حالىق جازۋشىسىنا ارنالعان تۋرنير

ءتۋرنيردى وتكىزۋگە قازاقستان رەس­پۋبليكاسى بيليارد سپورتى فە­دەراتسياسى شىعىس قازاقستان وب­لىس­تىق فيليالىنىڭ ديرەكتورى سەرىك اقتانوۆ مۇرىندىق بولدى. سپورتتىق ءىس-شاراعا جان­كۇيەرلەر قىزىعۋشىلىق تانىتىپ, كوپتەپ جينالدى. ەڭ الدىمەن, فەدەراتسيا باسشىسى سەرىك قاسىمبەك ۇلى ءسوز الىپ, قابدەش اعا تۋرالى ەستەلىك ايتتى.

– بۇدان ءۇش جىل بۇرىن زاي­ساندا بايمۇرات باتىرعا ەس­كەرتكىش اشىلعاندا جازۋشى اعامىز ەرەكشە قۋانىپ, اۋدان تۇر­عىندارىن قۇتتىقتاعان بولاتىن. الداعى ۋا­قىتتا ءتۋرنيردى رەسپۋبليكالىق دەڭگەيگە كوتەرۋ ويدا بار. پرە­زيدەنت قاسىم-جومارت توقاەۆ ەل ازاماتتارىنىڭ بوس ۋاقىتتارىن ءماندى وتكىزىپ, دەنساۋلىقتارىنىڭ مىقتى بولۋى ءۇشىن بۇقارالىق سپورت­پەن تۇراقتى شۇعىلدانۋىنا نازار اۋدا­رۋ قاجەتتىگىن ايتقانى بەلگىلى. بيليارد سپورتى ادامدار­دىڭ تەز شەشىم قابىلداپ, مي قا­بىلەتىن ارتتىرۋىنا ىقپال جا­ساي­دى. قا­زىرگى كەزدە بيليارد سپورتى­مەن وڭىردە مىڭعا جۋىق ادام شۇ­عىلدانادى, – دەدى فەدەراتسيا باسشىسى.

ءسوز كەزەگى الماتىدان ات تەر­لەتىپ كەلگەن قابدەش اعانىڭ جا­قىن دوسى, قازاقستاننىڭ ەڭبەك سىڭىر­گەن قايراتكەرى, فيلوسوفيا عىلىمدارىنىڭ دوكتورى, پروفەسسور ۇلىقپان سىدىقوۆقا بەرىلدى. ۇلىقپان ەسىلحان ۇلى ءتۋرنيردى وت­كىزۋگە مۇرىندىق بولعان فەدەرا­تسيا باسشىسىنا, ەل ازاماتتارىنا العىسىن ءبىلدىردى. الداعى ۋاقىت­تا ميل­ليوندار ۇناتاتىن سپورت ءتۇ­رى­نىڭ اۋقىمى كەڭەيەتىنىنە سەنىم ءبى­لدىردى.

تۋرنير باسەكەلەرى ون ساعات­قا سوزىلدى. ۋاقىتتىڭ قالاي وتكەنىن بىلمەي دە قالدىق. ارا­سىندا جينالعاندار قاباڭ تۋرالى ەستەلىكتەر ايتتى. ءان شىر­قا­لىپ, ولەڭ وقىلدى. ال تۇڭ­عىش رەت وتكىزىلگەن تۋرنير قو­رى­تىن­دى­سىندا جانبولات سەيىت­قا­زين جە­ڭىمپاز اتاندى. وعان فەدەراتسيا پرەزيدەنتى سەرىك قا­سىمبەك ۇلى ارنايى ديپلوم مەن العىسحات تاپسىردى. ەكىنشى ورىنعا رۇستەم قىدىرباەۆ, ەكى ءۇشىنشى ورىنعا رينات اليموۆ پەن ۆلاديسلاۆ تسوي يە بولدى. ولار دا ديپلوممەن ماراپاتتالدى. ءتۇسىپحان تۇسىپبەكوۆ «ج­ەڭىسكە دەگەن جىگەرى ءۇشىن», ال قايرات ادىلبەكوۆ «ادىسكەرلىكتىڭ جوعارى دەڭگەيى ءۇشىن» بەلگىسىمەن اتالىپ ءوتتى.

وڭداسىن ەلۋباي,

قازاقستاننىڭ قۇرمەتتى سپورت قىزمەتكەرى

وسكەمەن