بۇگىنگى تاڭدا ءومىرىمىزدى تۇراقتى اقپارات كوزدەرىنىڭ ءبىرى بولىپ سانالاتىن تەلەۆيزياسىز ەلەستەتۋ قيىن. تەلەحابار تاراتۋ ۋاقىت تالابىنان تۋىنداعان جاھاندىق وزگەرىستەر قارساڭىندا تۇر. بۇل تەلەحابار تاراتۋ سالاسىنىڭ كەلبەتىن تولىعىمەن وزگەرتەدى. ەندى ەشقاشان بۇرىنعىداي بولمايدى.
مۇنى ءاربىر قازاقستاندىق ازامات سەزىنەتىن بولادى. زاماناۋي وركەنيەت جاڭالىقتارىن قابىلداپ, ءومىرىڭىزدى ىڭعايلى ءارى «وزىق» ەتەسىز بە, الدە تىم جىلدام دامىپ جاتقان تەحنولوگيالىق پروگرەستەن بويىڭىزدى اۋلاق ۇستاپ, تەحنولوگيانىڭ قازىرگى ءۇردىسىن جوققا شىعارۋعا تىرىساسىز با؟! بارلىق جاڭا نارسە ادامزاتقا ناقتى پايدا اكەلمەيىنشە, قاشان دا قورقىنىش پەن سەنىمسىزدىك تۋدىراتىنى ءمالىم.
انالوگتى تەلەحابار تاراتۋدى تسيفرعا اۋىستىرۋ – الەمدىك پروتسەسس. سونىڭ ىشىندە قازاقستان دا «تسيفرلىق» كەڭىستىكتى قارقىندى يگەرۋدە. 2012 جىلدان باستاپ ەل حالقىنىڭ 92%-دان استامى تەلەۆيزيالىق digital-پىشىمگە كوشتى.
قازاقستاندىقتار «تسيفرعا» سەنىم بىلدىرۋدە, مۇنى تۇسىندىرۋگە بولادى. بىراق ول تۋرالى ايتپاس بۇرىن, انالوگتى حابار تاراتۋ جۇيەسىنىڭ نەلىكتەن كۇنى بىتكەنىنىڭ سەبەبىن انىقتاۋ كەرەك.
انالوگتى سيگنال سىرتقى اسەرلەرگە وتە وسال, كەيدە اياقاستى جوعالىپ كەتۋى مۇمكىن. ونى انتەننانىڭ كومەگىمەن نەمەسە پروۆايدەردىڭ تەلەۆيزيالىق كابىلىن پايدالانىپ ۇستاپ الۋعا بولادى. مۇنداي تەلەۆيزيانىڭ كەمشىلىگى – سيگنالدىڭ كەدەرگىگە السىزدىگى كەسكىن مەن دىبىس ساپاسىنىڭ ناشارلاۋىنا اكەلەدى. ناشار اۋا رايىندا – جەل, جاڭبىر, نايزاعاي كەزىندە سيگنال ناشارلاپ, كورەرمەن سۋرەتتى كەدەرگىلەرمەن, بۇرمالانعان دىبىسپەن نەمەسە مۇلدەم دىبىسسىز الادى. حابار تاراتۋ ساپاسىنا تەلەستانسانىڭ الىستىعى دا اسەر ەتەدى.
بۇرىن, ياعني تسيفرلىق تەلەحابار تاراتۋ پايدا بولعانعا دەيىن انالوگتى تەلەۆيزيا تەلەۆيزيالىق كەسكىن مەن دىبىستى تاراتۋدىڭ جالعىز ءادىسى بولاتىن. تسيفرلىق حابار تاراتۋ انالوگقا قاراعاندا الدەقايدا ۇزاق قاشىقتىقتا قابىلداناتىن قورعانىس پەن سيگنالدىڭ جوعارى دەڭگەيىنە يە. تسيفرلىق سيگنال كەدەرگىگە ءتوزىمدى جانە كورەرمەندەرگە, ءتىپتى ەڭ قاشىق ەلدى مەكەندەرگە دە ءوزىنىڭ باستاپقى تۇرىندە, بوتەن شۋ مەن بۇرمالانۋسىز جەتە الادى.
تسيفرلىق تەلەۆيزيالىق حابار تاراتۋدى دامىتۋ قولجەتىمدى باعدارلامالاردىڭ سانىن كوبەيتەدى, ينتەراكتيۆتى حابار تاراتۋدى ەنگىزەدى جانە حالىققا قوسىمشا قىزمەتتەر ۇسىنادى. بۇل, سونىمەن قاتار, تۇرعىنداردى كوپ باعدارلامالىق تۆ حابار تاراتۋمەن قامتۋداعى سايكەسسىزدىكتەردى جويۋعا, ەلدىڭ بارلىق تۇرعىندارىنا اقپاراتتىق رەسۋرستارعا قولجەتىمدىلىكتى قامتاماسىز ەتۋگە, تەلەباعدارلامالاردىڭ كەسكىنى مەن دىبىسىنىڭ ساپاسىن جاقسارتۋعا كومەكتەسەدى.
بۇل – جاڭا ءداۋىردىڭ تۋى جانە ءبىز وسىنداي تاڭعاجايىپ وزگەرىستىڭ كۋاگەرى عانا ەمەس, اتالعان تاريحي پروتسەستىڭ بەلسەندى قاتىسۋشىلارى دا بولىپ وتىرمىز.