بۇگىن ءماجىلىستىڭ جالپى وتىرىسىندا «جانۋارلارعا جاۋاپكەرشىلىكپەن قاراۋ تۋرالى» زاڭعا ەنگىزىلەتىن تۇزەتۋلەر قارالدى. زاڭ جوباسىن تالقىلاۋ كەزىندە دەپۋتات ەدىل جاڭبىرشين ەگەر دە قوجايىنى بار يت ادام ومىرىنە, دەنساۋلىعىنا نەمەسە مۇلكىنە زيان كەلتىرەتىن بولسا, وعان جاۋاپكەرشىلىك قاراستىرىلاتىن نورما ەنگىزىلگەنىن ايتتى, دەپ جازادى Egemen.kz.
«يت ادامعا ورتاشا اۋىر دەڭگەيدە زاقىم كەلتىرەتىن بولسا, قوجايىنى وعان ەۆتانازيا جاساۋى كەرەك. ەگەر دە جاڭا ايتىلعان جاعدايلار تۋىندايتىن بولسا, جەكە تۇلعاعا – 100 ايلىق ەسەپتىك كورسەتكىش, لاۋازىمدى تۇلعاعا – 200-300 ايلىق ەسەپتىك كورسەتكىش كولەمىندە ايىپپۇل قاراستىرىلعان», دەدى دەپۋتات.
ال دەپۋتات تەمىر قىرىقباەۆ يتتەردى چيپتەۋ ماسەلەسىنە توقتالىپ, ول ارەكەت زاڭ جۇزىندە قالاي باقىلاناتىنىن سۇرادى. ءوز كەزەگىندە ەدىل ءجاڭبىرشين ۇي جانۋارىنىڭ تىركەلگەنىن تەكسەرەتىن نورما دايىندالعانىن حابارلادى.
قازاقستاندا ءار ساعات سايىن بەس ادامدى يت قابادى
«ىشكى ىستەر مينيسترلىگىمەن جانە جەرگىلىكتى پوليتسيا قىزمەتىمەن اقىلداسىپ, جەرگىلىكتى پوليتسيا ءار ۇيدەگى ءۇي جانۋارىنىڭ تىركەلگەنىن تەكسەرەتىن نورما دايىندادىق. ەگەر جانۋاردا چيپ بولماسا, وندا زاڭعا سايكەس يەسىنە ءبىر اي ۋاقىت بەرىلەدى. ءبىر ايدىڭ ىشىندە قايتا كەلىپ تەكسەرەدى, ەگەر تاعى دا بولماسا, وندا ايىپپۇل سالىنادى. ءۇشىنشى رەت قايتالانسا, وندا كونفيسكاتسيالانادى. وسىلايشا ءبىز ءبىر جاعىنان جاۋاپكەرشىلىكتى, ەكىنشى جاعىنان باقىلاۋ مەن مونيتورينگتى كۇشەيتىپ جاتىرمىز», دەدى ەدىل جاڭبىرشين.