سوڭعى ۋاقىتتا الەۋمەتتىك جەلىلەردە, ءتۇرلى ينتەرنەت-پلاتفورمالار مەن مەسسەندجەرلەردە «وڭاي تابىس», «جىلدام پايدا», «از ۋاقىتتا قارجىنى ەسەلەۋ» سياقتى جارنامالار جيىلەپ كەتتى. سىرتتاي تارتىمدى كورىنگەنىمەن, مۇنداي ۇسىنىستاردىڭ باسىم بولىگىنىڭ ارتىندا كاسىبي الاياقتار تۇرادى, دەپ حابارلايدى Egemen.kz.
الدىمەن ادام جارناماعا قىزىعىپ, سىلتەمە ارقىلى تىركەلىپ, بايلانىس دەرەكتەرىن قالدىرادى. وسىدان كەيىن وزدەرىن «قارجى كەڭەسشىسى», «ينۆەستيتسيالىق كومپانيا وكىلى» نەمەسە «جەكە مەنەدجەر» رەتىندە تانىستىراتىن ادامدار حابارلاسىپ, ءتيىمدى ۇسىنىستار جاساي باستايدى.
كوپ جاعدايدا باستاپقىدا از عانا قاراجات سالۋ ۇسىنىلادى. ءبىراز ۋاقىتتان كەيىن جالعان پلاتفورمالاردا «تابىس ءتۇستى» دەگەن اقپارات كورسەتىلىپ, سالىمنىڭ وسكەنى تۋرالى مالىمەت بەرىلەدى. وسىلايشا الاياقتار ادامنىڭ سەنىمىنە كىرىپ, ونى ءىرى كولەمدە اقشا سالۋعا يتەرمەلەيدى.
الايدا ازامات قوماقتى قارجى اۋدارعان سوڭ, قاراجاتىن كەرى قايتارماق بولعان كەزدە ءتۇرلى سىلتاۋلار ايتىلادى. ماسەلەن, «اقشانى شىعارۋ ءۇشىن كوميسسيا تولەۋ كەرەك», «ساقتاندىرۋ جارناسىن اۋدارۋ قاجەت», «شوتتى بەلسەندىرۋ ءۇشىن قوسىمشا تولەم كەرەك» نەمەسە «سالىق تولەۋ قاجەت» دەگەن جالعان تالاپتار قويىلادى. ناتيجەسىندە جابىرلەنۋشى بىرنەشە رەت اقشا اۋدارىپ, اقىرىندا الاياقتارعا الدانعانىن كەش تۇسىنەدى.
مۇنداي قىلمىستاردىڭ قاۋىپتىلىگى – الاياقتاردىڭ پسيحولوگيالىق تاسىلدەردى شەبەر قولدانۋىندا. كەيدە ولار سەنىم ۇيالاتۋ ءۇشىن باستاپقىدا از مولشەردەگى قاراجاتتى قايتارىپ بەرىپ, ءوزىن «ادال» ەتىپ كورسەتەدى. وسىدان كەيىن ادام كۇدىگىن سەيىلتىپ, كوبىرەك قارجى سالۋعا بەيىم بولادى.
پوليتسيا ەشبىر زاڭدى ينۆەستيتسيالىق ۇيىم الەۋمەتتىك جەلىدەگى كۇماندى جارنامالار ارقىلى كەپىلدى ءارى تەز تابىس ۇسىنبايتىنىن ەسكەرتەدى. قارجى نارىعىندا ءاردايىم تاۋەكەل بار. ال «100 پايىز پايدا», «كەپىلدەندىرىلگەن كىرىس» سياقتى ۋادەلەر – الاياقتىقتىڭ ايقىن بەلگىسى.
الاياقتىقتىڭ جاڭا ءتاسىلى تارادى: قاسكۇنەمدەر داۋىسىن وزگەرتىپ, سەنىمگە كىرەدى
ينتەرنەت-الاياقتار كوبىنە جالعان جارناما تاراتادى, تانىمال كومپانيالاردىڭ اتاۋى مەن لوگوتيپىن زاڭسىز پايدالانادى جانە رەسمي سايتتارعا ۇقساس جالعان پلاتفورمالار جاسايدى. سونداي-اق مەسسەندجەرلەر ارقىلى جەكە بايلانىسقا شىعىپ, بانك كارتاسىنىڭ دەرەكتەرىن, SMS-كودتاردى جانە جەكە مالىمەتتەردى سۇراۋى مۇمكىن. كوپ جاعدايدا قاراجاتتى جەكە تۇلعالاردىڭ شوتتارىنا نەمەسە كۇماندى رەكۆيزيتتەرگە اۋدارتۋعا تىرىسادى.
وسىنداي قاۋىپتىڭ الدىن الۋ ءۇشىن ازاماتتار ساقتىق شارالارىن قاتاڭ ساقتاۋى قاجەت. كۇماندى جارنامالارعا سەنبەۋ, ينۆەستيتسيالىق ۇسىنىستاردى بىرنەشە دەرەككوز ارقىلى تەكسەرۋ, كومپانيانىڭ ليتسەنزياسى مەن رەسمي تىركەلۋىن انىقتاۋ – نەگىزگى تالاپتاردىڭ ءبىرى.
ەستە ساقتاڭىز: جەڭىل تابىس ۋادەسى – كوبىنە الاياقتىڭ ايلاسى. كۇماندى ينۆەستيتسيا – پايدا ەمەس, قاۋىپ. قارجىلىق قاۋىپسىزدىكتىڭ باستى كەپىلى – ساقتىق.
باسپاناعا قاتىستى جاڭا الاياقتىق سحەما: ءىىم قازاقستاندىقتارعا ەسكەرتۋ جاسادى
ەگەر الاياقتىق بەلگىلەرىن بايقاساڭىز, دەرەۋ «102» نومىرىنە حابارلاسۋ قاجەت.