مەحيكوداعى مەترونىڭ مەديافاسادتارىندا ديماش قۇدايبەرگەننىڭ Fly Away انىنە تۇسىرىلگەن ۆيدەوسى جاريالاندى. روليك اپتا بويى ساعات سايىن 576 ەكراندا كورسەتىلەدى. بۇل تۋرالى dimashnews.com سايتى حابارلادى.
تارقاتا ايتار بولساق, ديماشتىڭ مەكسيكاداعى فان-كلۋبىنىڭ ارقاسىندا بەينەروليكتەر كورسەتىلدى. Dears ەڭ تانىمال تەلەديدارلىق جەلىلەردىڭ ءبىرى – مەحيكو قالاسىنداعى مەترودا مۋزىكالىق بەينەكليپتەر مەن مادەني جاڭالىقتاردى ورنالاستىرۋمەن اينالىساتىن Isa TV-گە حابار تاراتۋ تۋرالى ءوتىنىش جىبەرگەن.
ترانسلياتسيانىڭ ءوتۋى ءۇشىن Dears Isa TV رەسمي Instagram-اككاۋنتىنداعى پوستتىڭ استىنا 2000 لايك جيناۋ كەرەك بولعان. ال ديماش شىعارماشىلىعىنىڭ جانكۇيەرلەرى وعان نەبارى ەكى كۇننىڭ ىشىندە قول جەتكىزگەن. وسىلايشا, مەكسيكا استاناسىنداعى مەترونىڭ 70 ستانساسىندا ديماشتىڭ Fly Away انىنە تۇسىرىلگەن ۆيدەوسى كورسەتىلدى. مەترو – قالانىڭ نەگىزگى كولىك قۇرالدارىنىڭ ءبىرى. سوندىقتان بەينەنى 3 ميلليونعا جۋىق ادام كورەدى.