قازاقستان مەن رەسەي اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا ارنالعان مەرەكەلىك ءىس-شارالار استراحان مەملەكەتتىك وپەرا جانە بالەت تەاترىندا ۇلكەن مەرەكەلىك كونتسەرتپەن باستالىپ, باسقا قالالاردا جالعاستى.
اۋەلى 7 قىركۇيەكتە «قازان حالىقارالىق مۇسىلمان كينوسى فەستيۆالى» اياسىندا قازاقستاندىق فيلمدەردىڭ كورسەتىلىمى ۇيىمداستىرىلدى, وندا رەجيسسەر يۋليا زاحاروۆانىڭ «تارلان» ءفيلمىنىڭ تۇساۋكەسەرى ءوتتى. بۇل كارتينا عالىمجان يبراگيموۆتىڭ «الماچۋار» پوۆەسىنىڭ جەلىسىمەن تۇسىرىلگەن «تاتاركينو» جانە Almapictures بىرلەسكەن جوباسى.
بايقاۋعا سونداي-اق رەجيسسەر اداي ابەلدينوۆتىڭ تولىقمەترلى تاريحي انيماتسيالىق «كۇلتەگىن» ءفيلمى ۇسىنىلدى. تاسپا كوپتەگەن كوشپەلى ەتنوستى ءبىر تۋدىڭ استىنا بىرىكتىرگەن تۇركى قاعاناتىنىڭ بەلگىلى اسكەري قولباسشىسى كۇلتەگىننىڭ جاس كەزى تۋرالى باياندايدى. فەستيۆال اياسىندا گۇلنار سارسەنوۆا مەن ۆاحتانگا حۋبۋتيانىڭ ۆلاديمير كۋنيننىڭ اتتاس كىتابىنا نەگىزدەلگەن «ورىستار ماريەنپلاتستا» اتتى درامالىق ءفيلمى دە كورسەتىلدى.
بريتاندىق كينورەجيسسەر جانە ستسەناريست دجەسسي دجونسوننىڭ «اۆە ماريا» ءفيلمىن قازاندا پروديۋسەر ەركەن يالگاشەۆ تانىستىردى. قازاندىق كورەرمەن ءۇشىن تاعى ءبىر تارتۋ – Generation14Plus باعدارلاماسىندا بەرلين كينوفەستيۆالىنىڭ گران-ءپريىن جەڭىپ العان فارحات ءشارىپوۆتىڭ «سحەما» ءفيلمىنىڭ كورسەتىلىمى ءوتتى. بۇل سەنساتسيالىق «18 كيلوگەرتس» فيلم تريلوگياسىنىڭ ەكىنشى ءبولىمى. سول سياقتى مۇسا جالەل اتىنداعى تاتار مەملەكەتتىك اكادەميالىق وپەرا جانە بالەت تەاترىندا قازاقستان رەسپۋبليكاسى ونەر شەبەرلەرىنىڭ گالا-كونتسەرتى بولدى. كونتسەرتكە قۇرمانعازى اتىنداعى قازاق ۇلتتىق حالىق اسپاپتار وركەسترى, قازاقستاننىڭ ەڭبەك سىڭىرگەن ارتىستەرى سەكەن تۇرىسبەكوۆ, ايگۇل ۇلكەنباەۆا, قازاقستاننىڭ ەڭبەك سىڭىرگەن قايراتكەرلەرى ايگۇل ەلشىباەۆا, سالتانات احمەتوۆا, باتىرجان مىقتىباەۆ جانە ەلىمىزدىڭ باسقا دا تانىمال انشىلەرى مەن شىعارماشىلىق ۇجىمدارى قاتىستى. كونتسەرت باستالار الدىندا ەلابۋگا مەملەكەتتىك تاريحي-ساۋلەت جانە ساۋلەت ونەرى قورىنان الىنعان قازاقستاندىق سۋرەتشىلەردىڭ سۋرەت كورمەسى ۇيىمداستىرىلدى.