پرەمەر-مينيستر ءاليحان سمايىلوۆ «ارسەلورميتتال» كومپانياسىنىڭ اتقارۋشى توراعاسى لاكشمي ميتتالمەن كەزدەسۋ وتكىزدى, دەپ حابارلايدى Egemen.kz.
تاراپتار كومپانيانىڭ ءوندىرىستى جاڭعىرتۋ جانە ەڭبەك قاۋىپسىزدىگىن ارتتىرۋ جونىندەگى جوسپارلارىن, شىعارىلاتىن ءونىمدى ىشكى نارىققا جانە كورشى ەلدەرگە جەتكىزۋ ماسەلەلەرىن, سونداي-اق مەتالل ونىمدەرىن قايتا بالقىتۋدىڭ نەعۇرلىم جوعارى دەڭگەيىنە كوشۋ پەرسپەكتيۆالارىن تالقىلادى.
سونداي-اق لاكشمي ميتتال كومپانيانىڭ الداعى جىلدارى بولات قۇيۋ جانە تاۋ-كەن اكتيۆتەرىن جاڭعىرتۋعا قوماقتى قاراجات سالۋدى جوسپارلاپ وتىرعانىن حابارلادى. سونىمەن قاتار قىزمەتكەرلەردى وقىتۋ جانە ولاردىڭ قاۋىپسىزدىگىن قامتاماسىز ەتۋ ماسەلەلەرىنە كوبىرەك كوڭىل ءبولۋ جوسپارلانىپ وتىر.
پرەمەر-مينيستر ءوندىرىستىڭ قازىرگى قارقىنىن ساقتاپ, شىعارىلاتىن ءونىم نومەنكلاتۋراسىن كەڭەيتۋ جانە تۋىنداعان ماسەلەلەردى شەشۋ بويىنشا يندۋستريا جانە ينفراقۇرىلىمدىق دامۋ مينيسترلىگىنىڭ باسشىلىعىمەن بارىنشا تىعىز جۇمىس ىستەۋ قاجەتتىگىنە نازار اۋداردى.
«ونەركاسىپتىك قاۋىپسىزدىك وتە ماڭىزدى ماسەلە بولعاندىقتان, وعان ەرەكشە نازار اۋدارۋ كەرەك. وسىعان بايلانىستى ءوندىرىستى دامىتۋ جانە قىزمەتكەرلەردى مامانداندىرىلعان وقىتۋ بويىنشا كومپانيانىڭ ينۆەستيتسيالىق جوسپارلارىن قۇپتايمىز», دەدى ءاليحان سمايىلوۆ.