الماتى قالاسىنىڭ مەشىتىندە ۇيالى تەلەفوندى قولدى قىلعان كۇدىكتى قولعا ءتۇستى. ونىڭ ۇرلىق جاساعان ءساتى بەينەباقىلاۋ كامەراسىنا ءتۇستى, دەپ حابارلايدى Egemen.kz Polisia.kz-كە سىلتەمە جاساپ.
بۇل ىسپەن اۋەزوۆ اۋدانىنىڭ پوليتسەيلەرى اينالىسقان.
ناتيجەسىندە, تۇرعىلىقتى جەرى جوق 42 جاستاعى جۇمىسسىز ەر ادام ۇستالدى. ۆ. ەسىمدى ازامات ۇرلىق جاساعان كەزدە بەينەباقىلاۋ كامەرالارىنا تۇسكەن.
جابىرلەنۋشىنىڭ ايتۋىنشا, ول قالاداعى مەشىتتەردىڭ بىرىندە ناماز وقىپ جاتقان كەزدە ۇيالى تەلەفونىن ەدەنگە قويعان. ءبىراز ۋاقىتتان كەيىن تەلەفونىنىڭ جوق بولىپ كەتكەنىن بايقاعان ول پوليتسياعا جۇگىنگەن.
«كۇدىكتى سول كۇنى ۇستالدى. ءتىنتۋ كەزىندە ۇرلانعان گادجەت تابىلدى. ۇستالعان ادام ۇرلىققا قاتىسى بارىن جوققا شىعارماي, كىناسىن مويىنداپ, جاساعان ىسىنە وكىنگەنىن ايتادى. اتالعان فاكت قر قك 188-بابى 1-بولىگى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە تىركەلدى», دەدى اۋەزوۆ اۋداندىق پب جانىنداعى پوليتسيا ءبولىمىنىڭ باستىعى ەلنۇر قۇدرەتباەۆ.