قازاقستاندىق بانكتەردىڭ اگروونەركاسىپ كەشەنىنە بەرگەن نەسيەلەرىنىڭ كولەمى 16,4 پايىزعا وسكەن. سونداي-اق مەملەكەتتىك بيۋدجەتتىڭ ءدال وسى سالاعا باعىتتالعان شىعىندارى دا 11,2 پايىزعا ارتىپتى. بۇل تۋرالى Finprom.kz حابارلادى.
وسى جىلدىڭ ءبىرىنشى جارتىجىلدىعىنىڭ قورىتىندىسى بويىنشا مەملەكەتتىك بيۋدجەتتىڭ اۋىل, سۋ, ورمان جانە بالىق شارۋاشىلىعىنا, سونداي-اق ەرەكشە قورعالاتىن تابيعي اۋماقتارعا, قورشاعان ورتانى قورعاۋعا جانە جانۋارلار دۇنيەسىن دامىتۋعا جۇمسالعان شىعىندارى 305,3 ملرد تەڭگەنى قۇرادى. بۇل كورسەتكىش بىلتىرمەن سالىستىرعاندا 11,2 پايىزعا جوعارى.
2021 جىلعى قاڭتار-جەلتوقساندا سالا بويىنشا مەملەكەتتىك بيۋدجەت شىعىندارى 7,4 پايىزعا ءوسىپ, 717,9 ملرد تەڭگەنى قۇراعان ەدى. مەملەكەتتىك بيۋدجەت شىعىندارىنىڭ جالپى كولەمىندە اگروونەركاسىپ كەشەنىنىڭ ۇلەسى – 3,1-4,4 پايىز ارالىعىندا.
بانكتىك نەسيەلەندىرۋگە كەلەتىن بولساق, مۇندا بيىل قاڭتار-ماۋسىم ايلارىندا اۋىل, ورمان جانە بالىق شارۋاشىلىعىنا باعىتتالعان نەسيەلەردىڭ كولەمى 156,7 ملرد تەڭگەنى قۇرعان. كورسەتكىش وتكەن جىلدىڭ سايكەس كەزەڭىمەن سالىستىرعاندا 16,4 پايىزعا كوپ.
جالپى, بىلتىرعى قاڭتار-جەلتوقساندا سەكتوردى نەسيەلەندىرۋگە باعىتتالعان نەسيە كولەمى 279,3 ملرد تەڭگەگە جەتتى. بۇل بۇدان ءبىر جىل بۇرىنعى دەڭگەيدەن 65,1 پايىزعا ارتىق.
«وسى جىلدىڭ ءبىرىنشى جارتىجىلدىعىندا ءتيىستى كەزەڭدەردە قازاقستانداعى نەسيەلەردىڭ جالپى كولەمىندەگى اۋىل شارۋاشىلىعى نەسيەلەرىنىڭ ۇلەسى 1,5 پايىزدى, 2021 جىلعى قاڭتار-جەلتوقساندا 1,3 پايىزدى قۇرادى», دەلىنگەن Finprom.kz حابارلاماسىندا.
وڭىرلەر بويىنشا وسى جىلدىڭ التى ايىندا اگروونەركاسىپ كەشەنىنە باعىتتالعان نەسيەلەردىڭ ەڭ كوپ كولەمى الماتى قالاسىندا بەرىلگەن: 72,7 ملرد تەڭگە. كورسەتكىش 2021 جىلدىڭ قاڭتار-ماۋسىمىمەن سالىستىرعاندا 60 پايىزعا جوعارى. ۇزدىك ۇشتىكتە قوستاناي (19,7 ملرد تەڭگە, 9,3 پايىزعا ازايعان) جانە سولتۇستىك قازاقستان (13,4 ملرد تەڭگە, 2,6 پايىزعا كوبەيگەن) وبلىستارى بار.
ەسكە سالا كەتەيىك, قازاقستاننىڭ اۋىلدىق ەلدى مەكەندەرى مەن شاعىن قالالارىنىڭ تۇرعىندارى اۋىل شارۋاشىلىعى سالاسىنداعى جوبالاردى جۇزەگە اسىرۋ ءۇشىن شاعىن نەسيە الا الادى. بۇل ءۇشىن 40 ملرد تەڭگە كولەمىندە بيۋدجەت قاراجاتى قاراستىرىلعان. قارجى اگروونەركاسىپ كەشەنىندەگى جوبالاردى ميكروكرەديتتەۋگە باعىتتالادى. نەسيەلەندىرۋ وپەراتورى – «اگرارلىق نەسيە كورپوراتسياسى» اق. بيۋدجەتتىك نەسيەلەردىڭ ماقساتتى پايدالانىلۋىن جانە رەسپۋبليكالىق بيۋدجەتكە ۋاقتىلى قايتارىلۋىن باقىلاۋ اۋىل شارۋاشىلىعى مينيسترلىگىنە جۇكتەلگەن.