتى وتباسى كوشىپ كەلدى. سالت باستى, ساباۋ قامشىلى ەمەس, ۇيەلمەلى-سۇيەلمەلى بالا-شاعاسى بار وتباسىلى. الىستان اڭساپ جەتكەن قانداستارىمىزدى قالا باسشىلارى مەن كوكشەتاۋلىقتار تەمىر جول بەكەتىندە قارسى الىپ, دوس قۇشاعىن ايقارا اشىپ, قارسى الدى.
بارلىعى 30 ادام ەكەن. قالا اكىمىنىڭ ورىنباسارى ازامات ىسقاقوۆتىڭ ايتۋىنا قاراعاندا, جەرگىلىكتى بيلىك بارلىق جاعدايىن جاساماق. قۇجاتتاردى راسىمدەۋ, جۇمىسقا ورنالاستىرۋ, بالالاردى مەكتەپكە جانە مەكتەپكە دەيىنگى مەكەمەلەرگە ورنىقتىرۋ تاراپىنان ەشقانداي قيىندىق بولماۋعا ءتيىستى.
وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنىڭ ورىنباسارى شولپان سالىققىزىنىڭ ايتۋىنا قاراعاندا, اقمولا وبلىسىنا تۇرىكمەنستاننان بارلىعى 165 ادامنان تۇراتىن 51 وتباسىن كوشىرۋ جوسپارلانعان. قانداستار اقكول, ارشالى, استراحان, اتباسار ءتارىزدى ون اۋدانعا جانە وبلىس ورتالىعىنا قونىستانباق. العاشقى كەزەڭدە جاڭا ورتاعا تەزىرەك بەيىمدەلىپ كەتۋ ءۇشىن جان-جاقتى قولداۋ كورسەتىلمەك. ءار وتباسى مۇشەسىنە 70 اەك كولەمىندە كومەك كورسەتىلۋ قاراستىرىلعان. ءبىر ايتا كەتەرلىگى, تۋعان جەردىڭ توپىراعىنا ورالعان قانداستار مۇنداي جەڭىلدىكتەرگە كۆوتا العان سوڭ يە بولا الادى.
كۇزدىڭ تۇنگى اسپانى دا مەيىرلەنىپ, جىپ-جىلى بولىپ تۇر. ءزاۋ بيىكتە تانانىڭ كوزىندەي جارقىراعان جۇلدىزدار دا اتاجۇرتقا تابانى تيگەن ءتامام ەلدىڭ جانارلارىنا ساۋلەسىن ءتۇسىرىپ, شاپاعاتىن قۇيىپ تۇرعانداي.
قانداستار دا, قارسى الۋشى تاراپ تا قاۋقىلداسىپ, بۇرىننان تانىس-ءبىلىس, ەتەنە جاقىن ادامدارداي قاۋىشىپ جاتىر. «ساپار وڭ بولسىن!», «كوش كولىكتى بولسىن!» دەگەن ىزگى تىلەكتەر ايتىلۋدا. قانداستار ءۇمىت وتىن الا كەلگەندەي. ماسەلەن, انا ءتىلىنىڭ كىرپىگى عانا قيمىلدايتىن, سالت-ءداستۇرىمىزدىڭ جۇقاناسى عانا قالعان كوكشەتاۋعا جاڭا لەپ كەلىپ, كوشپەن بىرگە ارىداعى ادەمى سالت-ءداستۇرىمىز ورالىپ جاتسا, كونەنىڭ كۇبىسى كۇمپىلدەپ, كەنەرەمىز كەڭىپ قالماي ما؟!
– ءساتىن سالىپ بۇگىن كيەلى كوكشە توپىراعىنا جەتتىك, – دەيدى قانداسىمىز حودجابەرگەن بايبولاتوۆ. – قاي قيىردا جۇرسەڭ دە اتا-بابا توپىراعى جادىڭنان شىقپايدى عوي. كوكىرەكتەگى سەزىمدى كەلىستىرىپ ايتا الماي قينالىپ تۇرعانىمدى قاراڭىزشى. ەڭ باستىسى, مىنا بالاپاندارىم اتاجۇرتتىڭ اۋاسىن جۇتىپ, وتتاي ىستىق توپىراعىن باساتىن بولدى. ودان اسقان باقىت بار ما؟!
شىنىندا دا سولاي-اۋ!
كوكشەتاۋ