قوستانايداعى ءورت: ەلوردادان سەگىز جۇك كولىگى جونەلتىلدى

4 قىركۇيەك كۇنى كەشكە Amanat پارتياسىنىڭ استانالىق بولىمشەسى عيماراتىنىڭ الدىندا قوستاناي وبلىسىنداعى ورتتەن زارداپ شەككەندەرگە كومەك كورسەتۋ ءۇشىن گۋمانيتارلىق جۇگى بار 8 جۇك كولىگى جينالدى.

گۋمانيتارلىق كومەكتى جەتكىزۋ ءۇشىن قوستاناي وبلىسىنا نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ باسشىسى قايرات قامباروۆ باردى.

ء«بىز بۇل ءىس-شارانى قالا باسشىلىعىنىڭ, پارتيانىڭ تاپسىرماسى بويىنشا, «جاستار رۋحى» جاستار قاناتىمەن, ەلوردا ەرىكتىلەرىمەن بىرلەسىپ باستادىق. كەشەدەن باستاپ ءبىز الەۋمەتتىك جەلىلەردە قالالىق شتاب پەن ارنايى قور قۇرىلعانى تۋرالى اقپارات تاراتا باستادىق. سونداي-اق گۋمانيتارلىق كومەك كورسەتۋ ماسەلەلەرى بويىنشا جۇگىنۋگە بولاتىن تەلەفون نومىرلەرىن كورسەتتىك. قالا كاسىپكەرلەرى بىردەن جاۋاپ قايتارىپ, كولىكتەرىن ۇسىندى. قول ۇشىن سوزعىسى كەلگەن قالا تۇرعىندارى ەڭ قاجەتتى زاتتاردى الىپ كەلدى, بۇل گيگيەنالىق قۇرالدار, سابىن, سۋسابىندار, مايلىقتار, ال ونىمدەردەن - ۇن, جارما, قانت پەن سۋسىندار. ءبىر كۇندە ءبىز 8 جۇك كولىگىن جينادىق. تاۋارلار مەن زاتتاردى جيناۋ ءالى دە جالعاسۋدا. تاڭەرتەڭ ءبىز ەلورداعا قايتا ورالۋدى جوسپارلاپ وتىرمىز جانە جۇك كولىكتەرى تولعان سوڭ, ولاردى قايتادان اپات ايماقتارىنا جىبەرەمىز», دەدى قايرات قامباروۆ كولىكتەردىڭ اتتانۋى الدىندا.

قالانىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى قۋانىش ساپاروۆ ورتتەن زارداپ شەككەندەرگە قاجەتتى زاتتاردىڭ قالاي جينالعانى تۋرالى ايتىپ بەردى.

«قالا كاسىپكەرلەرى جالپى قايعىعا بەي-جاي قاراماي, ورتتەن زارداپ شەككەندەرگە كومەك كورسەتۋدى ۇيعاردى. وسىلايشا ءبىز قاجەتتى زاتتار مەن ونىمدەردى جيناۋمەن اينالىستىق. تاڭەرتەڭنەن باستاپ ءورت سوندىرۋشىلەرگە جۇك جەتكىزۋمەن اينالىسقان قالانىڭ بارلىق كاسىپكەرلەرىنە ۇلكەن العىسىمىزدى بىلدىرەمىز», دەدى قۋانىش ساپاروۆ.

ەسكە سالا كەتسەك, قوستاناي وبلىسىندا ءورت كەزىندە زارداپ شەككەندەرگە گۋمانيتارلىق كومەك جيناۋ قازاقستان حالقى اسسامبلەياسىندا دا ۇيىمداستىرىلدى. قاجەتتى زاتتاردى قابىلداۋ 5 قىركۇيەكتە باستالدى. بارلىق سۇراقتار بويىنشا كورسەتىلگەن تەلەفون ارقىلى حابارلاسۋعا بولادى: + 7 702 481 20 38, +7 701 466 0345.