قىزىلوردادا مىڭعا جۋىق پەداگوگ قاتىسقان تامىز كەڭەسىندە ءبىلىم سالاسىنىڭ وزەكتى ماسەلەلەرى قارالىپ, ۇزدىك ۇستازدار ماراپات مىنبەرىنەن كورىندى. جيىنعا وبلىس اكىمى نۇرلىبەك نالىباەۆ, وقۋ-اعارتۋ ۆيتسە-ءمينيسترى عاني بەيسەمباەۆ, پارلامەنت سەناتىنىڭ دەپۋتاتتارى مۇرات باقتيار ۇلى, اقمارال ءالنازاروۆا, ءماسليحات دەپۋتاتتارى جانە سالا ارداگەرلەرى, مەكتەپ ديرەكتورلارى مەن ۇستازدار قاتىستى.
كەڭەس الدىندا قاتىسۋشىلار تەاتر دالىزىندەگى باسپالار ونىمدەرى مەن ءتۇرلى جوبالار كورمەسىن ارالادى. ءوڭىر ۇستازدارىن «الماتىكىتاپ» باسپاسىنىڭ باس رەداكتورى ومىرزاق ابدىشۇكىر ۇلى بيىل باسپادان جارىق كورگەن وقۋلىقتارمەن تانىستىرىپ, TopIQ ەلەكتروندىق وقۋلىقتار پلاتفورماسىنىڭ ءبىلىم بەرۋدەگى ارتىقشىلىقتارى تۋرالى ايتىپ ءوتتى.
ء«بىلىمدى ۇلت: تەرەڭ ءبىلىم, ەڭبەكقورلىق جانە وتانشىلدىق قاسيەت» تاقىرىبىندا وتكەن كەڭەستە وبلىس باسشىسى سالاعا جاسالىپ جاتقان قولداۋ مەن جەتكەن جەتىستىكتەرگە, الدا تۇرعان ماسەلەلەرگە توقتالدى.
سوڭعى جىلدارى ءبىلىم سالاسىندا اۋقىمدى رەفورمالار جۇزەگە اسىرىلىپ, پەداگوگ مارتەبەسىن كوتەرۋدە تىڭ باستامالار قولعا الىندى. جۇيەلى جۇمىستى قاجەت ەتەتىن سالاداعى وڭ وزگەرىستەر ايماقتاردا دا بايقالادى. مىسالى, بيىل وبلىستا بىلىمگە بولىنگەن قارجى بىلتىرعىدان 17 پايىزعا ارتىپ, 204,8 ملرد تەڭگەگە جەتتى. وسى جىلى سالا قارجىسى بيۋدجەتتىڭ 42,8%-ىن قۇراسا, الداعى كەزەڭدەردە ونىڭ كولەمى ارتا بەرمەك.
ۇكىمەتتىڭ كەڭەيتىلگەن وتىرىسىندا بالاباقشالارعا ليتسەنزيالاۋ ءتارتىبىن قايتا ەنگىزۋ مىندەتى قويىلعانى بەلگىلى. بالا قاۋىپسىزدىگىنە تىكەلەي قاتىستى بۇل مىندەتتەر ءبىرىنشى كەزەكتە ورىندالۋعا ءتيىس. بۇگىندە وبلىستاعى 601 بالاباقشانىڭ 439-ى جەكە سەكتور ۇلەسىندە. وسى بالاباقشا قۇرىلتايشىلارى جوعارى جاۋاپكەرشىلىك تانىتىپ, قاۋىپسىزدىك ماسەلەسىنە جەتە ءمان بەرۋى كەرەك. وبلىستىق ءبىلىم باسقارماسى مەن ءبىلىم سالاسىندا ساپانى قامتاماسىز ەتۋ دەپارتامەنتى ماسەلەگە قاتىستى ءتيىستى دايىندىق شارالارىن جۇرگىزۋدى قولعا العانى ءجون.
– الداعى 3 جىلدا ايماقتا 20 مەملەكەتتىك مەكتەپتىڭ ىرگەتاسى قالانادى. بۇگىندە دەمەۋشىلەردىڭ ءوز قاراجاتىنا سالىنعان جەكە مەكتەپتەر جەلىسى 20-عا جەتتى. الداعى جىلدارى ينۆەستور ەسەبىنەن تاعى 12 مەكتەپ سالىنادى. ال بيىل وبلىستا 6 جاڭا مەكتەپ بوي كوتەرەدى, ونىڭ 2-ەۋىن كەلەر ايدا, قالعان 4-ەۋىن جىل سوڭىنا دەيىن پايدالانۋعا بەرەمىز. ورىن تاپشىلىعى جاعدايىنىڭ الدىن الۋ ءۇشىن جىل اياعىنا دەيىن 1,6 ملرد تەڭگە كولەمىندە قارجى جۇمساپ, قالاداعى اباي مەكتەبىنە – 550, №101 مەكتەپكە 375 ورىنعا لايىقتالعان قوسىمشا قۇرىلىس سالىناتىن بولادى, – دەدى وبلىس اكىمى.
كونفەرەنتسيادا وقۋ-اعارتۋ ۆيتسە-ءمينيسترى عاني بەيسەمباەۆ وزگەرىستەر زامانىندا ءبىلىم بەرۋ سالاسىنىڭ دامۋ قارقىنىنا ىلەسۋ ءۇشىن ۇستازداردىڭ ادىستەمەسى دە جاڭارىپ وتىرۋ قاجەت ەكەنىن ايتىپ, جاڭا وقۋ جىلىنىڭ جاڭالىقتارىنا توقتالدى. سەنات دەپۋتاتى مۇرات باقتيار ۇلى وقۋلىقتار ماسەلەسىن شىعارۋ, كوللەدجدەردە مامان دايارلاۋ ماسەلەسىن قوزعادى.
كەڭەستە وبلىس اكىمى ارداگەر ۇستازدار تولەپبەرگەن قاسىموۆ پەن مارك پودولسكيگە «قىزىلوردا وبلىسىنىڭ قۇرمەتتى ازاماتى» اتاعىن تابىستاپ, توقساننىڭ تورىنە شىققان قوس قاريانىڭ سالانىڭ دامۋىنا سىڭىرگەن ەڭبەگىنە توقتالدى. ءوڭىر باسشىسى جۋىردا كارىز قۇدىعىنا قۇلاعان ءسابيدى قۇتقارعان 15 جاستاعى ارمان امانجولوۆتىڭ قاتارلاستارىنا ۇلگى بولاتىن ەرلىگىن اتاپ ءوتىپ, بوزبالاعا دەمەۋشىلەر جاساعان سىي – ەكى بولمەلى پاتەر كىلتىن تابىستاعان ساتتە بۇكىل زال ورنىنان تۇرىپ, ايرىقشا قوشەمەت تانىتتى.
ۇزدىك ءبىلىم بەرۋ گرانتىنا جىل سايىن وتكىزىلەتىن كونكۋرستىڭ بيىلعى جەڭىمپازى ارال قالاسىنداعى ۇزاقباي قارامانوۆ اتىنداعى №262 مەكتەبى 34 ملن تەڭگەنىڭ سەرتيفيكاتىن جەڭىپ الدى. ال وبلىس اكىمىنىڭ گرانتىن يەلەنگەن 100 وقۋشىنىڭ بىرقاتارىنا وسى جيىندا ءبىلىم بەرۋ گرانتى تاپسىرىلدى.
قىزىلوردا وبلىسى