قازاقستاندىقتار ءدارى-دارمەكتىڭ شەكتى بولشەك باعاسىن تەكسەرە الاتىن بولادى. تسيفرلىق ەكونوميكانى دامىتۋ ورتالىعى ازىرلەگەن Naqty Onim قوسىمشاسىندا تۇتىنۋشى ءدارى-دارمەكتىڭ شەكتى بولشەك ساۋدا باعاسى, ءدارىنىڭ قۇرامى مەن دوزاسى, سونداي-اق ءدارى-دارمەكتىڭ جەتكىزىلۋ مارشرۋتى تۋرالى اقپاراتقا قول جەتكىزە الادى.
ەسكە سالا كەتەيىك, بيىل شىلدە ايىنان باستاپ قازاقستاندا ازاماتتاردى جالعان جانە زاڭسىز اكەلىنەتىن دارىلەردەن قورعايتىن دارىلىك زاتتاردى كەزەڭ-كەزەڭىمەن مىندەتتى تسيفرلىق تاڭبالاۋ ەنگىزىلدى. شەكتى باعالاردى نەگىزسىز وسىرگەنى ءۇشىن زاڭ ليتسەنزيانىڭ قولدانىلۋىن توقتاتۋدى قوسا العاندا, اكىمشىلىك جاۋاپكەرشىلىكتى كوزدەيدى. سوڭعى ەكى جىلدا قازاقستاندا جالعان ءدارى-دارمەكتىڭ 700-گە جۋىق دەرەگى تىركەلگەن.
قازاقستاندا دارىلىك زاتتاردى تسيفرلىق تاڭبالاۋدى ەنگىزۋ ءدارى-دارمەك باعاسىنىڭ نەگىزسىز وسۋىنە جول بەرمەۋگە باعىتتالعان. دارىلىك زاتتاردىڭ شەكتى بولشەك ساۋدا باعاسى جىلىنا ەكى رەت بەلگىلەنەدى. قازاقستاندا تىركەلگەن دارىلەردىڭ قۇنىنا قاتىستى شەكتى قۇننىڭ وزگەرۋى تۋرالى اقپارات دەنساۋلىق ساقتاۋ مينيسترلىگىنىڭ فارماتسيا كوميتەتىنىڭ, دارىلىك زاتتاردى ساراپتاۋ ۇلتتىق ورتالىعىنىڭ ۆەب-سايتتارىندا جانە فارماتسيا جانە دەنساۋلىق ساقتاۋ كوميتەتىنىڭ اۋماقتىق دەپارتامەنتتەرىنىڭ رەسۋرستارىندا ورنالاستىرىلادى. ءدارى-دارمەكتەرگە ديەتالىق قوسپالار, ۆەتەرينارلىق پرەپاراتتار, نارەستە فورمۋلالارى, كوسمەتيكا كىرمەيدى.