تۇركىتانۋشى, پۋبليتسيست, پەداگوگ, اۋدارماشى, قازاق حالقىنىڭ تاعدىرى, ءتىلى ءۇشىن كۇرەسكەن الاش ارىسى, قوعام قايراتكەرى, قازاق ءالىپبيىنىڭ نەگىزىن سالعان عالىم احمەت بايتۇرسىن ۇلىنىڭ تۋعان كۇنىنە وراي نۇر-سۇلتان قالاسىنداعى قالامگەرلەر اللەياسىندا ورنالاسقان «الاش قايراتكەرلەرى» ەسكەرتكىشىنە گۇل شوقتارىن قويۋ ءراسىمى ءوتتى.
«بۇگىن ءبىر كەرەمەت عاجايىپ كۇن. سەبەبى ۇلت ۇستازى, الاشتىڭ كوسەمى, احمەت بايتۇرسىن ۇلىنىڭ تۋعان كۇنى. مىنە, مەرەكەمىز نۇر-سۇلتان قالاسى اكىمدىگى, عىلىم جانە جوعارى ءبىلىم مينيسترلىگى جانە باسقا دا قۇزىرلى ورگاندار, زيالى قاۋىم وكىلدەرى, جازۋشىلار وداعىمەن بىرلەسىپ, ەلورداداعى قالامگەرلەر اللەياسىندا ورنالاسقان «الاش قايراتكەرلەرى» ەسكەرتكىشىنە گۇل شوقتارىن قويۋ راسىمىمەن باستالدى. يگىلىكتى ءىس-شارا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە عىلىمي كونفەرەنتسيامەن جالعاستى. سونىمەن قاتار «مەملەكەتتىك ءتىل جانە باق» بايقاۋىنىڭ قورىتىندىسى شىقتى. بۇگىنگى مەرەكە رەسپۋبليكا بويىنشا تويلانىپ جاتىر. احمەت بايتۇرسىن ۇلىنىڭ ەلگە سىڭىرگەن ەڭبەگىنە ءمان بەرسەك, بۇل ۇلتتىڭ, جاسامپازدىقتىڭ, مادەني ينتەللەكتۋالدىڭ مەرەكەسى دەۋگە بولادى. سەبەبى بالالارىمىز مەكتەپكە بارىپ جاتىر, جاستارىمىز شەتەلدە ءبىلىم الىپ جاتىر, قازاقتىڭ ءبىلىمى مەن مادەنيەتىنىڭ ءورىسى كەڭەيىپ جاتىر. سونىڭ باسىندا تۇرعان تۇلعالارىمىزدىڭ ءبىرى – احمەت بايتۇرسىن ۇلى. ول كىسىنىڭ ەڭبەكتەرى سول زامانمەن قالعان جوق, بۇگىنگە جەتىپ, ءبىز پايدالانىپ ءجۇرمىز. ونىڭ تاعىلىمدى ءىزى سايراپ جاتىر», دەدى ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ باس ديرەكتورى ەربول تىلەشوۆ.
ەسكە سالا كەتەيىك, قازاقستان حالقى تىلدەرىنىڭ ءححىV قالالىق فەستيۆالى اياسىندا قىركۇيەك ايىنىڭ سوڭىنا دەيىن ەلوردادا احمەت بايتۇرسىن ۇلىنىڭ تۋعان كۇنىنە جانە ءتىل مەرەكەسىنە وراي ءارتۇرلى فورماتتا ءىس-شارالار وتكىزۋ جوسپارلانعان.
«قوڭىر كۇزدە ەلوردامىزدا جىل سايىن تىلدەر مەرەكەسى باستالادى. مۇنىڭ ءبىر جاعى سيمۆوليكالىق ءمانى بار. ول و باستا قازاقتىڭ ءتىلى, قازاقتىڭ تاعدىرى ءۇشىن شىرىلداعان ۇلتتىڭ رۋحاني كوسەمى, ۇلت ۇستازى احمەت بايتۇرسىن ۇلىنىڭ تۋعان كۇنىنە وراي ۇيىمداستىرىلعان. سوندىقتان بۇگىنگى مەرەكەنىڭ ماڭىزى زور. ءبىر جاعى احاڭ باستاعان الاش ارىستارىنا قۇرمەت, ءىلتيپات كورسەتۋ. بيىل يۋنەسكو كولەمىندەگى احمەت بايتۇرسىن ۇلىنىڭ 150 جىلدىق مەرەكەسى تويلانىپ, ءار وڭىردە احاڭنىڭ قۇرمەتىنە ءتۇرلى ءىس-شارالار وتۋدە. بۇل كىسىلەر ەلدىڭ ەرتەڭى ءۇشىن التىن باستارىن بايگەگە تىكتى جانە سول جولدا قۇربان بولدى. سوندىقتان بۇگىنگى ۇرپاقتىڭ ساناسىندا, كەلەشەك ۇرپاقتىڭ جادىندا احاڭداردىڭ ەرەن ەرلىگى ساقتالۋى كەرەك جانە ودان ءتالىم الۋ كەرەك», دەدى جازۋشىلار وداعىنىڭ ەلورداداعى فيليالىنىڭ باسشىسى داۋلەتكەرەي كاپ ۇلى.
گۇل قويۋ راسىمىنەن كەيىن ادىلەتتى قازاقستاننىڭ مەملەكەتشىل-يدەولوگيالىق, عىلىمي-ينتەللەكتۋالدىق, مادەني-تانىمدىق ىزدەنىسىن, تاجىريبەسىن, الەۋەتىن تانىمالداندىرۋ ورايىندا احمەت بايتۇرسىن ۇلى مۇراسىن جاڭاشا زەرتتەپ-زەردەلەۋ, ءتىل ءبىلىمى مەن ادەبيەتتانۋ كوشباسشىسىنىڭ عىلىمي قاعيداتتارىن, تۇجىرىمدامالارىن ءبىلىم, مادەنيەت, ت.ب. باعىتتاردا سالالاندىرۋ, احمەتتانۋشىلاردىڭ جاڭا بۋىنىن قالىپتاستىرۋعا سەپتەسۋ, جوعارى جانە ورتا مەكتەپتىڭ ا.بايتۇرسىن ۇلى مۇراسىن وقۋ جانە تاربيە ۇدەرىسىندە پايدالانۋعا بايلانىستى تاجىريبەسىن تالقىلاۋ جانە وزىق تاجىريبەلەردى ناسيحاتتاۋ ماقساتىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ۇيىمداستىرۋىمەن احمەت بايتۇرسىن ۇلىنىڭ 150 جىلدىعىنا ارنالعان عىلىمي كونفەرەنتسيا ءوتتى.