ء*يزرايلدىڭ بۇرىنعى پرەمەر-ءمينيسترى ەحۋد ولمەرت كەشە پاراقورلىعى ءۇشىن التى جىلعا باس بوستاندىعىنان ايىرىلدى. تەل-اۆيۆ سوتى وعان مۇنداي جازانى يەرۋساليم مەرى بولىپ تۇرعان كەزىندە تۇرعىن ءۇي سالۋشىلاردان 144 مىڭ دوللار كولەمىندە پارا العانى ءۇشىن تاعايىندادى. بۇل يزرايل تاريحىندا پرەمەر-مينيستر ءىستى بولعان العاشقى وقيعا بولىپ وتىر.
*بريكس-كە (برازيليا, رەسەي, ءۇندىستان, قىتاي جانە وڭتۇستىك افريكا رەسپۋبليكاسى) ءمۇشە بەس ەلدىڭ ۇشەۋى ارگەنتينانى وسى بلوكقا قوسىلۋعا شاقىرعان. بۇل تۋرالى بۇرناعى كۇنى بۋەنوس-ايرەستەگى ءۇندىستان ەلشىسى امارەندا كحاتۋا جاريا ەتتى. بۇعان سەبەپ, ارگەنتينا بەستىكتىڭ الەۋەتىن ارتتىرادى دەپ كۇتەتىندەر بار سەكىلدى.
*بۇۇ باس حاتشىسى پان گي مۋن كەشە وڭتۇستىك سۋدانداعى زورلىق-زومبىلىققا كىنالىلەردى جاۋاپكەرشىلىككە تارتۋ ءۇشىن «ارنايى تريبۋنال» قۇرۋدى ۇسىندى. بۇۇ قاۋىپسىزدىك كەڭەسىنە قايىرىلعان پان گي مۋن باس ۇيىمنىڭ وڭتۇستىك سۋدانداعى ميسسياسىنىڭ بايانداماسىن جاريالاعان ەدى. قۇجاتتا ەلدە ادامزاتقا قارسى قىلمىس جاسالدى دەپ وي تۇيۋگە نەگىز بولاتىن بۇلتارتپاس ايعاقتار كەلتىرىلەدى.
*يسپانيانىڭ لەونە قالاسىندا جاس ايەل ەلدەگى بيلەۋشى «حالىقتىق پارتيا» وڭىرلىك بولىمشەسىنىڭ باسشىسى يزابەل كارراسكونى اتىپ ولتىرگەن. كەلىنشەك كولدەنەڭ جۇرتتىڭ كوزىنشە كارراسكوعا بەس وق جۇمساسا, ۇشەۋى ونىڭ ولىمىنە سەبەپ بولعان. كەيىن انىقتالعانىنداي, ءبىر جىل بۇرىن ول قالالىق كەڭەستەگى جۇمىسىنان بوساتىلىپ جىبەرىلىپتى. وسىلايشا, كارراسكو كەك قايتارۋدىڭ قۇربانىنا اينالعان.
*2012 جىلدىڭ اياعىندا, قىتاي كومپارتياسىنىڭ باسشىسى بولىپ سايلانا سالىسىمەن سي تسزينپين ءوزىنىڭ ىشكى ساياسي باعىتى باسىمدىقتارىنىڭ ءبىرى جەمقورلىققا قارسى كۇرەس دەپ جاريالاعان ەدى. ەندى قىتاي ءتوراعاسىنىڭ جەمقورلىققا قارسى ناۋقانىنىڭ تىم قاتتى كەتكەنى بايقالادى. وسىنىڭ سالدارىنان ەلدىڭ ءىجو-ءسى 1,5 پايىزعا قىسقارۋى ىقتيمال ەكەن. قىتايدىڭ بۇعان دەيىنگى باسشىلارى دا جەمقورلىقپەن كۇرەسكە باسا نازار اۋدارعان. بىراق, ونىڭ كوپشىلىگى, بايقاۋشىلاردىڭ باعالاۋىنشا, تەك قاعاز جۇزىندە قالعان كورىنەدى.
اقپارات اگەنتتىكتەرىنىڭ ماتەريالدارى نەگىزىندە ازىرلەندى.